Read Hmong Daw Phau Ntawv Nkauj 89 Bible Online

Phau Ntawv Nkauj 89 - Hmong Daw bible

Phau Ntawv Nkauj 89

¹Tus TSWV, kuv yuav niaj hnub hu nkauj qhuas koj txojkev hlub uas tsis paub kawg; kuv yuav qhia koj txojkev ncaj ncees mus ibtxhis.

²Kuv paub hais tais, koj txojkev hlub yeej muaj nyob mus ibtxhis, thiab koj txojkev ncaj ncees nyob ruaj nrees ib yam li lub ntuj.

³Koj hais tias, “Kuv tau coglus nrog tus neeg uas kuv xaiv lawm; kuv tau coglus rau kuv tus tubtxib Daviv hais tias,

⁴‘Koj cajces yuav tau ua vajntxwv mus li; kuv yuav ceev koj lub zwmtxwv kom muaj nyob mus ibtxhis.’ ”

⁵Qaum ntuj hu nkauj qhuas tej txujci tseemceeb uas koj ua; tus TSWV, cov neeg dawbhuv yuav hu nkauj qhuas koj txojkev ncaj ncees!

⁶Tus TSWV, nyob saum ntuj yeej tsis muaj leejtwg zoo li koj; cov timtswv ceebtsheej tsis muaj ib tug yuav zoo npaum li koj;

⁷cov neeg dawbhuv txhua tus puavleej hwm koj; thiab sawv ntawm koj xubntiag hauv lub rooj sablaj.

⁸Tus TSWV uas yog Vajtswv tus uas muaj hwjchim loj kawg nkaus, tsis muaj lwm tus muaj hwjchim npaum li koj lawm; tus TSWV, koj yeej ncaj ncees rau txhua yam uas koj ua.

⁹Koj kav tagnrho tej hiavtxwv uas muaj zog; koj ua rau tej nthwv dej ntas ntawd tus thiab nyob ntsiag to.

¹⁰Koj muab Lahaj uas yog tus niag zaj tsuj nthi thiab muab tua kiag; koj siv koj lub zog loj zog nchav ua rau koj cov yeebncuab swb lawm.

¹¹Lub ntuj thiab lub ntiajteb yog koj tug; koj tsim txhua yam uas muaj nyob hauv lub ntiajteb no.

¹²Koj yog tus tsim sab qaumteb thiab sab qabteb; lub Roob Tanpaus thiab lub Roob Helemoos hu nkauj zoo siab qhuas koj.

¹³Ua li cas koj muaj hwjchim loj ua luaj! Ua li cas koj muaj zog loj zog nchav ua luaj li!

¹⁴Koj lub tebchaws cog ruaj khov rau ntawm txojkev ncaj ncees thiab kev tseeb, txhua yam uas koj ua qhia rau peb paub hais tias koj yog tus siab zoo thiab muaj kev hlub.

¹⁵Cov neeg uas hu nkauj qhuas koj thiab cov neeg uas ua lub neej nyob hauv qhov kaj ntawm koj txojkev ua siab dawb siab zoo, lawv muaj kev zoo siab heev.

¹⁶Vim muaj koj lawv thiaj zoo siab tas hnub; thiab lawv qhuas koj txojkev ua siab dawb siab zoo.

¹⁷Koj pab peb muaj yeej loj kawg li; vim koj txojkev hlub, koj thiaj pub peb kovyeej.

¹⁸Tus TSWV, koj xaiv tus uas tiv thaiv peb; koj yog cov Yixalayees tus Vajtswv Dawbhuv uas pub peb muaj vajntxwv.

¹⁹Tau ntev los lawm zaj yogtoog uas koj hais rau koj tus tubtxib uas muab siab npuab koj hais tias, “Kuv tau pab ib tug tubrog uas nto npe heev; kuv tau muab lub zwmtxwv cob rau tus uas kuv xaiv ntawm cov pejxeem los.

²⁰Kuv tau muab roj hliv rau saum kuv tus tubtxib Daviv taubhau thiab tsa nws ua vajntxwv.

²¹Kuv yuav txhawb nws lub zog mus li, kuv lub hwjchim yuav ua rau nws muaj zog heev.

²²Nws cov yeebncuab yuav kov tsis yeej nws; thiab cov neeg siab phem los yuav kov tsis yeej nws.

²³Kuv yuav tsuj ntiag nws cov yeebncuab thiab tua txhua tus uas ntxub nws.

²⁴Kuv yuav hlub nws thiab ua siab zoo rau nws; kuv yuav pab kom nws kovyeej luag mus li.

