Read Hmong Daw Yaxayas 41 Bible Online

Yaxayas 41 - Hmong Daw bible

Yaxayas 41

¹Vajtswv hais tias, “Tej tebchaws uas nyob deb, nej cia li mloog kuv hais thiab nyob twjywm! Nej cia li npaj mus hais plaub hauv tsev tu plaub; nej yuav muaj sijhawm hais nej zaj. Cia peb ua ke mus txiav txim saib leejtwg yog tus muaj cai.

²“Leejtwg mus zes tus uas muaj yeej tim sab hnubtuaj tuaj, thiab cia nws kovyeej txhua qhov txhia chaw uas nws mus lawm? Leejtwg cia nws tua yeej txhua tus vajntxwv thiab txhua haivneeg? Nws rab ntaj tua lawv ntog pawglug ib yam li lawv yog tej hmoov av xwb. Nws rab hneevnti tua lawv tawg khiav ri niab ib yam li cua ntsawj tej quavnyab npleg ya.

³Nws caum lawv qab thiab khiav huas lawv ntej mus tsis raug xwmtxheej dabtsi; nws khiav ceev heev kotaw yuav luag tsis chwv av.

⁴Leejtwg yog tus ua kom muaj tej xwm no tshwmsim tuaj? Leejtwg yog tus uas teev caij nyoog keebkwm thaum ub los? Kuv yog tus TSWV uas nyob thaum chivkeeb, thiab kuv yog tus uas yuav nyob thaum kawg.

⁵“Cov neeg uas nyob tej tebchaws deb pom tej haujlwm uas kuv ua tas los lawm, lawv ntshai tshee hnyo. Yog li ntawd, lawv thiaj sib sau tuaj ua ke.

⁶Txhua tus nyias pab nyias tej kwvtij zejzog thiab hais rau lawv tej kwvtij hais tias, ‘Ua siab loj tsis txhob ntshai.’

⁷Tus kws txua ntoo txhawb tus kws nchuav kub zog hais tias, ‘Zoo kawg li!’ Tus uas muab rauj ntaus tej mlom kom du ntaug lees txhawb tus uas muab ntsia los ntsia lub zog. Lawv hais tias, ‘Ham tau zoo kawg li’, thiab lawv muab ntsia hlau ntsia tus mlom ntawd rau ntawm nws qhov chaw.

⁸“Tiamsis nej cov Yixalayees uas yog kuv cov tubtxib, Yakhauj tus uas kuv tau xaiv tseg, thiab yog kuv tus phoojywg Anplahas cov xeebntxwv;

⁹nej yog cov uas kuv tau coj puag tim qab ntuj kawg rov los thiab hu nej puag tim plaub ceg kaum ntuj uas deb kawg nkaus los. Kuv hais rau nej hais tias, ‘Nej yog kuv cov tubtxib,’ kuv twb xaiv nej cia lawm thiab kuv tsis tso nej tseg ib zaug li;

¹⁰nej tsis txhob ntshai, rau qhov kuv nrog nraim nej, kuv yog nej tus Vajtswv, nej tsis txhob poob siab; Kuv yuav pab nej thiab txhawb kom nej muaj zog, kuv sab tes xis yuav puag rawv nej.

¹¹“Cov neeg uas chim rau nej, lawv yuav swb thiab raug txajmuag; cov neeg uas tawmtsam nej, lawv yuav puastsuaj thiab tuag tas.

¹²Nej mus nrhiav cov neeg uas tawmtsam nej, tiamsis nej tsis ntsib lawv; cov neeg uas ua rog rau nej, lawv yuav puastsuaj thiab tuag tas.

¹³Kuv yog tus TSWV, nej tus Vajtswv; kuv yeej tuav rawv nej sab tes xis, thiab kuv hais rau nej hais tias, ‘Tsis txhob ntshai kuv yuav pab nej!’ ”

¹⁴Tus TSWV hais tias, “Cov Yixalayees uas yog Yakhauj cov xeebntxwv! Kuv yog cov Yixalayees tus Vajtswv uas dawbhuv, kuv yuav pab nej thiab txhiv kom nej dim.

¹⁵Kuv yuav ua kom nej zoo ib yam li lub tshuab zom nplej uas hniav tshiab thiab ntse zuag plias. Nej yuav ntaus tej hauv roob thiab muab tsoo kom tawg ntsoog ntxaws, thiab nej yuav muab tej ncov roob tsoo kom ua hmoov tas.

