Read Hmong Daw Phau Ntawv Nkauj 66 Bible Online

Phau Ntawv Nkauj 66 - Hmong Daw bible

Phau Ntawv Nkauj 66

¹Txhua haivneeg, cia li qw zoo siab thiab ua Vajtswv tsaug!

²Hu nkauj qhuas nws lub npe thiab nws lub tshwjchim; thov kom tej lus qhuas ua rau nws tau koob meej.

³Hais rau Vajtswv hais tias, “Tej haujlwm uas koj ua, peb xav tsis thoob li! Koj lub hwjchim loj kawg nkaus ua rau koj cov yeebncuab ntshai thiab qhau cev hlo pehawm koj ntawm koj xubntiag.

⁴Txhua tus uas nyob hauv ntiajteb puavleej pehawm koj, lawv hu nkauj qhuas koj, lawv hu nkauj qhuas koj lub npe.”

⁵Nej cia li saib tej uas Vajtswv twb ua tas los lawm, nws ua tej haujlwm uas zoo kawg nkaus rau sawvdaws pom.

⁶Nws muab dej hiavtxwv hloov ua av qhuav; peb tej pogkoob yawgkoob thiaj li mus kotaw hla dhau dej. Peb thiaj zoo siab vim tej uas nws tau ua.

⁷Nws lub hwjchim kav mus ibtxhis thiab nws tsa qhovmuag saib ntsoov txhua haivneeg. Tsis pub leejtwg ntxeev siab tawmtsam nws.

⁸Txhua haivneeg cia li qhuas peb tus Vajtswv, cia peb hnov nej tej suab qhuas Vajtswv.

⁹Nws yog tus tuav peb txojsia thiab nws tsis pub peb ntog li.

¹⁰Vajtswv, koj tau sim peb siab; yog li ntawd, koj thiaj sim peb ib yam li nchuav nyiaj hauv qhovcub.

¹¹Koj cia peb mus mag luag lub vojhlua thiab koj muab lub nra hnyav tso rau nraum peb nraubqaum.

¹²Koj cia peb cov yeebncuab tsuj peb, peb thiaj raug hluavtaws kub thiab dej nyab, tiamsis nimno koj coj peb rov los nyob rau qhov chaw kaj siab.

¹³Kuv yuav coj khoom tuaj hlawv fij rau hauv koj lub tsev, kuv yuav muab khoom fij rau koj raws li kuv tau coglus tseg lawm.

¹⁴Kuv yuav muab rau koj raws li kuv tau hais thaum kuv raug kev txomnyem.

¹⁵Kuv yuav muab yaj tuaj tua hlawv fij rau saum lub thaj, kuv yuav muab nyuj thiab tshis tuaj tua hlawv fij, thiab tej pa yuav ncho mus rau saum nruab ntug.

¹⁶Cov neeg uas hwm Vajtswv, nej cia li los ntawm no, kuv yuav piav tej uas tus TSWV hais rau kuv lawm rau nej mloog.

¹⁷Kuv quaj thov nws pab, kuv qhuas nws ntawm lub suab hu nkauj.

¹⁸Yog kuv tsis lees kuv tej kev txhaum, tus TSWV yuav tsis mloog kuv tej lus thov.

¹⁹Tiamsis Vajtswv yeej tig pobntseg mloog kuv tej lus; nws yeej hnov kuv tej lus thov.

²⁰Kuv qhuas Vajtswv, rau qhov nws tsis tau muab kuv tej lus thov tso tseg, thiab tsis tau rho nws txojkev hlub uas tsis paub kawg ntawm kuv mus.