Read Hmong Daw Pajlug 26 Bible Online

Pajlug 26 - Hmong Daw bible

Pajlug 26

¹Qhuas tus neeg ruam tsis muaj qabhau ib yam li los daus rau thaum ntuj qhua lossis los nag rau lub caij sau qoob.

²Lo lus foom phem yuav tsis mob koj qhov twg li, tshwj hais tias yog koj yeej tau ua txhaum lawm. Yog koj ua zoo, tej lus ntawd zoo ib yam li tej noog uas ya los tiamsis tsis tsaws qhov twg li.

³Muab pas los nplawm nees, muab xauv los xam neesluav, thiab muab hlua tawv nplawm tus neeg uas tsis mloog lus.

⁴Yog koj teb tus neeg ruam tej lus nug, ces yog koj ruam ib yam li nws.

⁵Muab tej lus ruam teb rau tus neeg ruam tej lus nug kom nws thiaj paub hais tias, nws tsis ntse li nws xav.

⁶Yog koj cia tus ruam xa xov zoo ib yam li yog koj txiav koj txhais kotaw povtseg thiab yog koj tsub kev ntxhov siab ntxiv rau koj.

⁷Tus neeg ruam hais pajlug, ces tsuas zoo li tus neeg cegtawv mus kev.

⁸Yog qhuas tus ruam, ces zoo ib yam li muab ib lub pobzeb khi rau ntawm txoj zes hlua.

⁹Tus neeg ruam hais pajlug, ces zoo ib yam li tus neeg qaug cawv dig saus tawm ntawm nws txhais tes.

¹⁰Tus uas ntiav tus neeg ruam lossis tus qaug cawv ua nws tub zog, ces zoo ib yam li tus neeg tua hneevnti uas tsis saib qab saib hau mus raug lwm tus.

¹¹Tus neeg ruam uas pheej ua tej yam ruam tas los rov ua dua, ces zoo ib yam li tus dev uas rov noj dev cov ntuav.

¹²Tus neeg ruam uas ruam kawg li tseem zoo dua tus uas nws xav hais tias, nws ntse heev tiamsis nws twb tsis ntse.

¹³Vim li cas tus neeg tubnkeeg thiaj tsis tawm hauv tsev mus sab nraud? Yog nws ntshai dabtsi? Puas yog ntshai tsov ntxhuav?

¹⁴Tus neeg tubnkeeg pw da luj luam saum txaj ib yam li daim txiag qhovrooj uas qoj mus qoj los.

¹⁵Tus neeg tubnkeeg cev diav mus hais mov hauv lub tais twb laj nqa los rau ntawm qhovncauj.

¹⁶Tus neeg tubnkeeg yuav xav hais tias nws ntse dua xya tus txivneej muaj tswvyim uas teb tau luag tej lus.

¹⁷Tus neeg uas mus raus tes rau luag tej lus sib ceg uas tsis yog nws feem xyuam, ces zoo ib yam li dev dhia es ntsiab dev nplooj ntseg.

¹⁸Tus uas ntxias kom lwm tus yuam kev thiab hais tias yog nws tso dag xwb, tus ntawd zoo ib yam li tus neeg vwm uas mus kov tej cuabyeej txov txojsia ntag.

²⁰Yog tsis muaj taws, ces hluavtaws kuj tuag; yog tsis muaj tus neeg taug xaiv, ces yeej tsis muaj kev sib cav.

²¹Thee ua kom hluavtaws ciaj, ntoo ua kom nplaim taws cig, thiab tus neeg uas ua kom muaj teebmeem ua rau kev sib cav sib ceg loj tuaj.

²²Tej lus uas hais luag plig zoo hais kawg li! Sawvdaws thiaj nyiam hais ua luaj!

²³Tus neeg uas ncauj zoo tiamsis siab phem, mas zoo ib yam li lub hub uas muab vuam kom ci xwb.

²⁴Tus neeg ntsejmuag ncaj siab nkhaus ntxub luag, tiamsis tseem ua txuj qhuas luag.

²⁵Txawm yog nws hais lus zoo los tsis txhob ntseeg, rau qhov hauv nws lub siab puv nkaus kev ntxub ntxaug.

²⁶Txawm yog nws zais qhov uas nws ntxub luag los sawvdaws yeej paub tej kev phem uas nws ua.

²⁷Tus neeg uas khawb qhov cuab luag kev, yog nws rov cuab nws xwb. Leejtwg cuab yej, yej yuav rov tais nws tes.

²⁸Yog koj ntxub leejtwg, koj thiaj dag kom nws raug mob. Tus neeg uas ncauj zoo siab phem yuav raug kev puastsuaj.