Read Hmong Daw Tej Lus Qhia 3 Bible Online

Tej Lus Qhia 3 - Hmong Daw bible

Tej Lus Qhia 3

¹Txhua yam uas muaj nyob hauv lub qab ntuj no yeej tshwmsim raws li Vajtswv tau teem caij teem nyoog tseg cia lawm xwb.

²Vajtswv teem kom muaj sijhawm yug thiab muaj sijhawm tuag, muaj sijhawm cog thiab muaj sijhawm sau,

³muaj sijhawm tua thiab muaj sijhawm kho kom zoo, muaj sijhawm muab rhuav povtseg thiab muaj sijhawm txhim kho dua tshiab.

⁴Vajtswv teem kom muaj sijhawm ntxhov siab thiab muaj sijhawm zoo siab, muaj sijhawm quaj ntsuag thiab muaj sijhawm seevcev lomzem,

⁵muaj sijhawm txawb pobzeb povtseg thiab muaj sijhawm khaws pobzeb rov los, muaj sijhawm sib nwj thiab muaj sijhawm tsis sib nwj.

⁶Muaj sijhawm nrhiav tau los thiab muaj sijhawm ploj mus, muaj sijhawm muab los khaws cia thiab muaj sijhawm muab povtseg,

⁷muaj sijhawm muab dua kom ntuag thiab muaj sijhawm muab ntxiv rau, muaj sijhawm nyob ntsiag to thiab muaj sijhawm sib tham.

⁸Vajtswv teem kom muaj sijhawm sib hlub thiab muaj sijhawm sib ntxub, muaj sijhawm ua tsov ua rog thiab muaj sijhawm nyob thajyeeb.

⁹Peb yuav tau dabtsi los ntawm txhua yam haujlwm uas peb ua ntawd?

¹⁰Kuv paub lub nra hnyav uas Vajtswv muab rau peb ris.

¹¹Vajtswv yeej teem caij teem nyoog tseg rau txhua tsav yam lawm. Nws pub peb txawj ntshaw thiab paub txog lub neej yav tom ntej, tiamsis nws tsis pub peb txaus siab thiab totaub txhua yam uas nws tau ua ntawd.

¹²Yog li ntawd, kuv pom hais tias yam uas peb tau, ces tsuas yog cia li txaus siab rau tej uas peb muaj thiab tej uas peb ua thaum peb tseem ua neej nyob no xwb.

¹³Peb sawvdaws cia li noj thiab haus kom txaus siab rau tej uas peb khwv tau los. Tej ntawd yog tej uas Vajtswv muab pub rau peb.

¹⁴Kuv paub hais tias txhua yam uas Vajtswv ua yuav nyob mus ibtxhis. Koj yeej ntxiv tsis tau ib yam dabtsi rau thiab rho tsis tau ib yam dabtsi tawm li. Thiab txhua yam uas Vajtswv ua no yog ua kom peb ntshai thiab hwm nws.

¹⁵Tej uas tshwm los puavleej yog tej uas twb tshwmsim yav tas los lawm xwb. Vajtswv ua kom tej uas twb tshwmsim lawm rov tshwmsim tuaj dua.

¹⁶Dua li ntawd, kuv tseem pom hais tias nyob hauv qab ntuj no muaj tej kev phem kev qias nyob rau ntau qhov chaw uas tsimnyog muaj kev ncaj ncees thiab kev ua zoo.

¹⁷Kuv xav hais tias, “Vajtswv yeej yuav txiav txim rau tus uas ua ncaj thiab tus uas ua phem ib yam nkaus, rau qhov txhua tsav yam thiab txhua tes haujlwm yeej yuav tshwmsim los rau lub sijhawm uas twb teem tseg cia ua ntej lawm.”

¹⁸Kuv xav hais tias Vajtswv tabtom sim peb thiab qhia kom peb paub hais tias peb yeej zoo tsis tshaj tej tsiaj txhu.

¹⁹Neeg txoj hmoo thiab tsiaj txoj hmoo zoo ib yam nkaus; neeg thiab tsiaj puavleej txawj tuag. Neeg thiab tsiaj puavleej txawj ua pa; neeg yeej zoo tsis tshaj tsiaj, rau qhov neeg thiab tsiaj puavleej tsis muaj qabhau.

²⁰Neeg thiab tsiaj puavleej yuav mus rau hauv tib qhov chaw. Neeg thiab tsiaj puavleej yog muab av puab, lawv thiaj yuav rov mus ua av.

²¹Yuav ua li cas yus thiaj paub hais tias neeg tus plig mus rau saum ntuj thiab tsiaj tus plig mus rau hauv av lawm?

²²Yog li ntawd, kuv paub hais tias qhov zoo tshaj, ces yog txaus siab rau tes haujlwm uas peb ua. Tsis muaj lwm yam uas peb ua tau lawm. Tsis muaj ib yam uas qhia rau peb paub hais tias, tom qab uas peb tuag lawm, yuav muaj dabtsi tshwmsim rau peb.