Read Hmong Daw Phau Ntawv Nkauj 91 Bible Online

Phau Ntawv Nkauj 91 - Hmong Daw bible

Phau Ntawv Nkauj 91

¹Tus uas mus cawm siav ntawm tus TSWV thiab tus uas nyob hauv tus uas muaj Hwjchim Loj kawg nkaus txojkev tiv thaiv,

²mas tus ntawd thiaj hais tau rau tus TSWV hais tias, “Koj yog tus tiv thaiv thiab tsomkwm kuv. Koj yog kuv tus Vajtswv; kuv cia siab ntsoov rau koj.”

³Nws yuav tsis pub koj mag luag lub vojhlua, thiab nws yuav pab kom koj dim ntawm tej kab mob kev tuag.

⁴Nws yuav nthuav hlo nws ob phab tis los roos koj, nws yuav tsomkwm koj, koj yuav nyob tso siab plhuav; nws txojkev ncaj ncees yuav tsomkwm thiab tiv thaiv koj.

⁵Hmo ntuj los koj yuav tsis ntshai kev puastsuaj, lossis ntshai tej xub hneevnti uas luag tua nthaw nthav thaum nruab hnub,

⁶lossis tej kab mob uas los raug sawvdaws thaum hmo ntuj, lossis tej kev puastsuaj uas tuaj raug sawvdaws thaum nruab hnub.

⁷Txawm yog muaj neeg ib txhiab leej tuag nyob ntawm koj ib sab, thiab muaj ib vam leej tuag ibncig koj los yuav tsis muaj xwm dabtsi raug koj li.

⁸Koj yuav tsa qhovmuag saib thiab pom luag rau txim rau cov neeg ua phem.

⁹Koj muab tus TSWV ua tus tiv thaiv koj, tus uas muaj Hwjchim Loj kawg nkaus yog tus tsomkwm koj,

¹⁰thiaj yuav tsis muaj kev puastsuaj los raug koj, thiab kev nruj kev tsiv yuav tsis los ze koj vaj koj tsev.

¹¹Vajtswv yuav txib nws cov timtswv los tsomkwm koj; lawv yuav tiv thaiv koj txhua qhov uas koj mus.

¹²Lawv ob txhais tes yuav hwj koj, tsis pub koj ob txhais kotaw raug pobzeb li.

¹³Koj yuav tsuj ntiag tsov ntxhuav thiab nab, txawm yog tej tsov ntxhuav uas tsiv heev thiab tej nab uas muaj taug los koj yuav muab tsuj nthi rau hauv koj qab xibtaws.

¹⁴Vajtswv hais tias, “Kuv yuav cawm cov neeg uas hlub kuv, thiab yuav tiv thaiv cov neeg uas lees kuv ua lawv tus TSWV.

¹⁵Thaum lawv thov txog kuv, kuv yuav teb lawv; thaum lawv raug kev nyuaj siab kuv yuav nrog lawv nyob. Kuv yuav cawm lawv kom dim thiab pub lawv tau ntsejmuag.

¹⁶Kuv yuav pub lawv muaj sia ntev ua neej nyob; thiab kuv yuav cawm kom lawv dim.”