Read Hmong Daw Xalumoos Tej Nkauj 7 Bible Online

Xalumoos Tej Nkauj 7 - Hmong Daw bible

Xalumoos Tej Nkauj 7

¹Koj yog ib tug hluas nkauj uas zoo nkauj tshaj plaws huv tibsi! Koj ob txhais kotaw uas rau khau khiab ua cas yuav zoo nkauj ua luaj li. Koj ob txhais ncejpuab ntug ntoob zoo nkauj ib yam li tej nplhaib uas luag nchuav.

²Koj lub pujntaws zoo ib yam li lub ntim uas rau cawv txiv hmab tsis nqhuab li. Koj lub plab mog zoo ib yam li tes nplej uas muaj paj lilis nyob puagncig.

³Koj ob lub mis zoo ib yam li ib nkawm menyuam kauv ntxaib.

⁴Koj lub cajdab zoo ib yam li lub chaw tsomfaj uas muab kaus ntxhw ua. Koj ob lub qhovmuag zoo ib yam li tej pasdej hauv lub nroog Hesenpoos uas nyob ze lub roojvag ntawm lub nroog loj. Koj tus cajntswm ntxim nyiam ib yam li lub chaw tsomfaj pem Lenpanoos, uas yog qhov chaw fajxwm lub nroog Damaxes.

⁵Koj lub taubhau tsa siab ib yam li lub Roob Kalemees. Koj cov plaubhau ci ntaug lees li cov xov ntaub tsuj; cov plaubhau ntawd zoo nkauj kawg li, ua rau vajntxwv tsis nco qab mus kev.

⁶Ua li cas koj zoo nkauj thiab ntxim siab ua luaj! Tus uas ntxim hlub, ua cas koj yuav zoo tau txaus siab ua luaj.

⁷Koj lub cev yiag ib yam li tus toovlaj, thiab koj ob lub mis zoo ib yam li ob tauv txiv toovlaj.

⁸Kuv yuav nce tsob toovlaj thiab de nws cov txiv. Kuv saib koj ob lub mis zoo ib yam li tauv txiv hmab nyeg, koj ua pa tsw qab ntxiag ib yam li tej pa txiv duaj,

⁹thiab koj lub qhovncauj zoo li cov cawv txiv hmab uas qab tshaj plaws. Cia cov cawv txiv hmab nrog ncaj nraim mus rau ntawm tus uas kuv hlub, ntws mus ywg nws ob daim dincauj thiab nws cov hniav.

¹⁰Kuv yog tus uas kuv hlub tug thiab nws yeej xav tau kuv kawg li.

¹¹Tus uas kuv hlub, cia li tawm tuaj, wb mus rau sab nraum ntug nroog thiab mus pw ib hmos hauv tej zos.

¹²Wb yuav sawv ntxov mus saib lub vaj txiv hmab, saib tej hmab puas tau pib hlav nplooj, saib tej cos paj puas tau tawg, thiab saib tej ntoo txiv ntsiavkws puas tau tawg paj. Nyob qhov ntawd kuv mam muab kuv txojkev hlub rau koj.

¹³Koj yuav hnov tej zaub ntug hauvpaus tsw qab ntxiag, thiab txhua yam txiv uas wb nyiam noj yeej nyob ze ntawd wb qhovrooj. Tus uas kuv hlub, kuv yeej khaws tej txiv qub thiab tshiab uas zoo tshaj plaws rau koj.