Read Hmong Daw Yaxayas 45 Bible Online

Yaxayas 45 - Hmong Daw bible

Yaxayas 45

¹Tus TSWV xaiv Xailas ua vajntxwv. Tus TSWV tsa Xailas tua kom yeej txhua haivneeg; nws txib Xailas mus txo tej vajntxwv kom poob hwjchim; tus TSWV yuav qhib ntau lub nroog tej roojvag rau nws txeem mus rau hauv. Tus TSWV thiaj hais rau Xailas hais tias,

²“Kuv yuav ua koj ntej mus kho kev rau koj, thiab muab tej hauv roob nphau kom tiaj sib txig. Kuv yuav tsoo tej roojvag tooj kom tawg ua tej daim, thiab muab tej nqaj hlau txiav kom tu tas huv tibsi.

³Kuv yuav muab tej nyiaj hauv qhov tsaus ntuj nti uas tsis muaj leejtwg paub pub rau koj, ces koj thiaj yuav paub hais tias kuv yog tus TSWV uas yog cov Yixalayees tus Vajtswv tuav koj lub npe hu koj.

⁴Vim kuv pom txog Yakhauj tus uas yog kuv tus tubtxib, thiab cov Yixalayees uas kuv xaiv tseg lawm, kuv thiaj tuav koj lub npe hu koj; txawm yog koj tsis paub kuv los kuv twb pub rau koj tau koob meej lawm.

⁵“Kuv yog tus TSWV, yeej tsis muaj dua lwm tus Vajtswv li lawm; txawm yog koj tsis paub kuv los kuv yuav txhawb koj lub zog.

⁶Kuv ua li no kom txhua tus uas nyob thoob qab ntuj paub hais tias kuv yog tus TSWV thiab tsis muaj dua lwm tus vajtswv lawm.

⁷Kuv tsim qhov kaj thiab qhov tsaus, kuv yog tus pub koob hmoov thiab tso kev puastsuaj los. Kuv yog tus TSWV, tej no puavleej yog kuv tsim huv tibsi.

⁸Kuv yuav tso kev muaj yeej ib yam li nag los saum ntuj los; lub ntiajteb yuav tau txais txojkev muaj yeej ntawd; kev thajyeeb thiab kev ncaj ncees yuav tawg paj txi txiv hauv lub ntiajteb. Kuv yog tus TSWV tus uas yuav ua kom tej no tshwmsim los.”

⁹Lub laujkaub av muaj cuabkav nrog tus uas puab laujkaub sib cav los? Nws tsuas yog ib lub laujkaub uas zoo li lwm lub thiab xwb. Cov av nplaum puas nug tus uas puab lub laujkaub hais tias, “Koj ua dabtsi?” Lub laujkaub puas yws tus uas puab lub laujkaub hais tias, “Koj twb tsis txawj puab li los sav!”

¹⁰Tus uas nug nws niam nws txiv hais tias, “Vim li cas neb yug tau kuv zoo li no?” Tus ntawd yuav raug kev puastsuaj.

¹¹Tus TSWV uas yog cov Yixalayees tus Vajtswv uas dawbhuv, yog tus npaj tej uas yuav muaj los yav tom ntej; nws hais tias nej tsis muaj cai yuav nug txog kuv cov menyuam lossis qhia haujlwm rau kuv ua li!

¹²Kuv yog tus uas tsim lub ntiajteb thiab tsim neeg los nyob rau hauv. Kuv siv kuv lub hwjchim los nthuav lub ntuj; kuv kav lub hnub, lub hli thiab tej hnubqub huv tibsi.

¹³Kuv tshoov Xailas siab kom nws ua tej no tiav raws li kuv npaj tseg thiab kho tej uas tsis zoo kom zoo. Txhua txojkev uas nws taug kuv yuav kho kom ncaj. Nws yuav rov txhim kho kuv lub nroog Yeluxalees dua tshiab, thiab tso kuv cov neeg uas raug luag ntes mus kom dim rov los. Tsis muaj leejtwg ntiav lossis muab nyiaj xiab kom nws ua tej no li. Tus TSWV uas muaj hwjchim loj kawg nkaus yog tus hais tej lus no ntag.

