Read Hmong Daw Yaxayas 26 Bible Online

Yaxayas 26 - Hmong Daw bible

Yaxayas 26

¹Hnub ntawd yuav hu zaj nkauj no nyob hauv tebchaws Yudas: Peb muaj ib lub nroog ruaj khov heev; Vajtswv yog tus ntsa yeej uas thaiv lub nroog kom muaj txojkev cawm dim.

²Cia li qhib tej roojvag nroog tso haivneeg ncaj ncees uas ua raws li Vajtswv lub siab nyiam mus nyob hauv lub tebchaws ntawd.

³Tus TSWV, koj muab txojkev kaj siab uas zoo kawg nkaus rau cov neeg uas muab siab npuab koj, vim lawv tso siab pluav rau koj.

⁴Cia siab rau tus TSWV; nws yuav ua phab pobzeb tiv thaiv peb mus ibtxhis.

⁵Nws txo kom cov neeg khavtheeb poob hwjchim; nws muab cov neeg uas muaj zog lub nroog rhuav kom puastsuaj, thiab muab tej ntsa yeej tsoo kom vau tas rau hauv av.

⁶Nimno cov neeg txomnyem thiab cov neeg pluag yuav muab lub nroog ntawd tsuj nthi rau hauv lawv xibtaws.

⁷Tus TSWV, koj ua txojkev du heev rau cov neeg ncaj ncees taug; txojkev uas lawv taug tiaj heev.

⁸Peb yeej coj rawv koj txoj kevcai, thiab peb tos rawv koj ib leeg xwb; peb nco ntsoov koj lub npe rau nruab siab.

⁹Hmo ntuj kuv lub siab xav ntsoov txog koj; nruab hnub kuv lub siab xyivfab hlo nrhiav koj. Thaum koj txiav txim rau neeg ntiajteb, lawv yuav paub koj txojkev ncaj ncees.

¹⁰Txawm yog koj ua zoo npaum twg rau cov neeg siab phem los lawv yeej tsis paub txojkev ncaj ncees hlo li. Txawm yog lawv nyob hauv lub tebchaws uas muaj kev ncaj ncees no los lawv tseem pheej ua kev txhaum tsis tseg thiab tsis lees paub koj lub hwjchim uas loj kawg nkaus.

¹¹Tus TSWV, koj yeej tsa tes siab kawg, tiamsis lawv tsis pom li. Cia lawv pom koj txojkev mob siab rau koj haivneeg, thiab cia lawv raug txajmuag. Cia cov hluavtaws uas koj npaj tseg rau koj cov yeebncuab kub lawv.

¹²Tus TSWV, koj pub kev thajyeeb rau peb; txhua tsav yam uas peb ua tiav lawm, twb yog koj pab peb.

¹³Tus TSWV uas yog peb tus Vajtswv, peb raug lwm tus tswv kav peb, tiamsis peb lees paub koj lub npe nkaus xwb.

¹⁴Nimno lawv twb tuag tas thiab tsis ciaj sia li lawm. Lawv tej ntsujplig yuav tsis sawv, vim koj yog tus rau txim rau lawv thiab ua kom lawv puastsuaj.

¹⁵Tiamsis tus TSWV, koj tau ua rau peb haivneeg huamvam thiab, nthuav peb lub tebchaws kom dav, koj yuav tau txais koob meej zoo kawg nkaus li.

¹⁶Tus TSWV, koj rau txim rau koj haivneeg, thiab lawv yuav thov koj thaum lawv raug kev nyuaj siab.

¹⁷Tus TSWV, koj ua rau peb quaj ib yam li tus pojniam uas quaj thaum nws mob plab yug menyuam.

¹⁸Peb suab menyuam thiab mob plab, tiamsis peb yug tsis tau dabtsi. Peb coj tsis tau kev cawm dim los rau hauv lub ntiajteb, thiab peb muab tsis tau txojsia rau neeg los yug hauv ntiajteb no.

¹⁹Peb cov neeg uas tuag lawm yuav rov muaj sia dua! Lawv tej cev yuav sawv rov qab los muaj sia. Cov neeg uas pw hauv tej qhov ntxa yuav sawv los hu nkauj zoo siab. Yog li ntawd, Vajtswv yuav tsa cov neeg uas tuag tau ntev lawm sawv los ib yam li lub lwg dej uas ci rau lub ntiajteb thaum sawv ntxov.

²⁰Kuv haivneeg, nej cia li khiav rov qab mus rau hauv nej tej tsev thiab kaw qhovrooj rau. Nkaum tos kom Vajtswv txojkev chim dhau tso.

²¹Tus TSWV nqis saum ntuj uas yog nws qhov chaw nyob los rau txim rau neeg ntiajteb, vim lawv tej kev txhaum. Av yuav tsis nqus cov neeg uas raug luag tua tej ntshav, thiab lub ntiajteb yuav tsis faus cov neeg uas raug luag tua tuag lub cev.