Read Hmong Daw Xalumoos Tej Nkauj 4 Bible Online

Xalumoos Tej Nkauj 4 - Hmong Daw bible

Xalumoos Tej Nkauj 4

¹Tus uas kuv hlub, ua li cas koj yuav zoo nkauj ua luaj! Koj ob lub qhovmuag nyob sab hauv daim ntaub uas npog koj lub ntsejmuag ci hob ntxim hlub kawg li. Koj cov plaubhau ntxhee yees ib yam li pab tshis uas khiav pem tej pov roob Nkile-as los.

²Koj cov hniav dawb ib yam li pab yaj uas luag nyuam qhuav muab txiav plaub thiab ntxuav tas. Txhua tus puavleej yug menyuam ntxaib tsis muaj ib tug tshob li.

³Koj ob daim dincauj zoo ib yam li pluaj ntaub liab; thaum koj hais lus ua cas koj ob daim dincauj ntxim hlub ua luaj. Koj ob sab plhu zoo ib yam li ob sab txiv ntsiavkws nyob sab hauv daim ntaub uas npog koj lub ntsejmuag.

⁴Koj lub cajdab zoo ib yam li Daviv lub chaw tsomfaj uas kheej du ntaug lees, muab ib txoj saw dai ib txhiab tus ncais rau koj coj puagncig cajdab.

⁵Koj ob lub mis zoo ib yam li ob tug menyuam kauv, ob tug menyuam kauv ntxaib uas tabtom noj zaub hauv lub hav paj lilis.

⁶Kuv yuav nyob saum lub pov roob uas muaj tshuaj tsw qab mules, yog lub pov roob uas muaj tshuaj tsw qab mus txog thaum sawv ntxov uas muaj cua ntsawj laj ntxiag tuaj thiab qhov tsaus ntuj ploj mus lawm.

⁷Tus uas kuv hlub, ua li cas koj zoo nkauj ua luaj; ua cas koj yuav zoo ua luaj tsis muaj ib qho phem li!

⁸Kuv tus nkauj nyab, koj cia li nqis saum Roob Lenpanoos los nrog kuv mus; koj cia li nqis saum roob Lenpanoos los cuag kuv. Koj cia li nqis saum Roob Amanas los, cia li nqis saum Roob Xenis thiab saum Roob Helemoos, qhov chaw uas tej tsov ntxhuav thiab tsov txaij nyob los.

⁹Kuv nplooj siab, kuv tus nkauj nyab, koj ob lub qhovmuag uas saib ntsoov kuv thiab tej saw uas koj coj ntawm cajdab twb nyiag kuv nplooj siab lawm.

¹⁰Koj txojkev hlub ua rau kuv txaus siab kawg nkaus li. Kuv nplooj siab thiab kuv tus nkauj nyab, koj txojkev hlub zoo tshaj tej cawv txiv hmab; koj tej tshuaj tsw qab tseem tsw qab tshaj tej txujlom lawm thiab.

¹¹Tus uas kuv hlub, koj ob daim di ncauj qab zib npaum li zib ntab; koj tus nplaig yog kua mis thiab zib ntab rau kuv. Koj cev ris tsho tsw qab ntxiag li tus ntxhiab pem Lenpanoos.

¹²Kuv nplooj siab, kuv tus nkauj nyab, koj yog lub vaj uas nyob nraim nkoos, lub vaj uas xov lajkab thaiv, thiab lub qhovdej uas twb muaj tswv lawm;

¹³nyob hauv lub vaj ntawd tej txiv ntoo hlob zoo heev. Tej txiv ntoo ntawd hlob mos nyoos ib yam li tej txiv ntsiavkws thiab txi txiv zoo kawg nkaus li. Nyob qhov ntawd tsw qab ntxiag li henas thiab naj,

¹⁴xafiloos, kalamus thiab kinamoos, lossis tsw qab ntxiag li txhua yam tshuaj tsw qab. Muaj tej nroj mules thiab alaus tuaj hauv lub vaj ntawd nrog txhua yam ntoo tsw qab uas siv ua tej tshuaj tsw qab tshaj plaws.

¹⁵Yog lub vaj uas muaj qhovdej txhawv, yog tus dej uas ntws ntshiab si, yog tus dej uas txhawv thiab ntws pem roob Lenpanoos los.

¹⁶Cov cua sab qaumteb, cia li sawv. Cov cua sab qabteb, cia li ntsawj tuaj rau hauv kuv lub vaj kom tej pa tsw qab ntxiag mus rau txhua qhov. Cia tus uas kuv hlub tuaj rau hauv nws lub vaj, thiab cia nws los noj tej txiv ntoo uas qab tshaj plaws.