Read Hmong Daw Phau Ntawv Nkauj 95 Bible Online

Phau Ntawv Nkauj 95 - Hmong Daw bible

Phau Ntawv Nkauj 95

¹Cia li nrog peb qhuas tus TSWV! Peb cia li hu nkauj zoo siab qhuas Vajtswv tus uas tsomkwm peb!

²Peb cia li los cuag nws, ua nws tsaug thiab hu nkauj zoo siab qhuas nws.

³Rau qhov tus TSWV yog Vajtswv tus uas muaj hwjchim loj, nws yog tus Vajntxwv uas muaj hwjchim loj tshaj lwm tus vajtswv.

⁴Nws kav tagnrho lub qab ntuj no, txij ntua hauv tej qhov tsua uas tob tob mus txog saum tej hauv roob siab.

⁵Nws kav tagnrho tej hiavtxwv uas nws tsim; thiab nws kav thooj av uas nws txhais tes puab.

⁶Cia li los thiab peb khoov ntshis pehawm nws; peb cia li txhos caug ntawm tus TSWV lub xubntiag, nws yog tus uas tsim peb!

⁷Nws yog peb tus Vajtswv; peb yog cov neeg uas nws tsomkwm, peb yog pab yaj uas nws pub zaub rau noj. Hnub no cia li mloog tej lus uas nws hais:

⁸“Nej tsis txhob ua neeg tawv ncauj li nej cov yawgkoob ua thaum nyob nram tiaj suabpuam Melinpas thiab Maxas.

⁹Thaum nyob nrad, lawv sim kuv siab, txawm yog lawv pom txhua yam uas kuv ua pab lawv lawm los lawv tseem sim kuv siab li ntawd.

¹⁰Plaub caug xyoo ntawd kuv dhuav cov neeg no kawg li. Kuv hais tias, ‘Ua li cas lawv yuav tsis muab siab npuab kuv hlo li! Lawv tsis kam mloog kuv tej lus qhuab qhia.’

¹¹Chim kuv siab, kuv thiaj hais lus txiav npluav rau lawv hais tias: ‘Nej yuav tsis tau mus nyob hauv lub tebchaws uas kuv muab rau nej.’ ”