Read Hmong Daw Xalumoos Tej Nkauj 6 Bible Online

Xalumoos Tej Nkauj 6 - Hmong Daw bible

Xalumoos Tej Nkauj 6

¹Tus hluas nkauj uas zoo nkauj tshaj plaws, tus uas koj hlub mus qhov twg lawm? Qhia rau peb saib tus uas koj hlub mus dua txojkev twg lawm, peb thiaj paub nrog koj nrhiav nws.

²Tus uas kuv hlub mus dua hauv nws lub vaj qhov chaw uas muaj tej ntoo tsw qab lawm. Nws tso nws cov tsiaj mus noj zaub hauv vaj thiab nws mus de tej paj lilis.

³Tus uas kuv hlub yog kuv tug, thiab kuv yog nws tug; nws tso nws cov yaj mus noj zaub hauv lub hav paj lilis.

⁴Tus uas kuv hlub, koj zoo nkauj ib yam li lub nroog Tilexas, thiab ntxim nyiam li lub nroog Yeluxalees, thiab zoo ib yam li thaum kuv pom tej nroog loj ua rau kuv xyu ib suab.

⁵Cia li tig koj ob lub qhovmuag uas saib kuv mus rau lwm qhov; lawv tabtom ntes kuv cia. Koj cov plaubhau ntxhee yees ib yam li pab tshis uas khiav pem tej pov roob Nkile-as los.

⁶Koj cov hniav dawb ib yam li pab yaj uas tawm hauv qhov chaw luag ntxuav los; txhua tus puavleej yug menyuam ntxaib, tsis muaj ib tug tshob li.

⁷Koj ob sab plhu zoo li ob sab txiv ntsiavkws nyob sab hauv daim ntaub uas npog koj lub ntsejmuag.

⁸Cia vajntxwv muaj rau caum tus poj vajntxwv, yim caum tus niamyau, thiab muaj hluas nkauj coob heev suav tsis txheeb.

⁹Tiamsis kuv tsuas hlub ib tug xwb, nws ntxim kuv siab npaum li tus nquab. Nws yog nws niam tib tug ntxhais nkaus xwb, nws yog tus uas nws niam hlub tshaj plaws. Txhua tus pojniam puavleej ntsia nws thiab qhuas nws; cov poj vajntxwv thiab vajntxwv cov niamyau puavleej hu nkauj qhuas nws.

¹⁰Tus pojniam no yog leejtwg? saib mas tshiab li thaum sawv ntxov, nws zoo nkauj heev thiab ci ntsa iab ib yam li lub hnub lossis lub hli.

¹¹Kuv twb nqi mus rau hauv lub hav ntoo txiv qabrog lawm, mus saib tej ntsuag ntoo uas nyob hauv lub hav, mus saib tej hmab uas tabtom ua cos pib hlav nplooj, thiab tej ntoo txiv ntsiavkws uas tawg paj.

¹²Kuv ibce tshee hnyo, vim koj ua rau kuv qaug rau txojkev hlub ib yam li nyob hauv lub tsheb nees uas caij mus ntaus rog.

¹³Tus hluas nkauj Sulas, cia li seevcev, seevcev los mas! Cia peb saib koj seevcev. Vim li cas nej thiaj xav saib kuv thaum kuv seevcev nyob hauv nruab nrab ntawm ob pab neeg?