Read Hmong Daw Pajlug 8 Bible Online

Pajlug 8 - Hmong Daw bible

Pajlug 8

¹Cia li mloog! Lub tswvyim tabtom hu. Txojkev totaub tabtom tsa nws lub suab hu.

²Lub tswvyim yeej sawv nres nroos saum tej ncov roob uas nyob ze rau ntawm tej ntug kev thiab ntawm tej kev tshuam.

³Lub tswvyim tuaj ntawm tej ncauj ke uas mus rau hauv nroog, thiab sawv ntawm tej roojvag ib sab hu hais tias,

⁴“Neeg, kuv twb hu nej lawm; kuv hu txhua tus uas nyob hauv ntiajteb no huv tibsi.

⁵Nej tseem yog menyuam mos xwb los? Cia li kawm ua li tej laus ua. Nej yog neeg ruam los? Cia li kawm kom ntse los mas.

⁶Ua tib zoo mloog kuv tej lus uas zoo tshaj plaws no; txhua yam uas kuv qhia nej yeej yog yam tseeb xwb.

⁷Yam uas kuv hais yog qhov tseeb; kuv ntxub tej lus dag kawg li.

⁸Txhua yam uas kuv hais puavleej yog lus tseeb; tsis muaj ib los twg yog lus dag lossis yuam kev li.

⁹Tus neeg uas txawj ntse, nws totaub tej lus no zoo; thiab txhua yam yoojyim rau tus uas txawj ntse.

¹⁰Khaws kuv tej lus qhuab ntuas cia zoo dua li khaws tej nyiaj txiag; khaws tej kev txawj ntse cia zoo dua khaws tej tseem kub.

¹¹“Kuv yog lub tswvyim, kuv zoo dua tej hlaws muaj nqis; txhua yam uas nej xav yuav yeej piv tsis tau kuv li.

¹²Kuv yog lub tswvyim, thiab kuv muaj kev txawj ntse heev; kuv muaj kev txawj ntse thiab paub txiav txim.

¹³Kev uas hwm tus TSWV yog ntxub txojkev phem kev qias; kuv ntxub txojkev khavtheeb, txojkev limhiam, txojkev phem qias thiab tej lus dag kawg li.

¹⁴Kuv twb npaj tau tswvyim thiab yuav siv tej tswvyim ntawd tawm ntag. Kuv yog tus thoob tsib to nrog, thiab kuv yog tus muaj zog nchav.

¹⁵Kuv pab tej vajntxwv tswj teb kav chaw thiab pab tej nomtswv rhawv kevcai tswjhwm ncaj ncees.

¹⁶Txhua tus nomtswv uas kav hauv lub ntiajteb no, kuv yog tus uas pab lawv, tej coj plaub tsaws ntug thiab tej nomtswv qib siab los ib yam nkaus.

¹⁷Kuv hlub cov uas hlub kuv; yog leejtwg nrhiav kuv yeej yuav ntsib kuv.

¹⁸Nyiaj txiag thiab meejmom, kev npluanuj thiab kev vammeej kuv puavleej muaj.

¹⁹Tej uas koj tau ntawm kuv los zoo dua tej tseem kub thiab zoo dua tej tseem nyiaj.

²⁰Kuv taug kev ncaj ncees; kuv ua raws li txojkev tseeb,

²¹kuv muab kuv tej nyiaj txiag rau tus uas hlub kuv, lawv tej tsevneeg muaj nyiaj muaj txiaj nplua mias.

²²“Tus TSWV xub tsim kuv ua ntej dua ib puas tsav yam huv tibsi, kuv yog tes haujlwm uas nws xub ua puag thaum ub los lawm.

²³Nws yeej tsim kuv puag thaum chivkeeb, kuv yeej nyob puag thaum tsis tau tsim lub ntiajteb no los lawm.

²⁴Kuv tseem xub nyob dua thaum tsis tau muaj hiavtxwv thiab qhovdej txhawv.

²⁵Kuv tseem xub nyob dua tej roob thiab ua ntej tej pov roob nyob muaj chaw,

²⁶ua ntej Vajtswv tsim lub ntiajteb thiab tej tiaj nrag lossis thawj phoovtes av.

²⁷Thaum Vajtswv muab lub ntuj mus tso nyob muaj chaw, kuv twb yeej nyob ntawd lawm, thaum nws nthuav lub ntuj kom tus npoo ntuj mus hla dej hiavtxwv,

²⁸thaum nws muab tej huab mus tso rau saum nruab ntug, thaum nws qhib tej qhovdej hiavtxwv,

²⁹thiab hais kom tej hiavtxwv tsuas ntws txij tej ciam uas nws kom tseg. Thaum nws puab tej cag ntiajteb kuv twb yeej nyob ntawd lawm.

³⁰Kuv yeej nyob rawv ntawm nws ib sab ib yam li tus kws tsa tsev ntag, kuv yog tus uas niaj hnub ua rau nws zoo siab thiab nrog nws nyob sov siab so,

³¹kuv zoo siab rau lub ntiajteb thiab txaus siab rau tej neeg txhua haiv.

³²“Cov metub hluas, nimno nej cia li mloog kuv hais. Ua li kuv hais, nej thiaj yuav tau zoo nyob kaj siab lug.

³³Cia li mloog tej lus uas kuv qhia nej no. Tsis txhob muab tso tseg, nej thiaj yuav txawj ntse.

³⁴Tus neeg uas mloog kuv tej lus, tus neeg uas niaj hnub tuaj sawv ntawm kuv lub qhovrooj tos yuav los hauv kuv lub tsev, yuav tau nyob kaj siab lug.

³⁵Tus neeg uas nrhiav kuv yog nws nrhiav txojsia ntag, thiab tus TSWV yuav txaus siab rau nws.

³⁶Tus neeg uas tsis los nrhiav kuv, tus ntawd, nws rov txov nws txojsia. Leejtwg ntxub kuv, ces yog nws nyiam txojkev tuag.”