Read Hmong Daw Phau Ntawv Nkauj 64 Bible Online

Phau Ntawv Nkauj 64 - Hmong Daw bible

Phau Ntawv Nkauj 64

¹Vajtswv, kuv tabtom raug kev nyuaj siab, thov koj mloog kuv tej lus thov! Kuv ntshai kuv cov yeebncuab kawg li, thov cawm kuv txojsia!

²Thov tsomkwm kom kuv dim ntawm cov neeg siab phem tej tswvyim tuavhauv ua phem, thiab ntawm cov neeg siab phem uas yuam cai.

³Lawv tej nplaig ntse ib yam tej ntaj thiab lawv tej lus iab lus daw zuag ib yam li tej xubvos.

⁴Lawv maj nroos hais tej lus dag, lawv tsis txajmuag li, lawv txob thuam cov neeg zoo, lawv tsis ntshai leejtwg li.

⁵Lawv ib leeg txhawb ib leeg rau kev tuavhauv ua phem, lawv sib tham saib lawv yuav mus cuab hlua rau qhov chaw twg. Lawv hais tias, “Yeej tsis muaj leejtwg pom peb li.”

⁶Lawv tuav tswvyim ua phem thiab hais tias, “Peb npaj tau tswvyim zoo kawg nkaus.” Neeg lub siab thiab lub hlwb xav txog tej uas phem kawg li.

⁷Tiamsis Vajtswv tua nws tej xubvos tuaj rau lawv, thiab tib pliag ntshis xwb lawv raug mob tas.

⁸Nws yuav ua kom lawv puastsuaj tas vim lawv tej kev xav ntawd, txhua tus uas pom lawv yuav co hau nto.

⁹Ces lawv yuav ntshai heev, lawv thiaj xav txog tej uas Vajtswv ua tas los thiab qhia rau sawvdaws paub txog Vajtswv tes haujlwm.

¹⁰Cov neeg ncaj ncees txhua tus yuav zoo siab kawg li vim tej uas tus TSWV tau ua tas los. Lawv yuav tau txojkev cawm dim ntawm nws, cov neeg siab zoo txhua tus yuav qhuas nws.