Read Hmong Daw Phau Ntawv Nkauj 62 Bible Online

Phau Ntawv Nkauj 62 - Hmong Daw bible

Phau Ntawv Nkauj 62

¹Kuv ua siab ntev tos Vajtswv ua tus cawm kuv, kuv muab siab npuab nws tib leeg xwb.

²Nws tib leeg thiaj yog tus tsomkwm kuv thiab cawm kuv dim xwb, nws yog tus tiv thaiv kuv, thiab kuv yuav tsis swb ib zaug li.

³Tagnrho nej tseem yuav tawmtsam tus neeg ntawd mus txog thaum twg? Nws twb tsis muaj zog npaum li tus ntsa lajkab uas twb vau tas lawm los sav.

⁴Nej tsuas xav txo tus neeg uas muaj koob meej, thiab nej nyiam hais tej lus dag xwb. Nej lub ncauj foom koob hmoov tiamsis nej lub siab foom tsis zoo.

⁵Kuv muab siab npuab Vajtswv tib leeg xwb, nws thiaj yog tus uas kuv cia siab.

⁶Nws tib leeg thiaj yog tus tsomkwm thiab cawm kuv dim, nws yog tus tiv thaiv kuv, thiab kuv yuav tsis swb ib zaug li.

⁷Vajtswv yog tus cawm kuv dim thiab pub kuv muaj koob meej, nws yog tus tsomkwm zoo heev, thiab nws yog kuv lub chaw nkaum.

⁸Kuv haivneeg, nej yuav tsum cia siab rau Vajtswv txhua lub sijhawm. Qhia nej lub siab rau nws, rau qhov nws yog peb lub chaw cawm siav.

⁹Tej neeg zoo ib yam li ua pa xwb, tus hlob tus yau los tsis muaj nqis dabtsi li. Muab lawv tso rau saum teev luj los lawv tsis tsuam teev li, lawv tseem sib tshaj tej pa cua thiab.

¹⁰Nej tsis txhob xav hais tias ua nruj ua tsiv, ces yuav tau luag tug yuav; tsis txhob cia siab hais tias mus nyiag luag tug, ces yuav tau dawb tau do. Txawm yog nej yuav muaj nyiaj ntau zuj zus los tsis txhob qaug rau tej ntawd.

¹¹Kuv hnov Vajtswv hais ntau zaus tias lub hwjchim yog nws li,

¹²thiab nws txojkev hlub yeej tsis paub kawg. Tus TSWV, koj yog tus uas yuav muab nqi zog rau txhua tus raws li nyias tes haujlwm.