Read Hmong Daw Phau Ntawv Nkauj 78 Bible Online

Phau Ntawv Nkauj 78 - Hmong Daw bible

Phau Ntawv Nkauj 78

¹Kuv haivneeg, nej cia li mloog kuv tej lus qhia, thiab ua tib zoo mloog tej lus uas kuv hais.

²Kuv yuav siv tej lus txawj lus ntse hais, thiab ua tib zoo qhia tej uas yav tas los tsis muaj neeg paub,

³tej ntawd yog yam uas peb tau hnov thiab paub, yog tej uas peb cov yawgkoob tau qhia peb lawm.

⁴Peb yuav tsis muab tej ntawd zais tsis qhia rau peb tej menyuam; peb yuav qhia tus TSWV lub hwjchim thiab nws tes haujlwm uas tseemceeb ib tiam dhau ib tiam thiab tej txujci uas nws tau ua tas los lawm.

⁵Vajtswv muab kevcai cob rau cov Yixalayees; thiab muab kaum nqe kevcai cob rau Yakhauj cov xeebntxwv. Nws samhwm kom peb cov yawgkoob muab nws tej kevcai qhia lawv cov menyuam,

⁶kom tej xeebntxwv yav tom ntej thiaj tau tej ntawd los rau lawv kawm, thiab muab qhia rau lawv cov menyuam mus ntxiv.

⁷Ua li no lawv thiaj yuav cia siab rau Vajtswv thiab nco ntsoov tej haujlwm uas nws tau ua los lawm, thiab niaj hnub coj raws li Vajtswv tej lus samhwm.

⁸Lawv yuav tsum tsis txhob coj li lawv cov yawgkoob uas yog neeg ntxeev siab thiab tsis mloog lus, lawv txojkev cia siab rau Vajtswv tsis ruaj tsis khov thiab lawv tsis muab siab npuab Vajtswv.

⁹Cov Efalayees twb muaj hneevnti thiab xubvos, los tseem cia li khiav hauv tshavrog mus lawm thiab.

¹⁰Lawv tsis ceev Vajtswv tej lus cog tseg; lawv tsis hwm thiab ua raws li Vajtswv txoj kevcai.

¹¹Lawv tsis nco qab txhua yam uas Vajtswv tau ua, thiab tej txujci tseemceeb uas nws ua rau lawv pom lawm.

¹²Vajtswv ua tej txujci ntawd rau lawv cov yawgkoob pom, thaum lawv taug kev los txog ntawm lub tiaj Xau-as hauv tebchaws Iziv.

¹³Vajtswv ua rau dej hiavtxwv faib hlo rau ob sab thiab coj lawv mus dhau plaws rau sab tim ub; Vajtswv ua rau dej sawv ntseg zoo li tej phabntsa.

¹⁴Thaum nruab hnub nws ua ib tauv huab roos lawv, thiab hmo ntuj nws ua ib tug nplaim hluavtaws cig rau lawv pom kev.

¹⁵Nyob ntawm tiaj suabpuam nws ua rau phab pobzeb tawg txua, thiab muaj dej txhawv hauv qhov uas tob heev los rau lawv haus.

¹⁶Nws ua rau dej txhawv hauv qhov pobzeb tuaj, thiab ntws ib yam li tus dej.

¹⁷Tiamsis lawv pheej ua txhaum rau Vajtswv tsis tseg li, thiab thaum nyob ntawm tiaj suabpuam, lawv tau ntxeev siab rau tus uas muaj hwjchim loj kawg nkaus.

¹⁸Lawv txhob txwm sim Vajtswv siab thiab thov kom Vajtswv tso mov los rau lawv.

¹⁹Lawv hais lus twm Vajtswv tias, “Vajtswv puas muaj cuabkav muab tau mov rau peb noj nyob ntawm tiaj suabpuam no?

²⁰Yeej muaj tseeb, Vajtswv ntaus pobzeb tawg txua dej txhawv ntws laub lug los; tiamsis nws puas muaj cuabkav muab tau mov thiab nqaij rau peb noj?”

²¹Thaum tus TSWV hnov lawv hais li ntawd, nws chim heev rau lawv; nws thiaj ua kom muaj nplaim hluavtaws tuaj kub nws haivneeg, thiab nws txojkev chim tau tawmtsam lawv,

²²rau qhov lawv tsis ntseeg Vajtswv, thiab tsis ntseeg hais tias nws muaj peevxwm cawm tau lawv dim li.

