Read Hmong Daw Phau Ntawv Nkauj 48 Bible Online

Phau Ntawv Nkauj 48 - Hmong Daw bible

Phau Ntawv Nkauj 48

¹Tus TSWV yog tus muaj hwjchim thiab tsimnyog qhuas nyob hauv peb tus Vajtswv lub nroog, saum nws lub roob dawbhuv.

²Xi-oos yog Vajtswv lub roob uas siab thiab zoo nkauj kawg nkaus li, tus vajntxwv uas muaj hwjchim loj, lub nroog yog qhov chaw zoo siab rau lub ntiajteb no.

³Vajtswv qhia hais tias muaj kev cawm dim nyob hauv lub nroog ntawd, nws yog lub chaw fajxwm uas ruaj khov.

⁴Tej vajntxwv thiaj sib sau ua ke tuaj ntaus lub Roob Xi-oos.

⁵Tiamsis thaum lawv pom lub nroog ntawd lawv xav tsis thoob li, lawv ntshai thiab khiav tsis yeej rov qab.

⁶Lawv ntshai ua ibce tshee hnyo, ib yam li tus pojniam uas mob plab yug menyuam,

⁷thiab ib yam li khaub zeeg cua ntsawj tej nkoj ntxeev.

⁸Peb twb hnov tej txujci tseemceeb uas Vajtswv tau ua tas los lawm, thiab tamsim no peb qhovmuag twb pom tej txujci ntawd nyob hauv peb tus Vajtswv uas muaj hwjchim loj kawg lub nroog; nws yuav tsomkwm lub nroog ntawd kom nyob kaj siab lug mus ibtxhis.

⁹Vajtswv, peb lub siab xav ntsoov txog koj txojkev hlub uas nrog nraim peb hauv koj lub Tuamtsev xwb.

¹⁰Tej neeg uas nyob txhua txhia thaj chaw puavleej qhuas koj nkaus xwb, thiab koj lub koob meej nrov ncha moo lug mus thoob plaws hauv qab ntuj no. Koj tswjhwm ncaj ncees,

¹¹thov pub rau cov neeg saum roob Xi-oos muaj kev zoo siab. Koj yeej txiav txim ncaj ncees, thov kom cov Yudas tej nroog tau nyob kaj siab lug.

¹²Vajtswv haivneeg mus ncig lub roob Xi-oos thiab suav tej chaw tsomfaj,

¹³mus saib tus ntsa yeej thiab tshuaj xyuas tej chaw fajxwm kom tseeb, nej thiaj yuav piav tau qhia rau tiam tom ntej paub hais tias:

¹⁴“Tus Vajtswv no yog peb tus Vajtswv mus ibtxhis tsis kawg li, nws yuav coj peb ib tiam dhau ib tiam mus ibtxhis li.”