Read Hmong Daw Xalumoos Tej Nkauj 2 Bible Online

Xalumoos Tej Nkauj 2 - Hmong Daw bible

Xalumoos Tej Nkauj 2

¹Kuv yog ib lub nyuag paj ntoos uas nyob hauv Saloos, yog lub paj lilis uas nyob ntawm tej hav.

²Nws zoo ib yam li tsob paj lilis uas tuaj xyaw tej hmab pos, nws yog kuv tus hluas nkauj uas nyob nrog ib tsoom pojniam.

³Yog muab tus uas kuv hlub piv rau lwm tus txivneej, nws zoo ib yam li tsob txiv duaj uas tuaj xyaw tej ntoo havzoov ntag. Kuv nyiam nyob hauv qab nws tus duab ntxoov ntxoo, thiab kuv saj nws tej txiv qab zib kawg nkaus li.

⁴Nws coj kuv mus rau hauv lub tsev uas luag npaj muaj rooj noj rooj haus, nws tsa nws tus chij roos kuv qhia hais tias nws hlub kuv.

⁵Nws muab tej txiv hmab qhuav rau kuv noj kom kuv rov muaj zog, thiab muab txiv duaj rau kuv noj ua rau kuv laj siab kawg li! Vim txojkev hlub ua rau kuv tsaug muag.

⁶Nws xyab loo nws txhais npab laug tuaj rau kuv ncoo, thiab cev loo nws txhais npab xis tuaj puag nkaus kuv.

⁷Ib tsoom pojniam uas nyob hauv lub nroog Yeluxalees, nej cia li coglus rau kuv; cia li coglus rau tej kauv thiab tej muaslwj hais tias nej yuav tsis tuaj loojkoov wb txojkev hlub.

⁸Kuv hnov tus uas kuv hlub lub suab. Nws khiav ceev nrooj hla tej laj roob tuaj, khiav ceev heev hla tej pov roob los cuag kuv.

⁹Tus uas kuv hlub zoo ib yam li tus laug kauv thiab zoo ib yam li tus thav sai. Nws sawv npuab ntawm sab phabntsa. Nws xauj ntawm qhovrai tuaj, thiab xauj ntawm lub qhov tsev tuaj.

¹⁰Tus uas kuv hlub tsa ncauj nrog kuv tham. Tus uas kuv hlub, koj cia li tawm tuaj; kuv tus me hluas nkauj, koj cia li tawm tuaj nrog kuv mus.

¹¹Caij ntuj no twb dhau, thiab caij ntuj nag twb tu lawm;

¹²nyob tim tej ntug nroog paj ntoos tawg ntsa iab. Tamsim no yog lub caij hu nkauj lawm ntag; hnov nquab quaj zom zaws hauv tej teb tuaj.

¹³Tej txiv ncuavpias tabtom pib siav; tej txiv hmab tabtom tawg paj zom zaws thiab tsw qab ntxiag. Tus uas kuv hlub, cia li tawm tuaj; kuv tus hluas nkauj, cia li tawm tuaj nrog kuv mus.

¹⁴Koj zoo ib yam li tus nquab uas mus nkaum hauv tej kis zeb. Thov cia kuv pom koj lub ntsejmuag uas ntxim hlub, thiab cia kuv hnov koj lub suab uas hais tej lus qab zib.

¹⁵Cia li ntes cov hma thiab tej menyuam hma los rau wb ua ntej uas cov hma ntawd yuav los rhuav wb lub vaj txiv hmab uas tabtom tawg paj ntsa iab.

¹⁶Tus uas kuv hlub yog kuv tug, thiab kuv yog nws tug. Nws yug nws pab yaj hauv lub hav paj lilis,

¹⁷mus txog thaum sawv ntxov uas muaj cov cua laj ntxiag tuaj, thiab qhov tsaus ntuj los ploj mus lawm. Tus nraugxwb uas kuv hlub rov qab los ib yam li tug laug kauv, thiab ib yam li tus thav sai uas nyob saum tej roob hauv Npethes.