Read Hmong Daw Phau Ntawv Nkauj 87 Bible Online

Phau Ntawv Nkauj 87 - Hmong Daw bible

Phau Ntawv Nkauj 87

¹Tus TSWV tsim nws lub nroog rau saum lub roob uas dawbhuv;

²Tus TSWV hlub lub nroog Yeluxalees tshaj lwm thaj chaw uas nyob hauv lub tebchaws Yixalayees.

³Vajtswv lub nroog, cia li ua tib zoo mloog tej lus zoo uas nws hais txog koj:

⁴“Thaum kuv suav tej haivneeg uas mloog kuv lus npe, kuv suav cov Iziv thiab cov Npanpiloos huv tibsi; cov Filitees, cov Tiles thiab cov Sudas, kuv yuav suav lawv npe nrog cov neeg hauv lub nrog Yeluxalees.”

⁵Lawv yuav hais tias txhua haivneeg uas nyob saum Roob Xi-oos, tus uas muaj Hwjchim Loj kawg nkaus yuav ua kom lub Roob Xi-oos nyob ruaj khov.

⁶Tus TSWV yuav sau cov neeg ntawd tej npe rau hauv ntawv khaws cia, thiab suav hais tias lawv puavleej yog neeg hauv lub nroog Yeluxalees.

⁷Lawv dhia seevcev thiab hu nkauj hais tias, “Xi-oos yog lub hauvpaus uas txhawv koob hmoov los rau peb sawvdaws.”