²³Tiamsis nws hais rau lub ntuj uas nyob saud, thiab samhwm kom rooj ntug qhib;

²⁴nws tso mov saum ntuj los rau lawv, yog tso manas saum ntuj los rau lawv noj.

²⁵Yog li ntawd, lawv thiaj tau noj cov timtswv ceebtsheej tej mov, thiab Vajtswv muab txhua yam uas lawv xav tau rau lawv.

²⁶Vajtswv tseem ua kom cov cua sab hnubtuaj ntsawj tuaj, thiab nws siv nws lub hwjchim ua kom cov cua sab qabteb ntsawj tuaj;

²⁷thiab nws tso noog los rau nws haivneeg noj, cov noog ntawd ntau ib yam li tej suabzeb ntawm ntug hiavtxwv;

²⁸cov noog ntawd los puv rau hauv lub plawv yeej thiab ibncig tej tsevntaub uas lawv nyob.

²⁹Yog li ntawd, cov Yixalayees thiaj muaj nqaij noj txaus lawv siab; Vajtswv tau muab txhua yam uas lawv xav tau rau lawv.

³⁰Txawm yog lawv twb npuav rawv mov hauv qhovncauj, los lawv tseem pheej tsis txaus siab li,

³¹thaum ntawd Vajtswv chim kawg rau lawv, Vajtswv thiaj tua lawv cov neeg uas muaj zog heev, thiab cov Yixalayees tej tub hluas uas zoo heev povtseg.

³²Txawm yog twb muaj tej no los lawv tseem ua txhaum qees; txawm yog nws ua ntau yam txujci rau lawv pom los lawv yeej tsis ntseeg nws li.

³³Yog li ntawd, Vajtswv thiaj ua rau lawv txojsia yaj ntshis mus ib yam li ua pa, thiab tib ntsais muag xwb lawv lub neej raug puastsuaj tas.

³⁴Thaum Vajtswv tua lawv ibtxhia lawm, cov uas seem thiaj rov los cuag nws; lawv thiaj thov Vajtswv thiab hloov dua siab tshiab.

³⁵Lawv rov nco txog hais tias Vajtswv thiaj yog tus uas tiv thaiv lawv, thiab tus muaj Hwjchim Loj kawg nkaus yog tus uas tau los pab lawv.

³⁶Tiamsis tej lus lawv hais ntawd, yog lus dag xwb; tsis muaj ib los uas yog lus tseeb li.

³⁷Lawv tsis muab siab npuab Vajtswv; lawv tsis ua siab ncaj rau Vajtswv tej lus uas cog tseg rau lawv.

³⁸Tiamsis Vajtswv tseem hlub thiab tshua nws haivneeg. Nws zam lawv tej kev txhaum thiab tsis ua kom lawv puastsuaj. Muaj ntau zaus Vajtswv tau thim nws txojkev chim thiab cheem nws txojkev npautaws.

³⁹Vajtswv yeej nco ntsoov hais tias lawv tsuas yog neeg xwb, lawv zoo ib yam li nthwv cua uas ntsawj los thiab twb dhau mus lawm.

⁴⁰Nyob ntawm tiaj suabpuam lawv pheej ntxeev siab rau Vajtswv thiab lawv tau ua rau Vajtswv tu siab heev.

⁴¹Lawv pheej sim Vajtswv siab ib zaug tas ib zaug tuaj; thiab ua rau cov Yixalayees tus Vajtswv uas Dawbhuv chim kawg li.

⁴²Lawv tsis nco qab Vajtswv lub hwjchim loj, thiab hnub uas nws cawm lawv dim ntawm lawv cov yeebncuab txhais tes,

⁴³thiab siv nws lub hwjchim loj ua tej txujci tseemceeb rau lawv pom ntawm lub tiaj nrag Xau-as hauv tebchaws Iziv.

⁴⁴Vajtswv muab tej dej hloov ua ntshav, thiab ua rau cov neeg Iziv tsis tau dej haus li.

⁴⁵Nws tso yoov ya los puv nkaus txhua qhov tsimtxom cov Iziv, thiab tso qav los ua rau lawv lub tebchaws puastsuaj.

⁴⁶Thiab tso kooj txomfav los noj lawv tej qoobloo hauv lawv tej liaj tej teb puastsuaj tas.

⁴⁷Nws tseem tso lawg los ntaus lawv tej txiv hmab, thiab tso te los tua lawv tej txiv ncuavpias tuag tas.

