Read Hmong Daw Phau Ntawv Nkauj 49 Bible Online

Phau Ntawv Nkauj 49 - Hmong Daw bible

Phau Ntawv Nkauj 49

¹Nej sawvdaws cia li mloog zaj no. Tagnrho tej neeg uas nyob txhua qhov chaw cia li tig pobntseg mloog zaj no,

²tsis hais tus hlob tus yau zoo ib yam nkaus, thiab tus npluanuj tus pluag nyob ua ke.

³Tej uas kuv lub siab xav yeej tseeb, kuv yuav hais tej lus uas txawj ntse xwb.

⁴Kuv yuav tig pobntseg ua tib zoo mloog tej pajlug thiab txhais kom tau tej ntsiab lus ib yam lib thaum kuv ntaus nkauj nogncas ntag.

⁵Kuv tsis ntshai thaum muaj kev txomnyem thiab muaj yeebncuab tuaj vij ibncig kuv,

⁶cov neeg phem ntawd lawv cia siab rau lawv tej kev npluanuj thiab khav ntxhias rau lawv tej nyiaj txiag xwb.

⁷Tsis muaj leejtwg yuav rov cawm tau nws dim, nws tsis muaj peevxwm muas tau nws txojsia ntawm Vajtswv los,

⁸rau qhov tus nqi uas them neeg txojsia kim heev. Tej uas nws coj mus them

⁹yeej tsis txaus tus nqi uas tso nws dim hauv lub qhov ntxa kom nws tau txojsia nyob mus ibtxhis.

¹⁰Sawvdaws yeej paub hais tias txawm yog cov neeg txawj ntse los puavleej tuag ib yam li cov neeg uas tsis muaj kev txawj ntse thiab cov neeg ruam. Lawv tso lawv tej nyiaj txiag thiab txhua yam rau lawv tej xeebntxwv.

¹¹Lawv lub ntxa yog lawv lub tsev uas lawv nyob mus ibtxhis, txawm yog lawv muaj liaj muaj teb ntau los lawv qhov chaw nyob tsuas yog hauv lub qhov ntxa tas mus li.

¹²Neeg lub koob meej thiab kev muaj txiag npluanuj yeej pab tsis tau nws dim txojkev tuag, nws yeej yuav tuag ib yam li tej tsiaj.

¹³Saib yuav muaj dabtsi tshwmsim rau cov neeg uas lawv rov cia siab rau lawv nkaus xwb, thiab cov uas txaus siab rau lawv tej nyiaj txiag,

¹⁴lawv raug kev puastsuaj tuag ib yam li tej yaj, thiab Kev Tuag yog lawv tus tswv. Cov neeg ncaj ncees yuav yeej lawv tagnrho, rau qhov lawv tej cev yuav lwj sai rau hauv tubtuag teb qhov uas nyob deb lawv tej tsev.

¹⁵Tiamsis Vajtswv yuav cawm kuv, nws yuav cawm kom kuv dim ntawm txojkev tuag lub hwjchim.

¹⁶Tsis txhob nyuaj siab thaum ib tug neeg twg npluanuj, txawm yog nws muaj nyiaj txiag ntau npaum li cas los

¹⁷thaum nws tuag lawm nws yeej coj tsis tau dabtsi nrog nws mus li, nws tej nyiaj txiag yuav tsis nrog nws mus rau hauv qhov ntxa.

¹⁸Txawm yog tus neeg uas nws txaus siab rau nws lub neej thiab luag qhuas nws vim nws lub neej zoo

¹⁹los nws yeej yuav tau mus nrog nws cov yawgkoob nyob hauv tubtuag teb qhov uas tsaus ntuj nti mus ibtxhis.

²⁰Neeg lub koob meej thiab kev muaj txiag npluanuj yeej pab tsis tau nws dim txojkev tuag, thiab nws yeej yuav tuag ib yam li tej tsiaj.