Read Hmong Daw Phau Ntawv Nkauj 57 Bible Online

Phau Ntawv Nkauj 57 - Hmong Daw bible

Phau Ntawv Nkauj 57

¹Vajtswv, thov koj hlub kuv, thov koj hlub kuv lauj, rau qhov kuv los cuag koj ua tus pab cawm kom kuv dim. Kuv nrhiav tau koj ob sab qab tis ua chaw roos kuv mus txog thaum tej khaub zeeg cua dhau lawm.

²Kuv tsa ncauj thov Vajtswv, tus uas muaj hwjchim loj tshaj plaws, tus Vajtswv tus uas pub kuv muaj txhua yam tsis tu.

³Nws yuav teb kuv tej lus thov saum ntuj tuaj thiab cawm kom kuv dim; Nws yuav yeej cov neeg uas tsimtxom kuv. Vajtswv yuav qhia nws txojkev hlub uas tsis paub kawg thiab nws txojkev ncaj ncees rau kuv.

⁴Kuv cov yeebncuab nyob puagncig kuv, lawv zoo ib yam li tej tsov ntxhuav tos tom neeg noj. Lawv tej hniav ntse ib yam li hmuv thiab tej xubvos, lawv tej nplaig ntse zuag plias ib yam li hniav ntaj.

⁵Vajtswv, thov qhia koj lub hwjchim uas loj kawg nkaus rau saum nruab ntug, thiab qhia koj tej txujci kom puv nkaus rau hauv ntiajteb no.

⁶Kuv cov yeebncuab cuab vas tos yuav khwb kom tau kuv, kuv muaj kev nyuaj siab kawg li. Lawv khawb qhov tos kuv kev, tiamsis lawv rov poob tas rau hauv lub qhov ntawd lawm.

⁷Vajtswv, kuv tso siab plhuav lawm lauj! Kuv yuav hu nkauj thiab qhuas koj mus li.

⁸Kuv lub siab, cia li tsim dheev! Kuv tej nkauj nogncas thiab tej raj, cia li ras dheev! Kuv yuav tsa kom lub hnub sawv.

⁹Tus TSWV, kuv yuav ua koj tsaug tabmeeg txhua lub tebchaws. Kuv yuav qhuas koj tabmeeg txhua haivneeg.

¹⁰Koj txojkev hlub uas tsis paub kawg siab mus nto ntuj, koj txojkev ncaj ncees siab mus txog nruab ntug.

¹¹Vajtswv, thov qhia koj lub hwjchim uas loj kawg nkaus rau saum nruab ntug, thiab qhia koj tej txujci kom puv nkaus rau hauv ntiajteb no.