Read Hmong Daw Yaxayas 40 Bible Online

Yaxayas 40 - Hmong Daw bible

Yaxayas 40

¹Vajtswv hais tias, “Nplig kuv haivneeg lub siab, nplig lawv siab los mas!

²Txhawb cov neeg uas nyob hauv lub nroog Yeluxalees zog. Qhia rau lawv hais tias lawv twb raug kev txomnyem txaus lawm, thiab nimno kuv twb zam lawv tej kev txhaum tas lawm. Kuv rau txim ob npaug rau lawv tej kev txhaum.”

³Muaj ib lub suab qw hais tias, “Kho kev tom roob mojsab qhua tos tus TSWV! Kho kev tom tiaj suabpuam kom ncaj rau tus TSWV!

⁴Txhub txhua lub kwjha kom puv, muab txhua lub roob thiab ncov roob khawb kom tiaj; tej qhov zawj muab txhub kom sib txig, thiab muab qhov siab thiab qhov qis pheej kom tiaj xwmyeem.

⁵Thaum ntawd tus TSWV yuav muab nws lub tshwjchim uas ci ntsa iab nthuav qhia rau neeg txhua tus pom. Tus TSWV yog tus hais tej lus no ntag.”

⁶Muaj ib lub suab qw hais tias, “Cia li qhia rau sawvdaws!” Kuv nug hais tias, “Kuv yuav qhia dabtsi? Qhia hais tias, txhua tus neeg zoo ib yam li tej nroj tsuag; lawv ua neej nyob ntev ib yam li tej paj ntoos xwb.

⁷Thaum tus TSWV tshuab pa tuaj ntsawj tej nroj tsuag qhuav, tej paj los yuav zeeg tas; neeg zoo ib yam li tej nroj tsuag ntawd.

⁸Tej nroj yeej txawj qhuav thiab tej paj yeej txawj zeeg; tiamsis peb tus Vajtswv txojlus nyob mus ibtxhis li.”

⁹Yeluxalees cia li nce mus rau saum roob siab, thiab qhia txojmoo zoo! Xi-oos cia li hu nrov nrov tshaj tawm txojmoo zoo!

¹⁰Tus TSWV uas yog Vajtswv nrog nws lub hwjchim los thiab nws txhais npab yuav tswjhwm. Nws coj nqi zog los rau cov neeg uas nws cawm dim lawm.

¹¹Nws yuav tu nws pab yaj ib yam li tus tswv yug yaj, nws yuav sau zog tej menyuam yaj los puag rau ntawm nws ob txhais npab, nws yuav muab lawv puag hlo rau hauv nws lub xubntiag, thiab ua siab ntev coj tej yaj uas muaj menyuam mos.

¹²Leejtwg muaj peevxwm muab phoovtes yeem dej hiavtxwv saib hnyav npaum li cas lossis muab nws txhais tes ntsuas tau lub ntuj? Leejtwg muaj peevxwm muab lub ntiajteb no sau los ntim rau hauv khob lossis muab tej hauv roob thiab tej ncov roob los tso rau saum teev luj?

¹³Leejtwg thiaj muaj peevxwm qhia tau tus TSWV tus Ntsujplig lossis ua tau nws tus tuavxam uas qhia nws?

¹⁴Vajtswv nrog leejtwg tuavxam kom nws thoob tsib to nrog, thiab leejtwg qhia txojkev ncaj ncees, kev txawj ntse, kev totaub thiab kev paub rau nws?

¹⁵Txhua haivneeg twb tsis muaj nqis dabtsi rau tus TSWV li, twb tsis npaum li teev dej uas nrog ntawm lub tshob los; nws suav hais tias lawv zoo li tej hmoov av uas lo ntawm rab teev xwb; thiab nws nqa tej koog povtxwv sib ib yam li tej hmoov av.

¹⁶Txawm yog tej tsiaj pem Lenpanoos los twb tsis txaus tua hlawv fij rau Vajtswv, thiab tej ntoo los yeej tsis txaus ua taws hlawv.

¹⁷Tus TSWV suav hais tias txhua haivneeg yeej tsis tseemceeb dabtsi thiab tsis muaj nqis dabtsi rau tus TSWV hlo li.

¹⁸Nej yuav muab Vajtswv piv rau leejtwg? Nej yuav ua li cas piav tau hais tias nws tus yam ntxwv zoo li cas?

¹⁹Nws tsis zoo li tus mlom uas neeg puab uas muab kub los vuam rau thiab muab saw nyiaj dai rau.

²⁰Tus neeg pluag uas tsis muaj nyiaj tsis muaj kub coj mus fij, nws mus xaiv tej ntoo uas tsis txawj lwj coj los fij. Nws coj mus rau tus kws txua ntoo txua ib tug mlom uas tsis txawj txav taw rau nws.

²¹Tsis muaj neeg qhia rau nej paub li los? Nej tsis tau hnov dua li los? Nej tsis paub hais tias lub ntiajteb no pib li cas los li los?

²²Tus tsim lub ntiajteb no yog tus zaum saum lub zwmtxwv uas siab kawg nkaus; nws tuaj saud ntsia neeg ntiajteb luaj li tus kooj xwb. nws muab lub ntuj nthuav ib yam li daim ntaub qhovrai, thiab nthuav lub ntiajteb zoo ib yam li lub tsevntaub rau neeg nyob.

²³Nws muab cov nomtswv txo kom poob hwjchim thiab ua rau lawv tsis muaj nqis dabtsi hlo li.

²⁴Lawv zoo ib yam li tej yub zaub uas muab cog kiag ces txawm nrhau cag, thaum Vajtswv ua pa tej yub zaub cia li ntsws thiab tuag tas thiab ya ri niab ib yam li tej quavnyab npleg.

²⁵Vajtswv tus uas dawbhuv nug hais tias, nej muab kuv piv rau leejtwg, thiab kuv zoo li leejtwg?

²⁶Tsa koj ob lub qhovmuag ntsia saum nruab ntug saib! Leejtwg yog tus tsim tej hnubqub uas koj pom ntawd? Nws coj tej hnubqub ntawd tawm tuaj ua tsheej pab ib yam li pab tubrog, nws paub muaj pestsawg lub thiab nws tis npe rau txhua lub nyias muaj nyias npe. Nws lub hwjchim thiab lub zog kav tej ntawd thiaj tsis muaj ib lub ploj li.

²⁷Cov Yixalayees, vim li cas nej thiaj yws hais tias tus TSWV tsis pom txog nej tej kev txomnyem lossis tsis pab thaum nej raug luag ua tsis ncaj rau nej?

²⁸Nej tsis tau paub dua li los? Nej tsis tau hnov dua li los? Tus TSWV yog Vajtswv tus uas muaj sia nyob mus ibtxhis, nws tsim tagnrho lub ntiajteb no. Nws ibtxwm tsis tsaug leeg lossis qaug zog ib zaug li. Tsis muaj leejtwg paub txog nws lub siab xav hlo li.

²⁹Nws ntxiv zog rau tus uas qaug zog thiab tus tsaug leeg kom tus ntawd rov muaj zog tuaj.

³⁰Txawm yog tej hluas los lawv yeej txawj qaug zog, thiab cov tub hluas los ntog pujpoog;

³¹tiamsis cov neeg uas cia siab ntsoov rau tus TSWV yuav muaj zog, lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.