Read Hmong Daw Phau Ntawv Nkauj 58 Bible Online

Phau Ntawv Nkauj 58 - Hmong Daw bible

Phau Ntawv Nkauj 58

¹Puas yog nej cov nomtswv yeej ibtxwm txiav txim ncaj ncees? Nej puas txiav txim ncaj ncees rau txhua tus?

²Tsis yog li ntawd! Nej tsuas xav ntsoov rau txojkev ua phem xwb, thiab ua limhiam kawg nkaus rau lub tebchaws.

³Cov neeg ua phem yeej ua kev txhaum mus tas lawv simneej, lawv yeej ibtxwm dag txij thaum yug tau lawv los.

⁴Lawv muaj taug ib yam li nab; lawv ntsaws qhovntsej kom tsis hnov lus ib yam li tus nab raj kubsai uas lag ntseg

⁵uas yeej tsis hnov tus dib nab lub suab lossis hnov tus uas txawj ua khawvkoob tej lus ntxias hlo li.

⁶Vajtswv, thov koj cia li muab cov tsov ntxhuav no tej kaus tsoo kom lov.

⁷Thov kom lawv ploj mus ib yam li tej dej uas muab nqus povtseg, thov kom lawv raug luag tsuj ib yam li tej nroj tsuag hauv plawv kev.

⁸Thov kom lawv zoo li cov qwj uas yaj tas rau hauv lub plhaub lawm, thov kom lawv zoo ib yam li tus menyuam mos uas yug tau los xwb twb tuag lawm tsis tau pom lub hnub.

⁹Thaum lawv tsis tau paub tej no, lawv twb raug muab txiav tu tas ib yam li tej nroj tsuag lawm, thaum Vajtswv chim heev, nws yuav muab lawv tshuab povtseg thaum lawv tseem muaj sia nyob.

¹⁰Cov neeg ncaj ncees yuav zoo siab heev thaum lawv pom cov neeg txhaum raug txim, lawv yuav kwm cov neeg siab phem tej ntshav mus.

¹¹Tej neeg yuav hais zom zaws tias, “Cov neeg ncaj ncees yeej tau txais nqi zog; tseeb tiag, Vajtswv txiav txim rau neeg ntiajteb.”