Read Hmong Daw Pajlug 18 Bible Online

Pajlug 18 - Hmong Daw bible

Pajlug 18

¹Cov neeg uas lawv tsuas pom lawv zoo xwb, lawv nrog tsis taus luag ua phoojywg, lawv tsis pom tej uas sawvdaws pom hais tias yog qhov zoo.

²Tus neeg ruam tsis quavntsej kev txawj ntse hlo li, tiamsis nws khav hais tias nws yog tus muaj tswvyim.

³Kev txhaum thiab kev txajmuag mus ua ke. Koj poob ntsejmuag, ces yog koj raug thuam.

⁴Tus neeg muaj tswvyim tej lus tob ib yam li hiavtxwv, thiab zoo ib yam li tus dej cag uas ntws ntshiab si.

⁵Tsis tsimnyog tsa tus neeg ua txhaum txoj cai thiab tsis tsimnyog rau txim rau tus neeg ncaj ncees.

⁶Tus neeg ruam ua rau muaj kev sib cav sib ceg, thiab nws twv ntxhias qhov sib ntaus.

⁷Tus neeg ruam tej lus rov ua rau nws raug kev puastsuaj. Nws tej lus rov ua lub vojhlua khi nws.

⁸Tej lus uas hais luag nplig zoo hais kawg li, sawvdaws thiaj nyiam hais ua luaj.

⁹Tus neeg tubnkeeg zoo ib yam li tus neeg uas ua kom muaj kev puastsuaj.

¹⁰Tus TSWV zoo ib yam li lub chaw tsomfaj uas ruaj khov heev thiab yog qhov chaw cawm siav uas cov neeg ncaj ncees vamkhom.

¹¹Cov neeg npluanuj xav hais tias lawv tej nyiaj txiag tiv thaiv tau lawv ib yam li tus ntsa yeej uas siab thiab ruaj khov thaiv ibncig lub nroog.

¹²Tus uas tsis txo hwjchim yuav tsis muaj leejtwg hwm nws. Cov neeg uas khavtheeb yuav raug kev puastsuaj.

¹³Ua tib zoo mloog ua ntej tso koj mam teb. Yog koj tsis ua tib zoo mloog, ces koj yog tus neeg ruam thiab raug luag thuam ntag.

¹⁴Ua neej nyob koj nyiaj taus kev mob, tiamsis tsis muaj leejtwg tiv taus txojkev nyuaj siab.

¹⁵Cov neeg ntse nrhiav kev txawj ntse thiab muab siab rau kawm.

¹⁶Yog koj xav mus cuag ib tug neeg tseemceeb, cia li nqa khoom mus pub rau nws, ces koj yuav mus cuag tau nws.

¹⁷Tus yeejkom uas xub peev lus hauv tsev tu plaub zoo li nws muaj cai kawg, tiamsis cia txog thaum tus pemkom peev lus tas tso.

¹⁸Yog muaj ob tug neeg uas muaj cai sib luag sib kom mus rau hauv tsev tu plaub yuav tau rho ntawv kom muaj tus yeej tus xwb.

¹⁹Pab koj tus kwvtij nws thiaj yuav tiv thaiv koj ib yam li tus ntsa yeej uas thaiv lub nroog, tiamsis yog koj nrog nws sib ceg, nws yuav kaw qhovrooj tsis pub koj mus hauv nws tsev.

²⁰Koj yuav tau txais raws li tej lus uas koj tau hais lawm.

²¹Tej lus uas koj hais cawm tau txojsia lossis txov txojsia. Yog li ntawd, koj yuav tau sau raws li tej lus uas koj hais.

²²Koj yuav tau pojniam ces yog tau yam uas zoo, thiab koj tau txais koob hmoov zoo los ntawm Vajtswv.

²³Tus neeg pluag hais tej lus uas zoo xwb, tiamsis tus neeg npluanuj teb nyaum kawg li.

²⁴Muaj ibtxhia phoojywg kav tsis ntev, tiamsis muaj qee leej phoojywg tseem sib raug zoo dua tej kwvtij txheeb.