Read Hmong Daw Xalumoos Tej Nkauj 5 Bible Online

Xalumoos Tej Nkauj 5 - Hmong Daw bible

Xalumoos Tej Nkauj 5

¹Kuv nplooj siab, kuv tus nkauj nyab, kuv twb tuaj rau hauv kuv lub vaj lawm. Kuv tuaj de kuv tej txujlom thiab tej nroj mules uas tsw qab; kuv tabtom noj tej nas ntab thiab tej zib ntab; kuv tabtom haus tej cawv txiv hmab thiab tej kua mis. Cov phoojywg, cia li noj thiab haus mus txog thaum uas nej qaug rau txojkev hlub lawm tso!

²Kuv pw tsaug zog lawm, tiamsis kuv lub siab yeej tsim pes dheev li. Kuv ua npau suav toog hnov tus uas kuv hlub tuaj khob qhovrooj. Tus uas kuv hlub, kuv nplooj siab, kuv tus nquab, cia li qhib qhovrooj rau kuv los tsev. Kuv lub taubhau ntub lwg thiab ntsu tej lwg thaum ib tag hmo tas li lawm.

³Kuv twb hle khaubncaws lawm; vim li cas kuv tseem rov hnav dua thiab? Kuv twb ntxuav kuv txhais kotaw lawm, vim li cas kuv tseem rov tsuj av dua thiab?

⁴Tus uas kuv hlub cev nws txhais tes ntawm qhovrooj los, ua rau kuv lub siab dhia tigtoog thaum nws nyob ze kuv.

⁵Kuv twb npaj tos qhib qhovrooj rau nws los tsev lawm. Kuv muab tshuaj tsw qab mules pleev kuv txhais tes, kuv cov ntivtes puavleej pleev tshuaj mules huv tibsi, kuv mam cev tes mus tuav tus ntsia liaj rooj.

⁶Kuv qhib qhovrooj rau tus uas kuv hlub los tsev, tiamsis xyov nws twb mus dua qhov twg lawm. Ua li cas kuv xav hnov nws lub suab ua luaj li! Kuv tawm mus nrhiav nws, tiamsis nrhiav tsis tau; kuv hu nws tiamsis tsis hnov nws teb.

⁷Cov tub fajxwm uas zov lub nroog ntsib kuv; lawv muab kuv ntaus ua rau kuv tej nqaij ntsuab tas; cov tub fajxwm ntawm tus ntsa yeej muab kuv daim ntaub npog ntsejmuag dua.

⁸Ib tsoom pojniam uas nyob hauv lub nroog Yeluxalees, nej cia li coglus rau kuv; yog nej ntsib tus uas kuv hlub, nej cia li qhia rau nws hais tias kuv mob vim txojkev hlub.

⁹Tus uas zoo nkauj tshaj ib tsoom pojniam huv tibsi, puas yog tus uas koj hlub txawv dua lwm tus? Dabtsi ua rau tus uas koj hlub zoo tshaj tus uas luag lwm tus hlub, thiaj tsimnyog kom peb coglus rau koj?

¹⁰Tus uas kuv hlub zoo nraug thiab muaj zog heev; nws yog ib tug uas nto npe tshaj plaws nyob rau hauv ib txhiab leej ntawd.

¹¹Nws lub ntsejmuag yog tej tseem kub thiab du ntaug lees; nws cov plaubhau ntev npws loo dub nciab li tus uablag.

¹²Nws ob lub qhovmuag zoo nkauj ib yam li cov nquab nyob raws ntug dej, cov nquab uas da kua mis thiab sawv nplawg ntia raws ntug dej.

¹³Nws lub plhu zoo ib yam li lub vaj uas muaj tshuaj tsw qab thiab txujlom puv nkaus tsw qab ntxiag. Nws ob daim dincauj zoo ib yam li tej paj lilis uas ntub tshuaj mules.

¹⁴Nws ob txhais tes zoo nkauj kawg nkaus, nws coj tej nplhaib uas muaj nqis tshaj plaws. Nws lub cev ntaj ntsug dulug ntaug lees ib yam li tus kaus ntxhw, muab tej hlaws xafiles dai thoob plaws rau nws lub cev.

¹⁵Nws ob txhais ncejpuab zoo ib yam li tej qe zeb uas muab cog rau saum thooj tseem kub. Nws lub cev ntaj ntsug zoo ib yam li lub Roob Lenpanoos uas muaj tej ntoo ciab tuaj puagncig.

¹⁶Nws lub ncauj hais lus qab zib ntxim nwj; nws lub cev ntaj ntsug ntxim nyiam thiab txaus siab kawg li. Cov ntxhais hauv lub nroog Yeluxalees, tus uas kuv nyiam thiab hlub zoo li no ntag.