Read Hmong Daw Phau Ntawv Nkauj 86 Bible Online

Phau Ntawv Nkauj 86 - Hmong Daw bible

Phau Ntawv Nkauj 86

¹Tus TSWV, thov koj mloog thiab teb kuv tej lus thov, vim kuv tas kev cia siab thiab qaug zog heev lawm.

²Thov cawm kom kuv dim ntawm txojkev tuag, rau qhov kuv yeej hwm koj; thov cawm kuv uas yog koj tus tubtxib, kuv cia siab ntsoov rau koj.

³Koj yog kuv tus Vajtswv, thov koj hlub kuv; kuv thov ib hnub tsaus ntuj ntais.

⁴Tus TSWV, thov pab kom koj tus tubtxib tau kev zoo siab, vim kuv tej lus thov twb tuaj txog koj lawm.

⁵Koj yeej ua zoo rau peb thiab zam peb lub txim, koj txojkev hlub uas tsis paub kawg muaj rau txhua tus uas thov koj.

⁶Tus TSWV, thov koj mloog kuv tej lus thov; mloog kuv lub suab quaj uas thov koj pab kuv.

⁷Thaum kuv muaj kev ntxhov siab kuv hu txog koj, koj yeej teb kuv tej lus thov.

⁸Tus TSWV, tsis muaj dua lwm tus vajtswv zoo cuag koj, tsis muaj leejtwg txawj ua tau tej txujci zoo li koj ua.

⁹Txhua haivneeg uas koj tau tsim yuav tuaj txhos caug pehawm koj; lawv yuav qhuas koj lub npe uas zoo kawg nkaus.

¹⁰Koj yog tus muaj hwjchim loj thiab ua tau tej txujci tseemceeb; koj tib leeg xwb thiaj yog Vajtswv.

¹¹Tus TSWV, thov koj qhia kom kuv paub ua raws li koj lub siab nyiam, kuv yuav hwm koj ntawm lub siab ncaj ncees; thov pub kom kuv muaj lub siab dawb paug pehawm koj.

¹²Tus TSWV uas yog kuv tus Vajtswv, kuv yuav qhuas koj lub npe kawg siab kawg ntsws; thiab kuv yuav tshaj tawm koj lub npe kom nrov ncha mus ibtxhis.

¹³Koj txojkev hlub muaj nyob mus tsis paub kawg li! Koj tau cawm kuv dim ntawm lub qhov tuag los.

¹⁴Vajtswv, cov neeg khavtheeb pheej tuaj tawmtsam kuv; cov neeg siab phem pheej nrhiav yuav muab kuv tua povtseg, cov neeg ntawd yog cov uas tsis quav ntsej koj li.

¹⁵Tiamsis tus TSWV, koj yog tus uas muaj kev hlub thiab yog tus Vajtswv uas muaj kev hlub tshua; koj ibtxwm muaj lub siab ntev, siab zoo thiab ua ncaj ncees.

¹⁶Thov koj tig los cuag kuv thiab hlub tshua kuv; thov txhawb kuv lub zog thiab cawm kuv; rau qhov kuv muaj lub siab dawb paug pehawm koj ib yam li koj tus tubtxib ua muab siab npuab koj.

¹⁷Tus TSWV, thov qhia koj txojkev ua siab dawb siab zoo rau kuv; cov neeg uas ntxub kuv yuav raug kev txajmuag, thaum lawv pom koj pub kuv muaj kev zoo siab thiab pab kuv.