Read Hmong Daw Yaxayas 2 Bible Online

Yaxayas 2 - Hmong Daw bible

Yaxayas 2

¹Tej lus uas Vajtswv qhia rau Amauxes tus tub Yaxayas kom hais rau cov Yudas thiab lub nroog Yeluxalees:

²Yav tom ntej no lub roob uas lub Tuamtsev nyob rau saud yuav siab dua tej hau roob txhua lub huv tibsi; ntau haivneeg yuav sau nthwv tuaj rau saum lub roob ntawd.

³Ntau haivneeg yuav tuaj thiab hais tias, “Peb cia li mus saum tus TSWV lub roob, mus kom txog saum cov Yixalayees tus Vajtswv lub Tuamtsev. Nws yuav qhia peb tej uas nws xav kom peb ua; peb yuav taug txojkev uas nws xaiv rau peb taug. Vajtswv tej lus qhuab qhia tawm hauv lub nroog Yeluxalees tuaj; thiab nws hais lus hauv Xi-oos tuaj rau nws haivneeg.”

⁴Nws yuav ua tus txiav txim rau txhua haivneeg, lawv yuav muab lawv tej ntaj thiab riam los ntaus ua khais thiab muab tej hmuv ntaus ua liag. Ntau haivneeg yuav tsis ua tsov ua rog thiab yuav tsis muaj leejtwg npaj cuabyeej sib nkaug sib tua ntxiv li lawm.

⁵Yakhauj cov xeebntxwv, nimno peb cia li taug txojkev kaj nrig uas tus TSWV twb pub rau peb lawm.

⁶Vajtswv, koj tau muab koj haivneeg uas yog Yakhauj cov xeebntxwv tso povtseg lawm! Rau qhov lawv lub tebchaws puv nkaus cov neeg ua khawvkoob uas tuaj sab hnubtuaj tuaj thiab tuaj hauv tebchaws Filitees tuaj. Lawv xyaum ua raws li cov neeg txawv tebchaws ua.

⁷Lawv lub tebchaws muaj nyiaj muaj kub nplua mias, thiab lawv tej nyiaj txiag yeej tsis paub tas ib zaug li. Lawv lub tebchaws los muaj nees nyob puv nkaus hauv, thiab lawv ua tsheb nees tsis paub tso tseg li.

⁸Mlom nyob puv nkaus hauv lawv lub tebchaws, thiab lawv pe tej uas lawv txhais tes puab.

⁹Lawv txhua tus yuav raug txo hwjchim thiab poob ntsejmuag. Tus TSWV, thov tsis txhob zam txim rau lawv hlo li!

¹⁰Lawv yuav khiav mus nkaum hauv tej qhov tsua saum tej roob tsuas lossis khawb qhov nkaum kom dim tus TSWV txojkev chim, thiab khiav nkaum nws lub hwjchim thiab lub tshwjchim uas ci ntsa iab!

¹¹Hnub ntawd cov neeg khavtheeb yuav raug txo hwjchim, thiab thaum ntawd cov neeg siab phem yuav raug kev puastsuaj. Ces Vajtswv tib leeg xwb thiaj yog tus zoo tshaj plaws.

¹²Hnub ntawd tus TSWV uas muaj hwjchim loj kawg nkaus yuav muab txhua tus uas muaj hwjchim, txhua tus uas khavtheeb, thiab cov neeg uas xav ua tus loj txo hwjchim kom tas.

¹³Nws yuav ua kom cov ntoo ciab pem roob Lenpanoos, thiab tagnrho cov ntoo qhib hauv tebchaws Npasas puastsuaj tas huv tibsi.

¹⁴Nws yuav rhuav tshem tej roob siab thiab tej hauv roob kom puastsuaj,

¹⁵rhuav txhua lub chaw tsomfaj, thiab tej ntsa yeej uas txhim zeb khov kho;

¹⁶rhuav cov Xapees tej nkoj thiab tej nkoj uas zoo nkauj kom tawg tas.

¹⁷Cov neeg khavtheeb yuav raug txo kom qis thiab muab cov neeg nruj tsiv ua kom puastsuaj. Hnub ntawd tus TSWV tib leeg yog tus yuav tau ntsejmuag.

¹⁸Thiab tej mlom yuav ploj mus tas huv tibsi.

¹⁹Tej neeg sawvdaws yuav khiav mus nkaum tas rau hauv tej qhov tsua saum tej roob tsuas lossis khawb qhov nkaum kom dim tus TSWV txojkev chim thiab khiav nkaum nws lub hwjchim thiab lub tshwjchim uas ci ntsa iab, thaum nws nqis los co lub ntiajteb no.

²⁰Hnub ntawd lawv yuav muab tej nyiaj, tej kub, thiab tej mlom uas lawv puab coj mus povtseg kom tas huv tibsi, thiab tso tseg rau nas tsuag thiab puav los ua zes rau.

²¹Thaum Vajtswv nqis los co lub ntiajteb, tej neeg sawvdaws yuav khiav mus nkaum hauv tej qhov av thiab qhov tsua saum tej roob tsuas kom thiaj khiav dim nws txojkev chim, nws lub hwjchim thiab lub tshwjchim uas ci ntsa iab.

²²Tsis txhob tso siab rau cov neeg uas txawj tuag. Lawv muaj nqis npaum li cas?