Read Hmong Daw Xalumoos Tej Nkauj 3 Bible Online

Xalumoos Tej Nkauj 3 - Hmong Daw bible

Xalumoos Tej Nkauj 3

¹Txhua hmo uas kuv pw saum kuv lub txaj, kuv ua npau suav toog txog tus uas kuv hlub; kuv nrhiav nws, tiamsis nrhiav tsis tau li.

²Kuv thiaj sawv mus ncig thoob plaws hauv lub nroog, mus txhua nrho txhua txojkev loj thiab kev me. Kuv nrhiav tus uas kuv hlub nkaus xwb. Kuv nrhiav kawg, tiamsis tsis pom nws li

³Thaum cov fajxwm uas ncig hauv lub nroog pom kuv, kuv nug lawv hais tias, “Nej puas pom tus uas kuv hlub?”

⁴Thaum kuv ncaim lawv mus ib pliag xwb, kuv txawm ntsib nws; kuv khawm dai lias nws thiab tsis pub nws mus qhov twg li, mus txog thaum kuv coj nws mus rau hauv kuv niam lub tsev, thiab mus rau hauv chav tsev uas kuv niam yug kuv.

⁵Ib tsoom pojniam uas nyob hauv lub nroog Yeluxalees, nej cia li coglus rau kuv; cia li coglus rau tej kauv thiab tej muaslwj hais tias nej yuav tsis tuaj tabkaum wb txojkev hlub.

⁶Yam dabtsi uas tabtom tawm tom tiaj suabpuam tuaj uas zoo ib yam li tej pa taws ncho? Tej tshuaj tsw qab thiab tej tshuaj tsw qab mules uas cov tub lag tub luam muag ntawd yog dabtsi?

⁷Xalumoos tabtom tuaj, nws zaum rawv saum nws lub zwmtxwv; muaj rau caum leej tubrog tsomkwm nws tuaj, yog cov tubrog uas muaj zog tshaj hauv cov Yixalayees.

⁸Lawv cov ntawd puavleej txawj tua ntaj heev; thiab lawv yog cov tubrog uas txawj ntaus rog kawg li. Lawv txhua tus puavleej tuav rawv ntaj ntawm tes, thiab npaj rawv tos sib tua thaum tsaus ntuj.

⁹Vajntxwv Xalumoos muab cov ntoo uas coj pem tebchaws Lenpanoos tuaj ua nws lub zwmtxwv.

¹⁰Lub zwmtxwv ntawd muab nyiaj vuam tej ceg huv tibsi; daim uas thaiv nraum nraubqaum yog muab kub ua, daim ntaub tsamxem uas pua lub zwmtxwv yog cov pojniam hauv lub nroog Yeluxalees ntos.

¹¹Cov pojniam hauv Xi-oos, cia li tawm tuaj saib Vajntxwv Xalumoos; nws ntoo rawv lub kausmom kub uas nws niam muab rau nws ntoo hnub txis tshoob, hnub uas nws muaj kev zoo siab thiab txaus siab kawg nkaus.