Read Hmong Daw Phau Ntawv Nkauj 68 Bible Online

Phau Ntawv Nkauj 68 - Hmong Daw bible

Phau Ntawv Nkauj 68

¹Vajtswv sawv tsees ua rau nws cov yeebncuab khiav ri sua. Cov neeg uas ntxub Vajtswv yuav swb thiab khiav tsis yeej ua nws ntej.

²Vajtswv ntiab lawv tawm ib yam li cua ntsawj tej pa taws, thiab ib yam li hluavtaws txhiab ciab ntab yaj; yog li ntawd, cov neeg siab phem yuav ploj ntawm Vajtswv lub xubntiag mus.

³Tiamsis cov neeg ncaj ncees txaus siab thiab zoo siab ntawm Vajtswv xubntiag, lawv xyivfab thiab zoo siab.

⁴Hu nkauj qhuas Vajtswv, hu nkauj qhuas nws lub npe, kho kev tos tus uas caij rawv tauv huab los. Nws lub npe yog tus TSWV, cia li zoo siab hlo nyob ntawm nws lub xubntiag.

⁵Vajtswv tus uas nyob hauv lub Tuamtsev dawbhuv, nws tu cov menyuam ntsuag thiab tsomkwm cov pojntsuam.

⁶Nws pub cov neeg txomnyem muaj vaj muaj tsev nyob, thiab nws tso cov neeg raug txim tawm mus nyob ywj siab, tiamsis cov neeg ntxeev siab yuav tau nyob hauv lub tebchaws uas qhuav nkig nkuav.

⁷Vajtswv, thaum koj coj koj haivneeg, thiab thaum koj tawm mus hla tiaj suabpuam

⁸lub ntiajteb ua zog koog thiab lub ntuj tso nag laub lug los, rau qhov Vajtswv los rau saum lub roob Xinais, cov Yixalayees tus Vajtswv tabtom nqis los lawm.

⁹Vajtswv, koj tso tuamtsam nag los thiab ua rau koj lub tebchaws uas tsuag tas lawm kom rov ua tau noj,

¹⁰Koj haivneeg los nyob hauv lub tebchaws ntawd, koj ua zoo koj thiaj npaj pub rau cov pluag.

¹¹Tus TSWV yog tus hais tej lus no thiab muaj coob leej coj mus qhia:

¹²“Cov vajntxwv thiab lawv tej tubrog khiav mus lawm!” Cov pojniam uas nyob hauv tsev muab tej khoom uas txeeb tau los sib faib:

¹³tej tis nquab puavleej vuam nyiaj thoob plaws, thiab tej plaub tis puavleej vuam tej tseem kub. (Vim li cas hnub uas tabtom ntaus rog nej qee leej mus nkaum hauv tej nkuaj yaj?)

¹⁴Thaum Vajtswv tus uas muaj hwjchim loj kawg nkaus raws cov vajntxwv tawg ri sua, nws ua kom muaj daus los rau saum Roob Zalemoos.

¹⁵Lub roob hauv lub nroog Npasas yog lub roob uas loj siab, lub roob ntawd muaj ntau lub ncov.

¹⁶Tej ncov roob loj siab, vim li cas koj khib siab thiab saib tsis taus lub roob uas Vajtswv xaiv ua nws qhov chaw nyob? Tus TSWV yeej yuav nyob saud mus ibtxhis li.

¹⁷Nws cov tsheb nees ntau txhiab ntau vam lub, nrog tus TSWV nqis saum roob Xinais los rau hauv nws qhov chaw dawbhuv.

¹⁸Thaum koj mus rau saum ntuj uas yog qhov chaw siab, koj coj cov neeg uas raug luag ntes coob leej nrog koj mus, koj tau txais tej khoom pub ntawm tej neeg, thiab txawm yog cov neeg ntxeev siab rau koj los muab khoom pub rau koj. Tus TSWV uas yog Vajtswv yuav nyob saud.

¹⁹Cia li qhuas tus TSWV, nws yog tus uas ris peb lub nra ib hnub dhau ib hnub, nws yog Vajtswv tus uas cawm peb dim ntag.

²⁰Peb tus Vajtswv yog tus Vajtswv uas cawm peb dim, nws yog tus Vajtswv, peb tus TSWV uas cawm peb dim ntawm txojkev tuag.

²¹Vajtswv yeej yuav muab nws cov yeebncuab taubhau tsoo kom tawg, lawv yog cov neeg uas tsis kam thau hau tawm ntawm lawv tej kev txhaum li.

²²Tus TSWV hais tias, “Kuv yuav coj nej cov yeebncuab tawm hauv Npasas rov qab los, kuv yuav coj lawv tawm hauv qab thu hiavtxwv qhov uas tob tshaj plaws los;

²³yog li ntawd, nej thiaj raus kotaw rau hauv yeebncuab cov ntshav, thiab nej tej dev thiaj tau yaim tej ntshav ntawd.”

²⁴Vajtswv, sawvdaws puavleej pom koj cov neeg mus ua tsheej pab, Vajtswv uas yog kuv tus vajntxwv, koj cov neeg mus ua tsheej kev rau hauv koj lub tuamtsev.

²⁵Cov hu nkauj mus ua ntej, cov ntaus nkauj nogncas mus ua qab, thiab cov hluas nkauj uas ntaus nruas tuaj nruab nrab.

²⁶“Nws haivneeg uas tuaj sablaj ua ke cia li qhuas Vajtswv; tagnrho Yakhauj cov xeebntxwv cia li qhuas tus TSWV!”

²⁷Npeenyamees yog cov uas xub los, lawv yog xeem tsawg tshaj plaws, ces cov Yudas tej thawjcoj thiaj los nrog lawv pab ntawd, cov Xenpuloos thiab cov Nathalis tej thawjcoj thiaj tawm raws qab.

²⁸Vajtswv, qhia koj lub hwjchim rau peb, lub hwjchim uas koj tau siv tuaj peb tog.

²⁹Rau qhov koj lub Tuamtsev nyob hauv lub nroog Yeluxalees, cov vajntxwv thiaj nqa khoom tuaj pub rau koj.

³⁰Cia li cem cov tsiaj qus uas nkaum tom tej hav tauj npaig, cia li cem cov heev nyuj uas nyob nrog cov menyuam nyuj uas yog txhua haivneeg, mus txog thaum lawv qhau cev pe thiab muab nyiaj fij rau koj. Thov muab cov neeg uas nyiam ua tsov ua rog ntiab tawm mus!

³¹Cov xeebcom yuav tuaj nram tebchaws Iziv tuaj, cov neeg Ethi-aupias yuav tsa lawv tej tes thov Vajtswv.

³²Txhua lub tebchaws hauv ntiajteb no, cia li hu nkauj qhuas Vajtswv, hu nkauj txhawb nqa tus TSWV,

³³qhuas tus uas nyob saum nruab ntug uas yog lub ntuj uas ibtxwm nyob thaum ub los. Cia li mloog nws lub suab nthe nyooj laws uas muaj hwjchim.

³⁴Tshaj tawm Vajtswv lub hwjchim, nws lub koob meej nrov ncha thoob plaws haivneeg Yixalayees, nws lub hwjchim puv nkaus saum nruab ntug.

³⁵Vajtswv tus uas txaus ntshai nyob hauv nws lub tuamtsev uas yog cov Yixalayees tus Vajtswv! Nws muab lub zog loj zog nchav thiab lub hwjchim pub rau nws haivneeg. Cia li qhuas Vajtswv!