Read Hmong Daw Phau Ntawv Nkauj 80 Bible Online

Phau Ntawv Nkauj 80 - Hmong Daw bible

Phau Ntawv Nkauj 80

¹Cov Yixalayees tus Tswv yug yaj, thov koj mloog peb tej lus thov, tus thawj uas coj koj pab yaj, thov mloog peb lub suab hu lauj! Koj cia li mus zaum saum lub zwmtxwv saum ob tug qhelunpees.

²Thov qhia koj rau xeem Efalayees, xeem Npeenyamees thiab xeem Manaxes. Thov qhia koj lub hwjchim rau peb thiab los cawm peb!

³Vajtswv, thov coj peb rov qab los! Thov qhia koj txojkev hlub rau peb, peb thiaj li yuav dim.

⁴Tus TSWV uas yog Vajtswv tus muaj hwjchim loj kawg nkaus, koj tseem yuav chim rau koj haivneeg tej lus thov ntev npaum li cas thiab?

⁵Koj muab cov mov uas yog kev quaj ntsuag rau peb noj, thiab muab lub khob uas yog cov kua muag rau peb haus.

⁶Koj cia cov neeg uas nyob ibncig peb tuaj tua peb lub tebchaws; peb cov yeebncuab tuaj txob thuam peb kawg li.

⁷Vajtswv tus muaj hwjchim loj kawg nkaus, thov coj peb rov qab los! Thov qhia koj txojkev hlub rau peb, peb thiaj yuav dim!

⁸Koj muab lwm haivneeg ntiab khiav mus; thiab koj coj txiv hmab nram tebchaws Iziv los cog rau hauv lub tebchaws no.

⁹Koj tu thaj chaw du dais rau cov txiv hmab loj hlob, nrhau cag mus tob thiab hlav mus puv nkaus lub tebchaws.

¹⁰Nws ua duab ntxoo tuaj roos tej hauv roob; nws tej ceg ua duab ntxoo roos tagnrho tej ntoo ciab uas loj.

¹¹Nws tej ceg nthuav mus ti nkaus ntawm ntug Hiavtxwv Meditelanes, thiab nthuav mus ti nkaus rau pem tus Dej Efalates.

¹²Vim li cas koj muab tus ntsa lajkab uas xov lub vaj ntawd rhuav lawm? Nimno txhua tus neeg uas dhau kev mus los thiaj nyiag tau tej txiv hmab ntawd;

¹³npuateb nkag los rau hauv lub vaj thiab tsuj tej txiv hmab tas, thiab tej tsiaj qus los muab noj tas dulug lawm.

¹⁴Vajtswv tus uas muaj hwjchim loj kawg nkaus, cia li rov qab los cuag peb! Thov koj tsa qhovmuag saum ntuj ceebtsheej tuaj saib peb; thov koj cia li los thiab cawm koj haivneeg!

¹⁵Thov koj cia li los thiab cawm tsob txiv hmab uas koj cog cia, tsob txiv hmab uas koj tu hlob mos nyoos.

¹⁶Peb cov yeebncuab muab tsob txiv hmab ntawd ntov thiab zes taws hlawv; thov koj cia li ntsia lawv thiab muab lawv ua kom puastsuaj tas!

¹⁷Thov koj tsomkwm thiab tiv thaiv haivneeg uas koj xaiv tseg, yog haivneeg uas koj tau pub kom muaj zog heev.

¹⁸Peb yuav tsis khiav tawm ntawm koj mus lawm; thov koj pab kom peb muaj sia nyob, peb yuav qhuas koj xwb.

¹⁹Tus TSWV uas yog Vajtswv tus muaj hwjchim loj kawg nkaus, thov coj peb rov qab los. Thov qhia koj txojkev hlub rau peb, peb thiaj yuav dim!