⁴⁸Nws tso lawg los ntaus lawv tej nyuj, thiab tso xob laim tua lawv tej yaj tej tshis tuag tas huv tibsi.

⁴⁹Nws tso nws txojkev chim uas nruj tsiv los rau lawv, ua rau lawv ntxhov siab kawg; qhov ntawd yog tso ib pab timtswv ceebtsheej coj txojkev tuag los rau lawv.

⁵⁰Vajtswv yeej tsis cheem nws txojkev chim lossis tsis txuag lawv siav li, tiamsis nws tso kab mob aws los rau lawv tuag tas.

⁵¹Nws tua cov Iziv txhua yim tus tub hlob tuag coob heev.

⁵²Ces nws coj nws haivneeg tawm los ib yam li tus tswv yug yaj, thiab coj lawv kev los hla tiaj suabpuam.

⁵³Nws coj lawv los kaj siab lug, thiab tsis ntshai dabtsi li; tiamsis dej hiavtxwv nphau nphwv los npog lawv cov yeebncuab.

⁵⁴Nws coj lawv los rau hauv nws lub tebchaws dawbhuv, thiab los nyob saum tej roob uas nws ntaus yeej lawm.

⁵⁵Nws muab lwm haivneeg ntiab tawm khiav thaum nws coj nws haivneeg los nyob; nws muab lub tebchaws faib rau txhua xeem Yixalayees thiab muab lawv tej vaj tej tsev rau nws haivneeg nyob.

⁵⁶Tiamsis lawv tseem ntxeev siab rau Vajtswv tus uas muaj hwjchim loj kawg nkaus, thiab lawv pheej sim nws siab tsis tseg. Lawv tsis mloog Vajtswv tej lus samhwm li;

⁵⁷lawv ntxeev siab thiab tsis muab siab npuab Vajtswv, ib yam li lawv cov yawgkoob, lawv zoo li xibxub nkhaus uas siv tsis tau lawm.

⁵⁸Lawv ua rau Vajtswv chim kawg, vim lawv tej chaw teev dab, thiab lawv ua rau Vajtswv npautaws heev vim lawv pe mlom.

⁵⁹Vajtswv chim heev thaum nws pom tus mlom ntawd, yog li ntawd, nws thiaj tso nws haivneeg tseg tsis quavntsej lawv lawm.

⁶⁰Vajtswv muab nws lub tsevntaub hauv Silaus uas nws nrog peb nyob ntawd tso tseg lawm.

⁶¹Nws cia peb cov yeebncuab tuaj txeeb tau lub Phijxab uas ntim Vajtswv tej uas cog tseg, yog lub cim ntawm Vajtswv lub hwjchim thiab lub tshwjchim uas ci ntsa iab.

⁶²Nws chim heev rau nws haivneeg, nws thiaj cia lawv cov yeebncuab tuaj tua lawv.

⁶³Lawv cov tub hluas tuag tas rau hauv tshavrog, tsis muaj leejtwg yuav lawv tej txhais li.

⁶⁴Cov povthawj raug luag tua tuag tas, thiab luag tsis pub lawv cov pojniam quaj nyiav li.

⁶⁵Thaum kawg tus TSWV thiaj sawv tsees ib yam li tus uas tsim nruab dab ntub, nws zoo ib yam li tug txivneej uas haus cawv ua rau nws muaj zog.

⁶⁶Nws ua rau nws cov yeebncuab swb kiag, thiab thim plhawv rov qab poob ntsejmuag mus ibtxhis li lawm.

⁶⁷Tiamsis nws tsis lees paub Yauxej cov xeebntxwv, Vajtswv tsis xaiv xeem Efalayees;

⁶⁸tiamsis Vajtswv xaiv xeem Yudas, thiab lub Roob Xi-oos uas nws hlub tshaj plaws.

⁶⁹Nws tsim nws lub Tuamtsev zoo li nws lub tsev uas nyob saum ntuj; nws ua lub tsev ntawd ruaj ib yam li lub ntiajteb uas nyob ruaj khov mus ibtxhis.

⁷⁰Nws xaiv Daviv uas yog nws tus tubtxib; nws coj Daviv tawm hauv tshav zaub

⁷¹qhov chaw uas Daviv zov Daviv pab yaj los, thiab muab Daviv tsa ua vajntxwv kav cov Yixalayees, Daviv yog tus tub yug yaj uas saib Vajtswv haivneeg.

⁷²Daviv muaj lub siab dawb paug saib xyuas lawv, thiab nws muaj tswvyim zoo coj tau lawv.