Read Hmong Daw Phau Ntawv Nkauj 76 Bible Online

Phau Ntawv Nkauj 76 - Hmong Daw bible

Phau Ntawv Nkauj 76

¹Cov Yudas yeej ibtxwm paub Vajtswv zoo; thiab cov Yixalayees yeej ibtxwm qhuas nws lub npe.

²Vajtswv lub tsev nyob hauv lub nroog Yeluxalees; nws nyob saum lub Roob Xi-oos.

³Nyob qhov ntawd, Vajtswv lov yeebncuab tej xub hneevnti, tej thaiv hniav ntaj, tej ntaj thiab tej cuabyeej ua rog.

⁴Vajtswv, koj lub tshwjchim ci ntsa iab! Thaum koj nqis saum tej roob uas koj tua yeej koj cov yeebncuab los koj muaj hwvxyeej kawg li.

⁵Cov yeebncuab tej tubrog uas siab tawv tshaj plaws tau tuaj huab luag tej khoom los yeej tuag huv tibsi lawm; lawv lub zog thiab tej peevxwm pab tsis tau lawv li.

⁶Yakhauj tus Vajtswv, thaum koj tawmtsam cov yeebncuab, ua rau lawv cov tubrog caij nees thiab lawv tej nees tuag tas.

⁷Tiamsis tus TSWV, txhia leej txhia tus yeej ntshai koj. Thaum koj chim tsis muaj leejtwg yuav muaj cuabkav sawv tabmeeg koj.

⁸Koj qhia koj txojkev txiav txim saum ntuj los rau sawvdaws paub; neeg ntiajteb ntshai koj thiab nyob ntsiag to;

⁹thaum koj sawv tsees txiav txim, koj cawm tagnrho cov neeg uas raug luag tsimtxom hauv ntiajteb no.

¹⁰Neeg txojkev chim yuav hloov ua kev qhuas Vajtswv; cov neeg uas seem tuag hauv tshavrog los yuav npaj kom muaj rooj noj rooj haus zoo siab ua koj tsaug.

¹¹Cia li muab yam uas koj tau coglus rau tus TSWV uas yog koj tus Vajtswv lawm rau nws; txhua haivneeg uas nyob ze, cia li nqa nej tej khoom tuaj pub rau nws. Vajtswv ua rau neeg hwm nws;

¹²Vajtswv muab tej vajntxwv cov tub uas khavtheeb txo hwjchim, thiab ua kom cov vajntxwv uas muaj hwjchim ntshai kawg li.