Read Hmong Daw Phau Ntawv Nkauj 97 Bible Online

Phau Ntawv Nkauj 97 - Hmong Daw bible

Phau Ntawv Nkauj 97

¹Tus TSWV yog vajntxwv! Lub ntiajteb cia li zoo siab! Tej koog povtxwv hauv hiavtxwv, nej cia li zoo siab!

²Muaj huab tsaus nti nyob puagncig nws; nws kav neeg ntiajteb ntawm txojkev ncaj ncees thiab dawbhuv.

³Muaj nplaim hluavtaws ua nws ntej thiab kub nws cov yeebncuab uas nyob ibncig nws.

⁴Nws ua kom muaj xob laim ci pom kev mus thoob ntiajteb; lub ntiajteb pom thiab ntshai tshee hnyo.

⁵Tej hauv roob yaj li ciab ntab tabmeeg tus TSWV, tabmeeg tus Tswv uas kav tagnrho lub ntiajteb.

⁶Lub ntuj piav txojkev ncaj ncees, thiab txhua haivneeg pom nws lub tshwjchim uas ci ntsa iab.

⁷Txhua tus uas pe tej mlom yuav raug txajmuag; tagnrho tej vajtswv yuav txhos caug pehawm tus TSWV.

⁸Tus TSWV, vim koj txojkev txiav txim, cov neeg uas nyob hauv Xi-oos muaj kev zoo siab heev, thiab tej nroog hauv tebchaws Yudas los zoo siab kawg li.

⁹Tus TSWV uas muaj hwjchim loj kawg nkaus, koj yog tus uas kav tagnrho lub ntiajteb no; koj yog tus uas muaj hwjchim loj dua tej vajtswv huv tibsi.

¹⁰Tus TSWV hlub cov neeg uas ntxub tej kev phem kev qias; nws tsomkwm nws haivneeg txojsia; nws tso lawv dim ntawm cov neeg siab phem txhais tes.

¹¹Qhov kaj ci rau cov neeg ncaj ncees, thiab ua rau cov neeg siab zoo muaj kev zoo siab kawg.

¹²Nej cov uas yog neeg ncaj ncees cia li zoo siab, vim txhua yam uas tus TSWV ua tas los lawm! Nco ntsoov txhua yam uas tus Vajtswv dawbhuv ua tas los lawm, thiab ua nws tsaug.