Read Hmong Daw Yaxayas 25 Bible Online

Yaxayas 25 - Hmong Daw bible

Yaxayas 25

¹Tus TSWV, koj yog kuv tus Vajtswv; kuv yuav hwm koj thiab qhuas koj lub npe. Koj tau ua ntau yam txujci tseemceeb tiav tas los lawm; koj ua ncaj ua ncees thiab ua tseeb raws li koj tau npaj tseg puag thaum ub los lawm.

²Koj tau ua rau ntau lub nroog puastsuaj tas, thiab muab lawv tej chaw fajxwm rhuav povtseg huv tibsi. Tej loog uas peb cov yeebncuab ua tseg rau hauv lub nroog yuav tsis txhim kho ntxiv mus tas ibtxhis.

³Txhua haivneeg uas muaj zog yuav qhuas koj; Tej nroog uas tej haivneeg limhiam nyob yuav ntshai koj.

⁴Koj yog lub chaw cawm siav rau cov neeg pluag thiab txomnyem, thiab cawm lawv dim thaum lub sijhawm uas lawv ntsib kev nyuaj siab. Koj yog lub tsev rau lawv nraim nagxob nagcua thiab yog tus duab ntxoov ntxoo rau lawv nraim tshav. Cov neeg limhiam ntaus lawv ib yam li cua daj cua dub ntsawj thaum lub caij ntuj no,

⁵thiab ib yam li tshav kub heev hauv lub tebchaws ntuj qhua teb nkig. Tiamsis Vajtswv, koj tau ua rau peb tej yeebncuab ploj tas lawm; koj ua rau cov neeg limhiam tej suab qw ntsiag tas ib yam li tauv huab roos tshav ntuj kub.

⁶Nyob saum Roob Xi-oos, tus TSWV uas muaj hwjchim loj kawg nkaus yuav npaj ib rooj mov rau txhua haivneeg hauv ntiajteb noj, yog ib rooj mov uas muaj tej zaub mov thiab tej cawv uas qab heev.

⁷Thaum nyob saum lub roob nws yuav muab txhua haivneeg tej kev nyuaj siab uas zoo ib yam li tauv huab tshem mus povtseg.

⁸Tus TSWV uas kav ib puas tsav yam yuav rhuav txojkev tuag kom puastsuaj mus ibtxhis; nws yuav so txhua tus lub kua muag, thiab nws yuav rhuav qhov uas lub ntiajteb no tsimtxom nws haivneeg. Tus TSWV yog tus hais tej lus no.

⁹Thaum muaj tej xwmtxheej no lawm, txhua tus neeg yuav hais tias, “Nws yog peb tus Vajtswv! Peb tso siab plhuav rau nws, thiab nws tau cawm peb txojsia. Nws yog tus TSWV! Peb tso siab plhuav rau nws; nimno peb zoo siab thiab xyivfab heev vim nws cawm peb dim lawm.”

¹⁰Tus TSWV yuav tsomkwm lub roob Xi-oos no, tiamsis yuav tsuj cov Mau-am ib yam li tsuj tej quavnyab npleg rau hauv pashawv.

¹¹Lawv tsa tes ib yam li yuav ua luam dej, tiamsis tus TSWV yuav ua kom lawv poob ntsejmuag, thiab lawv tej npab yuav tsaug leeg.

¹²Nws yuav muab cov Mau-am tej chaw tsomfaj thiab lawv tej ntsa yeej uas siab rhuav kom puastsuaj thiab tsoo kom tawg tas xyaw hmoov av.