Read Hmong Daw Phau Ntawv Nkauj 65 Bible Online

Phau Ntawv Nkauj 65 - Hmong Daw bible

Phau Ntawv Nkauj 65

¹Vajtswv, yeej tsimnyog peb qhuas koj nyob hauv lub nroog Xi-oos thiab ua raws li peb twb tau coglus tseg rau koj,

²rau qhov koj teb peb tej lus thov lawm. Tej neeg nyob txhua qhov yuav los cuag koj

³vim lawv nco txog lawv tej kev txhaum. Peb kov tsis yeej peb tej kev txhaum, tiamsis koj twb zam peb tej kev txhaum lawm.

⁴Cov neeg uas koj xaiv tseg yuav zoo siab heev, lawv yog cov uas koj coj los nyob hauv lub tsev uas neeg tuaj pehawm koj, Peb yuav txaus siab rau txhua yam zoo uas nyob hauv koj lub tsev, tej koob hmoov no twb yog koj lub Tuamtsev uas dawbhuv ntag.

⁵Qhov uas koj pab peb kovyeej twb yog koj teb peb tej lus thov, thiab koj tej txujci uas zoo kawg nkaus tau cawm peb dim. Tej neeg uas nyob thoob ntiajteb thiab nyob sab dej hiavtxwv tim ub puavleej cia siab rau koj xwb.

⁶Koj lub zog tsa tej roob nyob muaj chaw kom sawvdaws pom koj lub hwjchim uas loj kawg nkaus.

⁷Koj ua rau dej hiavtxwv lub suab uas nrov nroo ntws nyob ntsiag to; thiab ua rau tej dej uas ntas tuaj nrov qeeg nkaws nyob tus yees, koj ua rau neeg lub suab qw ntshoo nrooj nyob ntsiag mus.

⁸Tej neeg uas nyob thoob qab ntuj no puavleej ntshai thiab hwm koj thaum lawv pom koj tej txujci tseemceeb uas koj ua tas los lawm. Koj tej haujlwm ua rau sawvdaws zoo siab qw sab ntuj tim no mus rau sab ntuj kawg tim ub.

⁹Koj tso nag los ywg thaj av uas koj tsomkwm saib xyuas, koj ua rau thaj av ntawd rog thiab muaj chiv. Koj ua rau dej ntws puv nkaus tej kwjdeg, koj pub muaj qoobloo puv nkaus hauv lub ntiajteb no. Tej no twb yog koj ua ntag.

¹⁰Koj tso tuamtsam nag los ywg tej nras liaj uas luag laij cia, thiab ua rau tej nras liaj txhawv dej thoob plaws, koj ua rau tej av phom nphoob vim muaj nag ywg thiab ua rau tej yub qoob hlob mos nyoos.

¹¹Koj txoj koob hmoov ua rau tej qoobloo ntsu. Koj mus txog qhov twg qhov ntawd muaj nplua mias.

¹²Tej tshav zaub muaj tsiaj txhu nyob ua npoj ntws, tej toj roob puv nkaus kev zoo siab.

¹³Tom tej nras muaj yaj nyob ua npoj ntws, muaj nplej puv nkaus hauv tej hav. Txhua yam puavleej qw thiab hu nkauj zoo siab.