¹⁶Nej yuav tsuab lawv w rau saum nruab ntug, cua yuav muab lawv ntsawj ya mus povtseg, thiab cua daj cua dub yuav muab lawv ntsawj ya ri niab. Thiab nej yuav zoo siab heev, rau qhov kuv yog nej tus Vajtswv; nej yuav qhuas kuv uas yog cov Yixalayees tus Vajtswv uas dawbhuv.

¹⁷“Thaum kuv haivneeg uas pluag thiab txomnyem tuaj nrhiav dej haus, thaum lawv nqhis dej qa qhuav qhawv lawm, kuv uas yog tus TSWV mam li teb lawv tej lus thov, kuv uas yog cov Yixalayees tus Vajtswv tsis tso lawv tseg li.

¹⁸Kuv yuav ua kom muaj dej txhawv saum tej roob qhua thiab ua kom dej txhawv hauv tej hav. Kuv yuav ua rau tej tiaj suabpuam kom muaj pasdej txhua qhov.

¹⁹Kuv yuav ua kom ntoo thuv, ntoo akaxias, ntoo lwgzaj thiab ntoo ntseej, tuaj taus saum tej roob mojsab qhua uas qhuav nkig nkuav. Kuv yuav ua kom tiaj suabpuam ciaj zoov nujtxeeg, ntoo thuv, ntoo ciab thiab ntoo roj yuav tuaj ua ke.

²⁰Cia neeg ntiajteb pom thiab paub hais tias kuv yog tus TSWV uas ua tej no. Lawv thiaj yuav paub hais tias haivneeg Yixalayees tus Vajtswv dawbhuv yog tus uas tsim tej no.”

²¹Tus TSWV uas yog Yakhauj tus Vajtswv hais tias, “Cia li tuaj hais nej rooj plaub thiab coj nej lub tswvyim uas txawj sib cav tshaj plaws nrog nej tuaj ntawm no!

²²Cia lawv coj lawv tej mlom tuaj, thiab kom tej mlom ntawd qhia rau peb saib yuav muaj dabtsi tshwmsim thiab. Qhia tej xwmtxheej puag thaum ub rau peb saib yog dabtsi, peb thiaj paub tej ntawd, thiab peb thiaj paub hais tias lawv tawm qhov twg los; lossis qhia tej yam uas yuav tshwmsim los yav tom ntej rau peb.

²³Qhia kom peb paub saib yuav muaj dabtsi tshwmsim los yav tom ntej no kom peb thiaj paub hais tias nej yog vajtswv tiag! Ua tej yam zoo lossis tej yam phem kom peb ntshai thiab yoob tas saib!

²⁴Nej tsis tseemceeb dabtsi, thiab tej uas nej ua los tsis muaj qabhau; cov neeg uas xaiv nej ua lawv tej vajtswv mas vuabtsuab kawg li.

²⁵“Kuv twb xaiv ib tug neeg uas nyob sab Hnubtuaj tseg lawm, kuv yuav coj nws pem sab qaumteb tuaj tua nej. Nws yuav tsuj cov nomtswv ib yam li tsuj tej hmoov av, thiab zoo li tus puab laujkaub tsuj tej av nplaum.

²⁶Leejtwg qhia zaj no thaum ub lawm peb thiaj paub lossis qhia ua ntej peb thiaj hais tau hais tias, ‘Nws hais yog lawm’? Nej tsis muaj ib tug twg hais txog zaj no, tsis muaj leejtwg hnov nej piav ib los hlo li.

²⁷Kuv yog tus TSWV, kuv twb qhia tej xov zoo rau lub nroog Xi-oos lawm; Kuv txib ib tug xa xov mus qhia lub nroog Yeluxalees hais tias, ‘Koj cov pejxeem tabtom los lawm! Lawv tabtom los tsev!’

²⁸Thaum kuv ntsia cov mlom ntawd, lawv hais tsis tau lus; tsis muaj ib tug twg teb tau tej lus uas kuv nug hlo li.

²⁹Tagnrho cov mlom no tsis muaj qabhau kiag li; lawv ua tsis tau ib yam dabtsi, cov mlom ntawd tsis muaj zog thiab tsis muaj hwjchim.”