Read Hmong Daw Xalumoos Tej Nkauj 1 Bible Online

Xalumoos Tej Nkauj 1 - Hmong Daw bible

Xalumoos Tej Nkauj 1

¹Zaj nkauj zoo tshaj plaws uas Xalumoos sau.

²Cia koj lub qhovncauj nwj kuv; koj txojkev hlub zoo tshaj tej cawv txiv hmab.

³Koj lub cev tsw qab ntxiag; thaum hais txog koj lub npe kuv nco txog koj tus ntxhiab. Tsis muaj ib tug pojniam uas yuav tsis nyiam koj li.

⁴Coj kuv nrog koj, thiab wb cia li khiav mus; cia li ua kuv tus vajntxwv thiab coj kuv mus rau hauv koj chav pw. Wb yuav muaj kev zoo siab ua ke, wb yuav qhuas txojkev hlub tshaj tej cawv txiv hmab. Twb yog vim li no txhua tus pojniam thiaj nyiam koj ua luaj!

⁵Ib tsoom pojniam uas nyob hauv lub nroog Yeluxalees, kuv dub doog tiamsis zoo nkauj heev, kuv dub ib yam li tej tsevntaub uas nyob tom tiaj suabpuam Kedas, tiamsis kuv zoo nkauj ib yam li tej ntaub tsuj hauv vajntxwv Xalumoos lub loog.

⁶Tsis txhob saib tsis taus kuv, vim kuv lub cev dub doog, rau qhov tshav ntuj ziab kuv thiaj hiav tawv. Kuv cov nus chim rau kuv thiab yuam kuv mus tu vaj txiv hmab, kuv thiaj tsis muaj sijhawm tu kuv lub cev.

⁷Tus uas kuv hlub, cia li qhia rau kuv saib, koj yuav coj koj pab yaj mus noj zaub qhov twg? Thaum tavsu koj cov tsiaj yuav mus so qhov twg? Vim li cas kuv thiaj yuav tsum tuaj nrhiav koj hauv luag lwm pab neeg zov yaj?

⁸Tus hluas nkauj uas kuv hlub tshaj plaws, koj puas paub qhov chaw? Koj cia li raws pab yaj no qab, nrhiav lub tshav zaub rau koj cov tshis uas nyob ze ntawm cov yug yaj tej tsevntaub.

⁹Tus uas kuv hlub, koj ntxim cov txivneej siab npaum nkaus li tus maum nees ntxim cov txiv nees xob uas luag Falaus tej tsheb nees siab ntag.

¹⁰Koj cov plaubhau zoo nkauj ntev npws loo npog koj lub plhu thiab dauv mus rau ntawm koj lub cajdab ib yam li tej saw uas zoo nkauj.

¹¹Tiamsis peb yuav ua ib txoj saw kub uas muab tej qe nyiaj dai rau rau koj coj.

¹²Kuv tus vajntxwv tabtom pw saum nws lub txaj qhuas, thiab kuv cov tshuaj tsw qab, tsw qab ntxiag puv tsev.

¹³Tus uas kuv hlub muaj lub hnab tshuaj mules uas tsw qab ntxiag rau kuv thiab pw rawv hauv kuv lub xubntiag.

¹⁴Tus uas kuv hlub zoo ib yam li tej paj nroj qus uas tawg nyob hauv lub vaj txiv hmab hauv Enkedis.

¹⁵Tus uas kuv hlub, ua cas koj yuav zoo nkauj ua luaj; koj muaj sais muag ntxim hlub kawg li!

¹⁶Tus uas kuv hlub, ua li cas koj yuav zoo nraug tas npaud; ua li cas koj yuav ua rau kuv zoo siab ua luaj! Tej nroj ntsuab yuav ua wb lub chaw pw;

¹⁷tej ntoo ciab yuav ua wb tej nqaj tsev, thiab tej ntoo thuv yuav ua wb daim vuas nthab.