Read Hmong Daw Phau Ntawv Nkauj 5 Bible Online

Phau Ntawv Nkauj 5 - Hmong Daw bible

Phau Ntawv Nkauj 5

¹Tus TSWV, thov koj mloog kuv tej lus, thiab hnov kuv lub suab hu.

²Kuv tus Vajtswv thiab vajntxwv, thov mloog kuv lub suab quaj hu thov koj pab kuv! Tus TSWV, kuv thov koj;

³Koj yeej hnov kuv lub suab thov thaum sawv ntxov; thaum lub hnub tawm tuaj kuv thov koj thiab tos rawv koj teb kuv.

⁴Koj tsis yog tus Vajtswv uas txaus siab rau txojkev ua phem ua qias; koj yeej tsis pub muaj tej kev phem nyob tabmeeg koj li.

⁵Cov neeg khavtheeb tsis muaj peevxwm sawv tabmeeg ntawm koj lub xubntiag; koj yeej ntxub cov neeg siab phem.

⁶Koj rhuav tshem cov neeg dag, ntxub cov neeg limhiam, thiab cov neeg ntxeev ntxias.

⁷Tiamsis vim koj muaj kev hlub kuv thiaj muaj peevxwm los tau rau hauv koj tsev. Kuv thiaj muaj peevxwm mus pehawm koj hauv koj lub Tuamtsev dawbhuv thiab txhos caug pe koj ntawm kuv lub siab uas hwm koj.

⁸Tus TSWV, kuv muaj yeebncuab coob heev. Thov coj kuv ua raws li koj lub siab nyiam; thov ua koj txojkev kom tiaj rau kuv taug.

⁹Tej lus uas kuv cov yeebncuab hais yeej tsis muaj ib los tseeb li, lawv tsuas yog xav ua kom muaj kev puastsuaj xwb. Lawv hais lus mos lus muag thiab ncauj lus zoo, tiamsis lawv lub siab puv nkaus kev dag ntxias uas yog kev tuag.

¹⁰Vajtswv, thov koj txiav txim thiab rau txim rau lawv, thov kom lawv tej kev ntxeev siab ua rau lawv raug kev puastsuaj. Cia li muab lawv ntiab tawm ntawm koj mus rau qhov lawv ua txhaum ntau heev thiab lawv ntxeev siab rau koj.

¹¹Tiamsis cia txhua tus uas los cuag koj tau kev kaj siab lug, cia lawv hu nkauj zoo siab txhua lub sijhawm. Thov koj tsomkwm cov uas hlub koj; vim muaj koj lawv thiaj muaj kev zoo siab.

¹²Tus TSWV, koj yeej foom koob hmoov rau cov neeg uas hwm koj, Koj txojkev hlub tiv thaiv lawv ib yam li daim thaiv hniav ntaj.