²⁵Kuv yuav nthuav nws lub tebchaws kom dav txij ntua ntawm Hiavtxwv Meditelanes mus txog ntua tus Dej Efalates.

²⁶Nws yuav hais rau kuv tias, ‘Koj yog kuv leej Txiv thiab yog kuv tus Vajtswv; koj yog lub pobzeb uas yog kuv Txojkev Cawm Dim.’

²⁷Kuv yuav tsa nws ua kuv tus tub hlob, nws yog tus vajntxwv uas muaj hwjchim loj dua lwm tus vajntxwv.

²⁸Kuv yuav ceev kuv tej lus cog tseg rau nws mus li, thiab tej uas kuv tau nrog nws sib coglus yuav nyob mus ibtxhis.

²⁹Nws lub zwmtxwv yuav nyob ruaj khov ib yam li lub ntuj; thiab nws cajces yuav ua vajntxwv mus li.

³⁰“Tiamsis yog nws cajces tsis hwm kuv tej kevcai, thiab tsis ua lub neej raws li kuv tej lus samhwm,

³¹thiab yog lawv tsis ceev kuv tej lus qhuab ntuas thiab tsis khaws kuv tej lus samhwm cia,

³²ces kuv yuav rau txim rau lawv vim lawv tej kev txhaum; kuv yuav ua kom lawv raug kev txomnyem vim tej kev txhaum uas lawv ua.

³³Txawm li cas los kuv yuav tsis tso txojkev hlub Daviv tseg, lossis yuav nco ntsoov tej lus uas kuv cog tseg rau nws lawm.

³⁴Kuv yuav tsis rhuav tej lus uas kuv cog tseg rau nws, lossis yuav tsis thim tej lus uas kuv cog tseg rau nws.

³⁵“Kuv tuav kuv lub npe uas dawbhuv coglus ib zaug xwb kav mus tas ibtxhis; kuv yuav tsis dag Daviv ib zaug li.

³⁶Nws yuav muaj xeebntxwv tsis tu mus li thiab yog tseem muaj lub hnub tawm tuaj, kuv yuav tsomkwm nws lub tebchaws mus li.

³⁷Nws lub tebchaws yuav nyob ruaj khov ib yam li lub hli, kuv ua tus timkhawv tseeb nyob saum nruab ntug.”

³⁸Tiamsis koj chim kawg rau tus vajntxwv uas koj tau xaiv tseg; koj tau tso nws tseg thiab cia nws nyob qhuav nquas cia.

³⁹Koj rhuav koj tej lus cog tseg rau koj tus tubtxib thiab muab nws lub kausmom kub pov rau hauv pas av.

⁴⁰Koj muab nws lub nroog tej ntsa yeej rhuav puas tas thiab cia nws tej chaw fajxwm pob puas tas.

⁴¹Cov neeg uas dua kev nyiag nws tej khoom tas; tej neeg zejzog puavleej luag nws plig.

⁴²Koj pub nws cov yeebncuab tua yeej nws lawm; koj ua rau nws cov yeebncuab muaj kev zoo siab.

⁴³Koj ua kom nws tej cuabyeej ua rog siv tsis tau thiab cia nws cov yeebncuab kovyeej nws.

⁴⁴Koj tau tshem nws tus cwj tawm ntawm nws mus, thiab muab nws lub zwmtxwv tsoo vau rau hauv av lawm.

⁴⁵Koj txiav nws lub hnubnyoog kom luv, thiab tsis pub kom nws tau ntsejmuag hlo li.

⁴⁶Tus TSWV, koj txawm yuav nraim peb mus ibtxhis li los? Koj txojkev chim uas kub li hluavtaws tseem yuav nyob ntev npaum li cas?

⁴⁷Nco ntsoov hais tias kuv txojsia luv heev, nco ntsoov hais tias koj tsim peb los ua neeg xwb.

⁴⁸Leejtwg thiaj yuav nyob ibtxhis tsis txawj tuag? Yuav ua li cas neeg thiaj khiav dim ntawm lub qhov ntxa?

⁴⁹Tus TSWV, koj txojkev hlub thaum ub dua qhov twg lawm? Tej lus uas koj cog tseg rau Daviv nyob qhov twg lawm?

⁵⁰Thov nco ntsoov kuv uas yog koj tus tubtxib, kuv raug luag thuam heev, kuv tiv tsis taus cov neeg siab phem tej lus tsawm foom li lawm.

⁵¹Tus TSWV, koj cov yeebncuab tau txob thuam tus vajntxwv uas koj xaiv! Nws mus txog qhov twg los luag pheej thuam nws.

⁵²Thov qhuas tus TSWV mus ibtxhis li! Amees! Amees!