Read Hmong Daw Tej Lus Qhia 8 Bible Online

Tej Lus Qhia 8 - Hmong Daw bible

Tej Lus Qhia 8

¹Tsuas yog tus neeg ntse thiaj li paub lub ntsiab lus meej xwb. Tswvyim ua rau nws muaj ntsejmuag luag ntxhi thiab ua rau nws txojkev chim ploj mus.

²Cia li ua raws li vajntxwv hais, thiab tsis txhob maj coglus rau Vajtswv.

³Vajntxwv yeej muaj cuabkav ua raws li nws siab nyiam; yog li ntawd, cia li khiav ntawm nws mus ua ntej koj raug kev puastsuaj.

⁴Vajntxwv yeej muaj hwjchim ua tau txhua yam, thiab tsis muaj leejtwg yuav hais tau rau nws hais tias koj ua dabtsi li ko?

⁵Yog koj mloog nws lus, koj yuav tsis raug puastsuaj, tus neeg ntse yeej paub lub sijhawm thiab paub hais tias yuav ua li cas thiaj zoo.

⁶Yeej muaj lub caij zoo thiab muaj txojkev zoo los ua txhua yam, tiamsis peb tsuas paub mentsis xwb!

⁷Peb yeej tsis muaj ib tug twg paub txog tej yam uas yuav tshwmsim los, thiab tsis muaj leejtwg qhia peb li.

⁸Tsis muaj leejtwg khiav dim txojkev tuag lossis tshem tau hnub tuag tawm ntawm nws mus. Qhov no yog npluav rog uas peb khiav tsis dhau thiab nyiag kev khiav tsis dim li.

⁹Kuv pom tej xwm uas tshwmsim hauv lub qab ntuj no, mas ibtxhia muaj hwjchim thiab ibtxhia raug txomnyem vim kev tswjhwm ntawm cov neeg muaj hwjchim.

¹⁰Kuv pom luag muab cov neeg ua phem uas tuag lawm coj mus faus; lawv pheej nkag mus thiab tawm hauv qhov chaw dawbhuv los, tiamsis tseem muaj neeg qhuas lawv nyob hauv tej nroog uas lawv ua kev phem kev qias. Tej ntawd los tsis muaj qabhau li.

¹¹Vim li cas neeg pheej nyiam ua kev txhaum ua luaj? Rau qhov lawv ua txhaum li ntawd los lawv tsis raug txim tamsim ntawd.

¹²Tus neeg txhaum, txawm ua txhaum qas pua zaus los nws tseem ua neej nyob. Txawm li ntawd los kuv paub hais tias tus uas hwm Vajtswv thiaj yog tus uas muaj kev kaj siab,

¹³tiamsis cov neeg ua phem ua qias yuav tsis tau txojkev kaj siab ntawd. Lawv txojsia tsuas zoo ib yam li tus duab ntxoov ntxoo, thiab lawv yuav tuag thaum lawv tseem hluas, vim lawv tsis hwm Vajtswv.

¹⁴Muaj tej yam uas tshwmsim rau lub ntiajteb no: qee zaus cov neeg ncaj ncees raug txim theej cov neeg uas ua phem ua qias, thiab cov neeg ua phem ua qias tau txais cov neeg ncaj ncees tej nqi zog. Kuv thiaj li hais tias tej ntawd tsis muaj qabhau li.

¹⁵Yog li ntawd, kuv thiaj xav hais tias nyias yuav tsum txaus siab rau nyias lub neej, rau qhov tsis muaj ib yam ib yam dabtsi yuav zoo tshaj kev noj kev haus thiab nws rov txaus siab rau nws lawm. Nws tsuas ua tej haujlwm uas Vajtswv pub rau nws thaum uas nws ua neej nyob hauv ntiajteb no xwb.

¹⁶Thaum kuv muab siab rau nrhiav kev txawj ntse thiab kev ua haujlwm nyob hauv ntiajteb no, kuv pom hais tias nruab hnub thiab hmo ntuj los tsis muaj leejtwg tau so li,

¹⁷thiab tsis muaj leejtwg totaub hais tias Vajtswv ua dabtsi. Txawm yog koj rau siab nrhiav npaum twg los koj yeej tsis paub. Cov neeg txawj ntse khav hais tias lawv paub, tiamsis lawv yeej tsis paub li.