Read Hmong Daw Phau Ntawv Nkauj 81 Bible Online

Phau Ntawv Nkauj 81 - Hmong Daw bible

Phau Ntawv Nkauj 81

¹Cia li qw zoo siab rau Vajtswv tus uas tiv thaiv peb; cia li hu nkauj qhuas Yakhauj tus Vajtswv!

²Cia li pib ntaus nkauj nogncas thiab nruas npuaj; cia li tshuab raj thiab ntaus nkauj nogncas.

³Cia li tshuab xyu rau rooj noj rooj haus thaum hli xiab thiab thaum hli nra.

⁴Qhov no yog cov Yixalayees txoj kevcai, thiab yog cov lus uas Yakhauj tus Vajtswv tau samhwm kom ua li ntawd.

⁵Nws muab txoj kevcai no cob rau cov Yixalayees thaum uas nws tawmtsam lub tebchaws Iziv. Kuv hnov ib lub suab uas kuv tsis paub, lub suab ntawd hais tias,

⁶“Kuv tsaws lub nra hnyav uas nyob saum nej nraubqaum; kuv tso nej dim ntawm txojkev uas nqa tej thwvcib hnyav heev.

⁷Thaum nej raug kev txomnyem, nej hu txog kuv, kuv cawm nej dim. Kuv teb nej tej lus thov hauv cov nag xob nagcua uas kuv nyob tuaj. Kuv tau sim nej siab thaum nej tseem nyob ntawm lub qhovdej Melinpas.

⁸Kuv haivneeg, nej cia li mloog kuv tej lus ntuas; cov Yixalayees, kuv xav kom nej mloog kuv tej lus!

⁹Nej tsis txhob mus pe lwm tus vajtswv.

¹⁰Kuv yog tus TSWV uas yog nej tus Vajtswv, kuv coj nej khiav nram tebchaws Iziv los. Cia li rua ncauj kuv yuav pub mov rau nej noj.

¹¹“Tiamsis kuv haivneeg tsis mloog kuv tej lus; cov Yixalayees tsis hwm kuv li.

¹²Yog li ntawd, kuv thiaj cia lawv ua raws li lawv lub siab tawv, thiab ua raws li lawv lub siab xav.

¹³Kuv xav kom kuv haivneeg mloog kuv lus thiab xav kom lawv hwm kuv kawg li!

¹⁴Kuv yuav ceev nrooj mus ua kom lawv cov yeebncuab swb, thiab ua kom yeej tagnrho lawv cov yeebncuab.

¹⁵Cov neeg uas ntxub kuv yuav ntshai thiab txhos cuag ntua ntawm kuv xubntiag; thiab lawv yuav raug txim mus ibtxhis li.

¹⁶Tiamsis kuv yuav muab cov mov uas zoo tshaj plaws rau nej noj, thiab muab tej zib ntab uas nej txaus siab heev rau nej noj.”