Read Hmong Daw Yaxayas 12 Bible Online

Yaxayas 12 - Hmong Daw bible

Yaxayas 12

¹Hnub ntawd tej neeg yuav hu nkauj hais tias, “Tus TSWV, kuv ua koj tsaug! Koj tau chim heev rau kuv, tiamsis nimno koj tsis chim thiab koj nplig kuv lub siab lawm.

²Vajtswv yeej yog kuv tus cawmseej; kuv yuav cia siab rau nws thiab yuav tsis muaj kev ntshai li. Tus TSWV yog kuv lub zog kuv thiaj hu nkauj qhuas nws; thiab nws yog kuv tus cawmseej.

³Cov neeg nqhis dej zoo siab heev rau cov dej ntshiab li cas, Vajtswv haivneeg zoo siab heev thaum nws cawm lawv dim li ntawd.”

⁴Txog hnub ntawd, cov neeg yuav hu nkauj zoo siab hais tias, “Ua tus TSWV tsaug! Hu nws los pab nej los mas! Qhia tej uas nws tau ua tas los rau txhua haivneeg; Qhia nws lub hwjchim uas loj kawg nkaus rau lawv paub!

⁵Cia li hu nkauj qhuas Vajtswv vim nws tau ua tej txujci tseemceeb. Cia kom lub ntiajteb tau hnov zaj no.

⁶Nej txhua tus uas nyob hauv lub nroog Xi-oos cia li qw thiab hu nkauj! Cov Yixalayees tus Vajtswv uas dawbhuv yog tus muaj hwjchim loj kawg nkaus, nws nyob nrog nraim nws haivneeg.”