Read Hmong Daw Phau Ntawv Nkauj 94 Bible Online

Phau Ntawv Nkauj 94 - Hmong Daw bible

Phau Ntawv Nkauj 94

¹Tus TSWV, koj yog Vajtswv tus uas rau txim; thov qhia koj txojkev chim rau sawvdaws pom!

²Koj yog tus txiav txim rau neeg ntiajteb; thov koj sawv thiab ua pauj kom txaus nkaus rau cov neeg khavtheeb!

³Tus TSWV, cov neeg siab phem yuav zoo siab ntev li cas? Tseem tshuav ntev li cas thiab?

⁴Lawv yuav hais lus phem khavtheeb ntsuav, thiab khav tej kev phem uas lawv ua mus ntev li cas?

⁵Tus TSWV, lawv caij tsuj koj haivneeg, thiab lawv tsimtxom cov neeg uas yog koj tug.

⁶Lawv tua cov pojntsuam thiab cov menyuam ntsuag, thiab lawv tua lwm haivneeg uas los nyob hauv peb lub tebchaws.

⁷Lawv hais tias, “Tus TSWV yeej tsis pom peb li; cov Yixalayees tus Vajtswv tsis paub hlo li.”

⁸Kuv haivneeg, ua li cas nej yuav ruam ua luaj li? Cov neeg ruam, thaum twg nej mam li ntse?

⁹Vajtswv yog tus tsim peb muaj pobntseg, nws tseem tsis hnov thiab los? Vajtswv yog tus tsim peb muaj qhovmuag, nws tseem tsis pom thiab los?

¹⁰Vajtswv qhuab ntuas txhua haivneeg, nws tseem tsis rau txim rau lawv thiab los? Nws yog xibhwb rau txhua tus, nws tseem tsis muaj kev txawj ntse thiab los?

¹¹Tus TSWV paub tej uas neeg xav hauv lub siab; nws paub hais tias tej uas neeg xav ntawd tsis muaj qabhau dabtsi.

¹²Tus TSWV, tus neeg uas koj qhia, thiab koj muab koj txoj kevcai cob rau mas muaj kev kaj siab lug.

¹³Koj pub rau tus ntawd tau so hnub uas muaj kev ntxhov siab mus txog hnub uas luag khawb tau lub qhov cuab tos tus neeg siab phem.

¹⁴Tus TSWV yuav tsis tso nws haivneeg tseg; nws yuav tsis ncaim nws cov neeg hlo li.

¹⁵Yuav rov muaj kev ua ncaj nyob hauv tej tsev tu plaub, ces cov neeg ncaj yuav ua ncaj ncees mus li.

¹⁶Leejtwg yuav sawv cev kuv mus tawmtsam cov neeg siab phem? Leejtwg tuaj kuv tog tawmtsam cov neeg ua phem ua qias?

¹⁷Yog tus TSWV tsis cawm kuv, kuv yuav cia li mus rau hauv tubtuag teb.

¹⁸Kuv hais tias, “Kuv ntog lawm lauj”; tiamsis tus TSWV, koj txojkev hlub uas tsis paub kawg pab kuv sawv rov los.

¹⁹Thaum kuv ntxhov siab thiab ua ywjfab ywjfwj, koj nplig kuv lub siab kom kuv rov muaj kev zoo siab.

²⁰Vajtswv, koj yeej tsis koom siab nrog tus txiav txim tsis ncaj uas nws txiav txim tsis raws li txoj kevcai;

²¹nws tuavhauv ua tsis ncaj rau cov neeg zoo thiab txiav txim tuag rau tus neeg uas tsis muaj txim.

²²Tiamsis tus TSWV tiv thaiv kuv; kuv tus Vajtswv tsomkwm kuv.

²³Nws yuav rau txim rau lawv vim tej kev phem uas lawv ua, thiab ua kom lawv puastsuaj vim lawv tej kev txhaum; tus TSWV uas yog peb tus Vajtswv yuav ua kom lawv puastsuaj.