Read Hmong Daw Phau Ntawv Nkauj 77 Bible Online

Phau Ntawv Nkauj 77 - Hmong Daw bible

Phau Ntawv Nkauj 77

¹Kuv tsa suab hlo quaj rau Vajtswv; kuv tsa suab hlo quaj rau Vajtswv, thiab nws hnov kuv lub suab quaj.

²Thaum kuv muaj kev ntxov siab kuv thov tus TSWV; kuv tsa tes thov Vajtswv ib hmos kaj ntug plaws, tiamsis kuv tseem tsis muaj kev kaj siab li.

³Thaum kuv xav txog Vajtswv, kuv ntxov siab kawg li; thaum kuv lub siab xav txog Vajtswv, kuv qaug zog heev.

⁴Nws tsis pub kuv tsaug zog ib hmos kaj ntug plaws; kuv ntxhov siab heev kuv hais tsis taus lus li.

⁵Kuv xav txog lub caij lub nyoog uas dhau mus zuj zus, thiab nco txog ntau xyoo uas twb dhau los tau ntev lawm.

⁶Kuv xav tsheej tag hmo; kuv lub siab hais tujtaws li no rau kuv:

⁷“Tus TSWV txawm tsis lees yuav peb li los? Nws txawm yuav tsis txaus siab rau peb ntxiv li lawm los?

⁸Vajtswv tso tseg tsis hlub peb lawm los? Nws tej lus cog tseg txawm yuav tsis tiav li los?

⁹Puas yog Vajtswv tsis nco qab hlub peb lawm? Puas yog nws txojkev chim hloov txojkev hlub chaw lawm?”

¹⁰Kuv hais tias, “Yam uas mob kuv siab tshaj plaws zoo li Vajtswv txawm tsis muaj hwjchim li lawm.”

¹¹Tus TSWV, kuv yuav nco ntsoov koj tej haujlwm uas tseemceeb; kuv yuav rov nco txog tej txujci tseemceeb uas koj ua yav tas los lawm.

¹²Kuv yuav xav txog txhua yam uas koj tau ua tas los lawm; kuv yuav ua tib zoo xav txog koj tej haujlwm uas tseemceeb.

¹³Vajtswv, txhua yam uas koj ua, yeej yog yam dawbhuv; tsis muaj ib tug vajtswv twg uas muaj hwjchim cuag koj.

¹⁴Koj yog tus Vajtswv uas ua tau tej txujci tseemceeb; koj qhia rau ntau haivneeg pom koj lub hwjchim.

¹⁵Koj tau siv koj lub hwjchim cawm koj haivneeg uas yog Yakhauj thiab Yauxej nkawd cov xeebntxwv.

¹⁶Vajtswv, thaum tej dej pom dheev koj, lawv ntshai koj, thiab hiavtxwv qhov tob tob los yeej ntshai koj tshee hnyo.

¹⁷Tej huab ua kom muaj nag los; thiab xob nroo nrov nroo ntws saum nruab ntug tuaj; thiab xob laim cig liab vog rau txhua qhov.

¹⁸Koj ua rau xob nroo nrov nroo ntws tuaj, thiab xob laim cig liab vog thoob lub ntiajteb, ua rau lub ntiajteb ua zog koog.

¹⁹Koj mus kev saum tej nthwv dej uas ntas nphau nphwv; koj tshais ruam hla pes hlo tej dej hiavtxwv tob, tiamsis tsis pom koj tus neevtaw tsuj qhov twg li.

²⁰Koj coj koj haivneeg kev ib yam li tus tswv yug yaj coj pab yaj uas yog Aloos thiab Mauxes nkawd ua ob tug coj.