Read Hmong Daw Pajlug 15 Bible Online

Pajlug 15 - Hmong Daw bible

Pajlug 15

¹Lo lus mos lus muag ua rau kev chim ploj mus, tiamsis lo lus nruj tsiv ua rau kev chim tawm tuaj.

²Thaum cov neeg txawj ntse hais lus, lawv hais tej lus ntse ntsuav, tiamsis cov neeg ruam hais lus tsis muaj hauvpaus hauvntsis.

³Tus TSWV pom txhua yam xwmtxheej uas muaj nyob txhua qhov, nws saib ntsoov peb, thaum peb ua zoo lossis thaum peb ua phem.

⁴Tus nplaig uas hais lus zoo yog tsob tshuaj uas cawm txojsia, tiamsis tus nplaig uas hais lus phem ua rau luag ntsawv siab.

⁵Tus neeg ruam yeej tsis quavntsej leej txiv tej lus qhia, tus neeg ntse yeej khaws leej txiv tej lus ntuas.

⁶Tej neeg ncaj ncees txuag tau lawv tej nyiaj txiag, tiamsis tej neeg siab phem tej nyiaj txiag yuav ploj mus tas thaum lawv ntsib kev txomnyem.

⁷Kev txawj ntse yog los ntawm cov neeg muaj tswvyim, tsis yog los ntawm cov neeg ruam.

⁸Tus TSWV txaus siab rau cov neeg siab zoo tej lus thov, tiamsis nws ntxub tej khoom fij uas cov neeg siab phem coj tuaj fij.

⁹Tus TSWV ntxub tej haujlwm uas cov neeg siab phem ua, tiamsis nws txaus siab rau cov neeg ncaj ncees.

¹⁰Yog koj ua txhaum, koj yuav raug txim hnyav. Yog koj tsis cia luag ntuas koj, koj yuav tuag.

¹¹Txawm yog tubtuag teb los yeej txwv tsis tau tsis pub tus TSWV paub hais tias hauv muaj dabtsi li. Yog li ntawd, neeg yuav ua li cas zais tau nws tej kev xav tsis pub Vajtswv paub?

¹²Cov neeg uas thuam lwm tus tsis nyiam kom luag ntuas; lawv yeej tsis thov kom cov neeg txawj ntse qhuab ntuas lawv.

¹³Thaum neeg zoo siab, lawv lub ntsejmuag luag ntxhi, tiamsis thaum lawv ntxhov siab, lawv lub ntsejmuag mluas mlob.

¹⁴Cov neeg txawj ntse xav kawm txujci ntxiv, tiamsis cov neeg ruam tsis quavntsej kawm dabtsi li.

¹⁵Tus neeg pluag ua neej tiv kev txomnyem ntsuav, tiamsis tus neeg uas muaj noj muaj haus niaj hnub muaj kev zoo siab.

¹⁶Ua neeg pluag uas paub ntshai tus TSWV zoo dua li ua neeg npluanuj, tiamsis muaj teebmeem.

¹⁷Noj zaub tsuag nyob nrog kev sib hlub zoo dua li noj nqaij nyob nrog kev sib ntxub.

¹⁸Tej lus phem ua rau muaj kev sib cav sib ceg, tiamsis ua siab ntev muaj kev sib haumxeeb.

¹⁹Tus neeg tubnkeeg txojkev tuaj pos fab hnyo, tiamsis tus neeg siab ncaj txoj haukev dav fo.

²⁰Tus tub txawj ntse ua rau nws txiv zoo siab heev. Tsuas yog tus ruam thiaj saib tsis taus nws niam xwb.

²¹Cov neeg ruam zoo siab heev rau lawv tej kev ruam, tiamsis cov neeg ntse ua dabtsi los yog qhov tseeb.

²²Khaws luag tej tswvyim cia kom zoo, koj thiaj yuav vammeej. Yog tsis tau tswvyim pab, koj ua haujlwm tsis tiav.

²³Lo lus teb zoo ua rau luag zoo siab, lub sijhawm uas yus hais tau lo lus zoo ua rau yus kaj siab.

²⁴Txojkev uas cov neeg txawj ntse taug coj mus tau txojsia, tsis yog coj mus rau hauv tubtuag teb.

²⁵Tus TSWV yuav rhuav tshem cov neeg muab hlob tej vajtse, tiamsis nws yuav tsomkwm cov pojntsuam tej teej tug.

²⁶Tus TSWV ntxub lub siab uas xav phem, tiamsis nws txaus siab rau tej lus mos lus muag.

²⁷Tej pajlaum uas tau los ntawm kev tsis ncaj ncees yuav ua rau koj tsevneeg tau kev kub ntxhov. Tsis txhob yuav tej nyiaj uas luag coj tuaj xiab, koj thiaj muaj sia nyob ntev.

²⁸Cov neeg siab zoo ua tib zoo xav ua ntej mam li teb luag. Cov neeg siab phem maj nroos teb luag, tiamsis ua kom muaj teebmeem xwb.

²⁹Thaum cov neeg ncaj ncees thov, tus TSWV yeej mloog, tiamsis nws tsis quavntsej cov neeg txhaum tej lus thov.

³⁰Ntsejmuag luag ntxhi ua rau koj zoo siab, thiab hnov xov zoo ua rau koj kaj siab lug.

³¹Yog koj ua tib zoo mloog thaum luag ntuas koj, koj thiaj yog tus ntse.

³²Yog koj tsis kawm, ces yog koj rhuav koj xwb. Yog koj khaws luag tej lus qhuab ntuas, koj thiaj yuav txawj ntse.

³³Hwm tus TSWV yog kev kawm txawj kawm ntse ntag. Koj yuav tsum txo hwjchim luag thiaj hwm koj.