Read Hmong Daw Phau Ntawv Nkauj 9 Bible Online

Phau Ntawv Nkauj 9 - Hmong Daw bible

Phau Ntawv Nkauj 9

¹Tus TSWV, kuv yuav ua koj tsaug kawg kuv lub siab; kuv yuav qhia txog tej txujci tseemceeb uas koj ua pab kuv lawm.

²Kuv yuav hu nkauj zoo siab vim muaj koj, kuv yuav hu nkauj qhuas koj uas yog Vajtswv tus muaj hwjchim loj kawg nkaus.

³Thaum koj tshwm plaws, kuv cov yeebncuab thim loo rov qab, lawv ntog pawglug thiab tuag tas lawm.

⁴Koj tuaj kuv tog thiab tsa kuv cai, koj zaum ntawm koj lub zwmtxwv txiav txim ncaj ncees.

⁵Koj rau txim rau cov neeg uas tsis hwm koj thiab rhuav tshem cov neeg ua phem ua qias, thiab yuav tsis muaj leejtwg nco txog lawv mus ibtxhis li lawm.

⁶Peb cov yeebncuab yuav ploj tas mus ibtxhis, koj muab lawv tej nroog rhuav puastsuaj tas, tsis tshuav ib qho ua chaw nco txog lawv li lawm.

⁷Tiamsis tus TSWV ua vajntxwv mus ibtxhis, nws twb teeb nws lub zwmtxwv ua qhov chaw txiav txim.

⁸Nws kav lub ntiajteb ntawm txojkev ncaj ncees; nws txiav txim ncaj rau txhua haivneeg

⁹Tus TSWV yog lub chaw rau cov neeg uas raug luag tsimtxom nkaum, thiab yog lub chaw kaj siab thaum raug kev nyuaj siab.

¹⁰Tus TSWV, txhua tus uas paub koj, lawv yeej cia siab rau koj; koj yeej tsis muab ib tug twg uas los cuag koj tso tseg li.

¹¹Cia li hu nkauj qhuas tus TSWV uas kav saum lub roob Xi-oos! Cia li qhia tej txujci uas nws ua rau txhua haivneeg paub!

¹²Vajtswv yeej nco ntsoov txhua tus uas tiv kev txomnyem; nws nco ntsoov lawv tej suab quaj, thiab nws rau txim rau cov neeg uas tsimtxom lawv.

¹³Tus TSWV, thov hlub kuv lauj! Thov tsa muag ntsia tej kev txomnyem uas kuv cov yeebncuab ua rau kuv. Tus TSWV, thov cawm kom kuv dim ntawm txojkev tuag,

¹⁴kuv thiaj muaj peevxwm mus sawv tabmeeg ntawm cov neeg hauv lub nroog Yeluxalees thiab qhia txhua yam uas kuv qhuas koj rau lawv mloog. Kuv yuav zoo siab heev vim koj cawm kuv dim.

¹⁵Cov neeg tsis ntseeg Vajtswv poob rau hauv lub qhov uas lawv khawb tseg lawm, lawv rov mag rooj nta npuj uas lawv cuab tseg.

¹⁶Tus TSWV qhia nws rau lawv paub ntawm txojkev txiav txim ncaj ncees, thiab cov neeg ua phem rov mag rooj nta npuj uas lawv cuab.

¹⁷Cov neeg siab phem yuav nkag tagnrho mus rau hauv tubtuag teb, cov ntawd yog cov uas tsis lees txais yuav Vajtswv.

¹⁸Cov neeg txomnyem yuav tsis raug luag saib tsis taus mus ntxiv lawm; cov neeg pluag uas tas kev cia siab yuav tsis raug kev tsimtxom mus ntxiv lawm.

¹⁹Tus TSWV, thov koj cia li los! Tsis txhob pub neeg kovyeej koj! Coj cov neeg uas tsis ntseeg los sawv tabmeeg koj thiab koj txiav txim rau lawv.

²⁰Tus TSWV, thov koj cia li ua kom lawv ntshai, thiab ua kom lawv paub hais tias lawv yog noobneej xwb.