Read Hmong Daw Pajlug 31 Bible Online

Pajlug 31 - Hmong Daw bible

Pajlug 31

¹Ntawm no yog tej lus tseemceeb uas vajntxwv Lemu-ees niam hais rau nws:

²“Kuv tus tub, koj yog leejtwg? Kuv tus tub uas yug hauv kuv plab los, koj yog leejtwg? Kuv tus tub uas kuv tau coglus, koj yog leejtwg?

³Tsis txhob muab koj lub zog siv tagnrho rau kev ua nkauj ua nraug thiab koj tej nyiaj txiag rau tej pojniam; lawv tau ua rau tej vajntxwv puastsuaj tas.

⁴Lemu-ees, cia li mloog kuv tej lus. Tej vajntxwv tsis tsimnyog haus cawv txiv hmab lossis tsis tsimnyog tej thawjcoj nyiam haus tej cawv ntsim.

⁵Thaum lawv haus cawv qaug lawm, lawv tsis nco qab tej kevcai thiab tsis quavntsej tej kev ua ncaj rau tej pejxeem lawm.

⁶Tej cawv ntsim yog cov neeg uas yuav raug kev puastsuaj thiab cov uas muaj kev nyuaj siab haus xwb.

⁷Cia lawv haus kom lawv tsis txhob nco txog lawv tej kev txomnyem thiab tej kev nyuaj siab.

⁸“Cia li pab cov neeg uas lawv tsis muaj cuabkav hais lawv zaj, cia li pab txheem cov tsis muaj txhaum uas tsis muaj chaw vamkhom.

⁹Pab txheem cov pluag thiab cov txomnyem txoj cai, pab lawv hais thiab txiav txim kom ncaj ncees.”

¹⁰Tus pojniam uas tsimtxiaj muaj nqis dua nyiaj thiab kub, tiamsis laj nrhiav tau ib tug pojniam zoo li ntawd.

¹¹Nws tus txiv tso siab plhuav rau nws, thiab nws lub neej yuav tsis txomnyem li.

¹²Nws ua zoo rau tus nws txiv thiab tsis ua phem mus tas nws lub neej li.

¹³Nws rau siab ntso ntos ntaub plaub yaj thiab ntaubmag los xaws ris tsho hnav.

¹⁴Nws mus ris zaub mov tom tej teb los ib yam li tej nkoj uas thauj khoom ua lag ua luam.

¹⁵Nws sawv ntxov los ua zaub ua mov rau tsevneeg noj thiab qhia haujlwm rau tej ntxhais qhev ua.

¹⁶Nws mus xyuas luag tej liaj teb thiab rho hlo nyiaj yuav; nws muab tej nyiaj uas nws khwv tau mus yuav txiv hmab los cog.

¹⁷Nws muaj zog, nws nquag thiab rau siab khwv kawg li.

¹⁸Nws paub hais tias txhua yam uas nws khwv tau los yeej muaj nqis, thiab nws ua haujlwm mus txog tej tag hmo.

¹⁹Nws saws ntuag thiab ntos ntaub los xaws ris tsho.

²⁰Nws ua siab dawb siab zoo rau cov neeg pluag thiab cov txomnyem.

²¹Lub caij los daus los nws tsis txhawj, rau qhov nws tsevneeg muaj ris tsho sov hnav txhua tus.

²²Nws ntos tej ntaub pua txaj thiab hnav tej ris tsho ntaubmag tsamxem uas zoo zoo xwb.

²³Nws tus txiv yog ib tug neeg tseemceeb thiab muaj koob meej nto moo lug.

²⁴Nws xaws ris tsho thiab siv muag rau tej tub lag tub luam.

²⁵Nws ua taus niam thiab sawvdaws hwm nws, nws tsis txhawj txog lub neej yav tom ntej.

²⁶Nws hais lus ntse ntsuav thiab tsis muaj ib lo siab leejtwg.

²⁷Nws rau siab ntso khwv thiab saib ntshis tsis pub nws tsevneeg raug kev txomnyem.

²⁸Nws tej menyuam nco nws txiaj ntsig, thiab nws tus txiv qhuas ntxhias nws.

²⁹Nws tus txiv hais tias, “Muaj ntau tus pojniam yeej zoo kawg thiab, tiamsis koj yog tus uas zoo dua lawv sawvdaws.”

³⁰Cev zam zoo rub tau neeg lub siab, thiab kev zoo nkauj txawj ploj mus, tiamsis tsimnyog qhuas tus pojniam uas hwm tus TSWV.

³¹Nws ua haujlwm zoo, cia li nco nws txiaj ntsig; nws yog tus uas tsimnyog sawvdaws hwm.