Read Hmong Daw Phau Ntawv Nkauj 59 Bible Online

Phau Ntawv Nkauj 59 - Hmong Daw bible

Phau Ntawv Nkauj 59

¹Kuv tus Vajtswv, thov cawm kom kuv dim ntawm kuv cov yeebncuab, thov tsomkwm kuv kom kuv dim ntawm cov neeg uas tawmtsam kuv lauj!

²Thov cawm kom kuv dim ntawm cov neeg siab phem, thov pab kom kuv dim ntawm cov neeg tua neeg!

³Tamsim no lawv yeej zov rawv tos tua kuv povtseg, cov neeg limhiam sib sau tuaj tawmtsam kuv. Tus TSWV, tsis yog vim kuv lub txim lossis tej kev txhaum uas kuv ua.

⁴Kuv yeej tsis tau ua txhaum, lawv cia li maj ceev nrooj tuaj tawmtsam kuv xwb. Thov koj tsa qhovmuag saib kuv thiab los pab kuv.

⁵Tus TSWV uas yog Vajtswv tus muaj hwjchim loj kawg nkaus, cia li sawv tsees thiab los pab kuv, cov Yixalayees tus Vajtswv, thov koj tsa qhovmuag saib zaj no! Thov koj cia li sawv tsees los thiab rau txim rau cov neeg nruj tsiv, thov tsis txhob hlub tshua txog cov neeg ntxeev siab ntawd li.

⁶Thaum tsaus ntuj lawv rov qab los thiab qw zom zaws ib yam li cov dev tom ncig lub nroog.

⁷Cia li mloog lawv tej lus thuam thiab tej lus cem. Lawv tej nplaig ntse zuag plias li hniav ntaj hauv lawv qhovncauj, lawv tseem xav hais tias yeej tsis muaj neeg hnov lawv tej lus li.

⁸Tiamsis tus TSWV, koj luag lawv plig kawg li, koj txob thuam cov neeg nruj tsiv.

⁹Vajtswv, kuv cia siab ntsoov rau koj lub zog loj zog nchav, koj yog kuv qhov chaw cawm siav.

¹⁰Kuv tus Vajtswv yeej hlub kuv thiab yuav los pab kuv, nws yuav cia kuv saib ntsoov kuv cov yeebncuab ua cov swb.

¹¹Vajtswv, thov koj tsis txhob tua lawv povtseg, nyob tsam kuv haivneeg tsis nco qab lawv lawm. Tus TSWV uas yog tus tsomkwm peb, thov koj lub zog loj zog nchav ua kom lawv swb thiab tawg khiav mus.

¹²Kev txhaum nyob ntawm lawv daim dincauj, lawv tej lus puavleej yog kev txhaum xwb, thov kom lawv raug ntes vim lawv txojkev khavtheeb! Rau qhov lawv tej lus yog lus foom phem thiab lus dag xwb,

¹³koj cia li ua kom lawv puastsuaj vim koj txojkev chim, thov ua kom lawv puastsuaj tu noob nrho mus. Sawvdaws thiaj paub hais tias, Vajtswv yog tus uas kav haivneeg Yixalayees, thiab nws kav thoob plaws hauv lub ntiajteb no.

¹⁴Thaum tsaus ntuj uas kuv cov yeebncuab rov los, lawv qw zom zaws ib yam li cov dev tom ncig lub nroog,

¹⁵lawv zoo ib yam li cov dev uas nrhiav noj thiab nyooj sib txeeb noj.

¹⁶Tiamsis kuv yuav hu nkauj qhuas koj lub zog loj zog nchav, txhua tagkis kuv hu nkauj qhuas koj txojkev hlub uas tsis paub kawg. Koj yeej yog kuv lub chaw cawm siav, yog lub tsev rau kuv nkaum thaum kuv raug kev txomnyem.

¹⁷Kuv yuav qhuas koj, koj yog tus tsomkwm kuv. Vajtswv yog kuv lub chaw cawm siav, Vajtswv thiaj yog tus hlub kuv.