Read Hmong Daw Phau Ntawv Nkauj 71 Bible Online

Phau Ntawv Nkauj 71 - Hmong Daw bible

Phau Ntawv Nkauj 71

¹Tus TSWV, kuv los cuag koj, thov koj ua tus tsomkwm kuv, thov tsis txhob pub kuv swb luag ib zaug li!

²Rau qhov koj yog tus ncaj ncees, thov pab kuv thiab cawm kom kuv dim. Thov mloog kuv tej lus thov thiab cawm kuv lauj!

³Thov kom koj yog kuv lub chaw nkaum thiab ua lub chaw fajxwm uas tiv thaiv kuv, koj yog kuv qhov chaw cawm siav thiab tiv thaiv kuv.

⁴Kuv tus Vajtswv, thov cawm kuv dim ntawm cov neeg siab phem, dim ntawm cov neeg limhiam thiab cov neeg ua phem ua qias.

⁵Vajtswv tus kav txhua tsav yam, kuv muab kuv txojkev cia siab tso plhuav rau koj, kuv yeej ibtxwm cia siab rau koj thaum kuv tseem hluas los lawm.

⁶Kuv cia siab rau koj tas kuv simneej, koj yeej tsomkwm kuv txij thaum yug kuv poob nthav los lawm. Kuv yuav niaj hnub qhuas koj.

⁷Kuv lub neej twb ua yam ntxwv rau coob leej xyaum, rau qhov koj yog kuv lub chaw nkaum uas ruaj khov.

⁸Kuv qhuas koj ib hnub tsaus ntuj thiab piav txog koj lub tshwjchim.

⁹Txawm yog tamsim no kuv laus lawm los thov koj tsis txhob tso kuv tseg, tamsim no kuv qaug zog heev los thov koj nco ntsoov kuv.

¹⁰Kuv cov yeebncuab xav nrhiav kuv tua povtseg, lawv sib tham thiab tuav tswvyim tawmtsam kuv.

¹¹Lawv hais tias, “Vajtswv twb tso nws tseg lawm, cia li mus soj nws qab thiab ntes kom tau nws, yeej tsis muaj leejtwg cawm nws hlo li.”

¹²Vajtswv, thov tsis txhob nyob nrug deb ntawm kuv; kuv tus Vajtswv, koj cia li maj nroos los pab kuv lauj!

¹³Thov kom cov neeg uas tuaj tua kuv cia li swb thiab raug kev puastsuaj. Thov kom cov neeg uas pheej nrhiav kev ua kom kuv raug mob cia li txajmuag thiab poob ntsejmuag.

¹⁴Kuv yuav niaj hnub cia siab rau koj, kuv yuav qhuas koj mus tsis tso tseg li.

¹⁵Kuv qhia koj lub siab dawb siab zoo rau luag paub, kuv yuav niaj hnub qhia koj txojkev cawm dim, txawm yog kuv paub tsis txhua los kuv tseem yuav qhia.

¹⁶Tus TSWV uas kav ib puas tsav yam, kuv yuav qhuas koj lub hwjchim, kuv yuav piav koj txojkev ua siab dawb siab zoo nkaus xwb.

¹⁷Koj yeej ibtxwm qhia kuv thaum kuv tseem hluas los, thiab kuv tseem piav koj tej haujlwm uas zoo kawg nkaus los txog niaj hnub no.

¹⁸Vajtswv, nimno kuv laus thiab kuv tej plaubhau twb dawb tag lawm, thov koj tsis txhob tso kuv tseg.

¹⁹Vajtswv, koj txojkev ncaj ncees siab nto ntuj plaws. Koj tau ua ntau yam txujci tseemceeb los lawm, yeej tsis muaj ib tug zoo cuag koj li lawm.

²⁰Koj tso kev nyuaj siab ntxhov plawv thiab kev txomnyem los rau kuv, tiamsis koj yuav txhawb kuv lub zog dua ntxiv, koj yuav pab kom kuv dim ntawm txojkev tuag rov qab los.

²¹Koj yuav tsa kuv ua tus muaj hwjchim loj dua qhov qub, koj yuav nplig kuv siab dua ib zaug ntxiv.

²²Kuv yuav ntaus nkauj nogncas qhuas koj; kuv tus Vajtswv, kuv yuav qhuas koj txojkev ncaj ncees. Cov Yixalayees tus Vajtswv uas Dawbhuv, kuv yuav ntaus nkauj nogncas hu nkauj qhuas koj.

²³Thaum kuv ntaus nkauj nogncas, kuv yuav hu nkauj zoo siab, kuv yuav hu nkauj kawg kuv lub siab lub ntsws, rau qhov koj tau cawm kuv dim.

²⁴Kuv yuav piav koj txojkev ncaj ncees tas hnub, rau qhov cov neeg uas pheej nrhiav kev ua kom kuv raug kev txomnyem twb swb thiab txajmuag kawg li lawm.