Read Hmong Daw Yaxayas 11 Bible Online

Yaxayas 11 - Hmong Daw bible

Yaxayas 11

¹Daviv cajces zoo ib yam li tsob ntoo uas twb muab ntov lawm; tiamsis lub hauvpaus rov hlav dua ib tug ntsuag tshiab. Yog li ntawd, tus vajntxwv tshiab yuav sawv hauv Daviv cov xeebntxwv los.

²Vajtswv tus ntsujplig yuav pub kom nws muaj tswvyim, muaj kev txawj ntse thiab paub tswj nws haivneeg. Nws yuav paub tus TSWV lub siab nyiam thiab hwm tus TSWV,

³thiab nws nyob kaj siab lug vim nws mloog Vajtswv lus. Nws yuav tsis txiav txim raws li nws lub qhovmuag pom lossis nws lub pobntseg hnov,

⁴nws yuav txiav txim ncaj ncees rau cov neeg pluag thiab tsa cov neeg uas tsis muaj leejtwg pab txoj cai. Nws lo lus zoo li ib rab qws uas ntaus lub ntiajteb no, thiab nws tej pa yuav tua cov neeg siab phem.

⁵Kev ncaj ncees yuav ua nws txoj siv sia, thiab kev ua siab ncaj yuav ua pluaj ntaub rau nws pav duav.

⁶Hma thiab yaj yuav nyob tau ua ke, tsov pomtxwv yuav pw nrog menyuam tshis. Menyuam nyuj thiab menyuam tsov ntxhuav yuav noj zaub ua ke, thiab tej menyuam yaus yuav ua cov yug tej tsiaj ntawd.

⁷Nyuj thiab dais yuav noj zaub ua ke, menyuam nyuj thiab menyuam dais yuav pw ua ke. Tsov ntxhuav yuav noj quavnyab ib yam li nyuj noj.

⁸Txawm yog tus menyuam yaus uas tseem noj mis mus ua si ze ntawm tus nab muaj taug lub qhov los tsis ntshai, thiab menyuam yaus cev tes kov nab los nab tsis tom.

⁹Saum Xi-oos uas yog Vajtswv lub Roob dawbhuv yuav tsis muaj kev txhawj kev ntshai lossis kev phem kev qias. Tej neeg thoob ntiajteb yuav paub tus TSWV ib yam li dej puv nkaus hiavtxwv.

¹⁰Muaj ib hnub Yexais tus Cag yuav sawv ua ib yam cim tseemceeb rau txhua haivneeg pom; lawv yuav tuaj sib sau rau hauv nws lub nroog thiab hawm nws.

¹¹Hnub ntawd, tus Tswv yuav siv nws lub hwjchim mus coj nws haivneeg uas tseem tshuav nyob pem tebchaws Axilias thiab nyob nram tebchaws Iziv, hauv tebchaws Patalaus, tebchaws Sudas, tebchaws Elames, tebchaws Npanpiloos, tebchaws Hamas thiab tej tebchaws uas nyob raws ntug dej hiavtxwv, thiab tej koog povtxwv hauv hiavtxwv rov los nyob rau hauv lawv lub qub teb qub chaw dua.

¹²Tus Tswv yuav ua ib yam cim qhia rau txhua haivneeg paub hais tias nws tabtom sau cov Yixalayees thiab cov Yudas uas tau khiav mus nyob ua sab ua sua rau plaub ceg kaum ntuj lawm rov los nyob ua ke dua.

¹³Cov Yixalayees tej kev khib yuav yaj tas mus, cov Yudas tej yeebncuab yuav raug txiav kom tu; cov Yixalayees yuav tsis khib cov Yudas ntxiv, thiab cov Yudas yuav tsis ua yeebncuab rau cov Yixalayees lawm.

¹⁴Lawv yuav sau zog ua ke mus tawmtsam cov Filitees uas nyob sab hnubpoob, thiab lawv ua ke mus huab cov neeg uas nyob sab hnubtuaj. Lawv yuav tua yeej cov Edoos thiab cov Mau-am, thiab cov Amoos yuav mloog lawv lus.

¹⁵Tus TSWV yuav ua kom Hiavtxwv Xu-es qhuav thiab tso khaub zeeg cua ntsawj tus Dej Efalates kom nqhuab, tsuas tseg xya ceg dej me xwb kom leejtwg los hla tau.

¹⁶Yuav muaj ib txojkev loj hauv tebchaws Axilias rau nws haivneeg Yixalayees taug rov los ib yam li thaum ub lawv cov yawgkoob rov nram tebchaws Iziv los.