¹⁴Tus TSWV hais rau cov Yixalayees hais tias, “Cov Iziv thiab cov Sudas tej nyiaj yuav yog nej tug, thiab cov neeg Xenpas uas loj siab yuav tau ua nej qhev; luag yuav muab saw hlau khi rawv lawv mus ua nej qab. Lawv yuav txhos caug ntua pe nej thiab lees hais tias, ‘Vajtswv nrog nraim nej nyob thiab nws tib leeg xwb thiaj yog Vajtswv.

¹⁵Cov Yixalayees tus Vajtswv uas cawm nws haivneeg dim kev puastsuaj, yog tus Vajtswv uas tsis tshwm rau leejtwg pom.

¹⁶Cov neeg uas puab mlom yuav raug txajmuag thiab poob ntsejmuag.

¹⁷Tiamsis tus TSWV yog tus uas cawm cov Yixalayees dim; lawv yuav kovyeej mus ibtxhis thiab lawv yuav tsis poob ntsejmuag ib zaug li.’ ”

¹⁸Tus TSWV yog tus uas tsim lub ntuj, nws tib leeg thiaj yog Vajtswv. Nws yog tus uas tsim lub ntiajteb, nws ua kom ntiajteb nyob ruaj khov mus ibtxhis. Nws tsis tau tsim lub ntiajteb los nyob do cuas tsis muaj dabtsi, tiamsis nws tsim los rau neeg nyob. Nws yog tus uas hais tias, “Kuv yog tus TSWV, tsis muaj dua lwm tus vajtswv lawm.

¹⁹Kuv tsis tau hais nraim nkoos tsis pub leejtwg hnov lossis npog tej uas kuv ua lub ntsiab tsis pub leejtwg paub. Kuv tsis tau hais kom cov Yixalayees tuaj nrhiav kuv hauv qhov tsaus ntuj nti. Kuv yog tus TSWV, kuv hais tej lus tseeb xwb; thiab yam uas yog, kuv thiaj qhia rau sawvdaws paub.”

²⁰Tus TSWV hais tias, “Nej txhua haivneeg uas dim kev tuag ntawd, nej cia li sib sau los ua ke thiab txav los kom ze! Tej neeg nqa rawv tej mlom ntoo thiab thov tej vajtswv uas cawm tsis tau lawv. Lawv tsis paub dabtsi.

²¹Cia li tuaj rau hauv tsev tu plaub thiab peev nej tej lus; cia cov neeg uas lawv hais daws lawv zaj sib tuavxam ua ke. Leejtwg piav tej no thaum ub los lawm, tsis yog kuv uas yog tus TSWV piav los? Kuv yog Vajtswv tus dawbhuv thiab yog tus cawmseej, yeej tsis muaj dua lwm tus vajtswv li lawm.

²²“Txhua haivneeg uas nyob hauv ntiajteb, cia li tig los cuag kuv nej thiaj yuav dim! Kuv thiaj yog Vajtswv yeej tsis muaj dua lwm tus vajtswv li.

²³Kuv tej lus cog tseg yeej yog lus tseeb, thiab yuav tsis hloov li. Kuv qhia tseeb hais tias txhua tus yuav tau txhos caug ntawm kuv xubntiag, thiab lawv lees hais tias lawv yuav muab siab npuab kuv.

²⁴“Lawv yuav hais tias tsuas yog tus TSWV tib leeg xwb thiaj yuav pub lawv kovyeej thiab muaj zog,” tiamsis txhua tus uas ntxub kuv yuav raug kev txajmuag.

²⁵Kuv yog tus TSWV uas yuav cawm tagnrho Yakhauj cov xeebntxwv kom dim, thiab lawv yuav ua kuv tsaug.