Read Hmong Daw Phau Ntawv Nkauj 50 Bible Online

Phau Ntawv Nkauj 50 - Hmong Daw bible

Phau Ntawv Nkauj 50

¹Tus TSWV, Vajtswv tus muaj hwjchim loj kawg nkaus yog tus hais; nws hu thoob plaws hauv ntiajteb no hnubtuaj ti nkaus hnubpoob.

²Vajtswv ci ntsa iab hauv lub nroog Xi-oos uas yog lub nroog zoo nkauj kawg nkaus.

³Peb tus Vajtswv yuav los, tiamsis nws yuav tsis los ntsiag to, muaj nplaim taws cig sib ntswg yos ntawm nws hauv ntej, thiab muaj khaub zeeg cua ntsawj ibncig nws.

⁴Nws hu ntuj thiab ntiajteb ua timkhawv saib nws txiav txim rau nws haivneeg.

⁵Nws hais tias, “Sau kuv haivneeg uas ncaj ncees los cuag kuv, lawv yog cov neeg uas muab tsiaj tua fij thiab nrog kuv coglus tseg lawm.”

⁶Lub ntuj qhia hais tias Vajtswv yog tus ncaj ncees, thiab nws yog tus txiav txim.

⁷“Kuv haivneeg, cia li mloog, kuv yuav qhia nej, Cov Yixalayees, kuv yuav ua timkhawv tawmtsam nej ntag. Kuv yog Vajtswv tus uas yog nej tus Vajtswv.

⁸Kuv cem nej tsis yog vim tej tsiaj uas nej coj tuaj tua theej txhoj thiab tej tsiaj uas nej pheej coj tuaj tua hlawv fij rau kuv.

⁹Kuv yeej tsis yuav tej heev nyuj uas nej yug tom tshav zaub lossis tsis yuav nej tej tshis,

¹⁰txhua yam tsiaj uas nyob tom havzoov thiab tej nyuj uas nyob puv nkaus saum ntau txhiab lub roob puavleej yog kuv tug.

¹¹Tagnrho tej noog thiab txhua yam uas muaj sia nyob tom tej nras puavleej yog kuv li.

¹²“Yog kuv tshaib plab, kuv yuav tsis thov ntawm nej noj, rau qhov lub ntiajteb thiab txhua tsav yam puavleej yog kuv li.

¹³Kuv noj nqaij nyuj lossis haus ntshav tshis thiab los?

¹⁴Cia li muab nej tej khoom uas nej ua Vajtswv tsaug fij rau Vajtswv, thiab muab rau Vajtswv tus uas muaj hwjchim loj kawg nkaus raws li nej tau coglus tseg lawm.

¹⁵Thaum nej raug kev txomnyem nej cia li thov kuv, kuv yuav pab kom nej dim thiab nej yuav qhuas kuv.”

¹⁶Tiamsis Vajtswv hais rau cov neeg siab phem tias, “Vim li cas nej lam muab kuv tej lus samhwm coj mus hais? Vim li cas nej lam piav txog kuv tej lus cog tseg?

¹⁷Nej twb tsis kam cia kuv ntuas nej, nej tsis lees yuav kuv tej lus samhwm.

¹⁸Thaum nej pom cov neeg ua tubsab nej txawm nrog lawv sib raug zoo, thiab mus koom nrog cov neeg deev luag poj luag txiv ua ib pab.

¹⁹“Nej pheej niaj hnub hais lus phem lus qias, nej pheej tsis tswj nej lub qhovncauj uas hais lus dag.

²⁰Nej yeej npaj rawv nrhiav lus iab liam nej tej kwvtij thiab nrhiav txim rau lawv.

²¹Nej twb ua tej no tas los lawm, kuv yeej tsis hais nej ib lo li, yog li ntawd, nej thiaj xav hais tias, kuv zoo ib yam li nej xwb. Tiamsis nimno kuv cem nej thiab muab tej no nthuav qhia rau nej.

²²“Nej cov uas tsis quavntsej kuv, nej cia li mloog kuv hais, lossis yuav cia kuv ua kom nej puastsuaj thiab tsis muaj leejtwg cawm tau kom nej dim li.

²³Tus uas muab nws tej khoom fij ua kuv tsaug thiaj yog tus hwm kuv, thiab kuv yuav cawm txhua tus uas mloog kuv lus kom dim.”