Read Hmong Daw Yaxayas 46 Bible Online

Yaxayas 46 - Hmong Daw bible

Yaxayas 46

¹“Thaum ub muaj neeg tuaj pe tus mlom Npeles thiab tus mlom Nenpaus, tiamsis nimno luag muab rau tsiaj thauj lawm xwb; tej mlom ntawd tsuas ua lub nra hnyav rau tej tsiaj xwb.

²Cov mlom ntawd yeej pab tsis tau kom mlom dim li; luag thiaj coj cov mlom ntawd mus lawm. Ntawm no yog qhov kawg rau lub nroog Npanpiloos tej vajtswv.

³“Yakhauj cov xeebntxwv uas yog haivneeg Yixalayees uas tseem tshuav nyob, nej cia li mloog kuv hais. Kuv yeej saib xyuas nej puag thaum uas nyuam qhuav yug tau nej los.

⁴Kuv yog nej tus Vajtswv thiab kuv yuav saib xyuas nej mus txog thaum nej laus thiab plaubhau dawb lawm. Kuv yog tus tsim nej thiab yuav tu nej; kuv yuav pab nej thiab tso kom nej dim.”

⁵Tus TSWV hais tias, “Nej yuav muab kuv piv rau leejtwg? Puas muaj lwm tug zoo li kuv thiab?

⁶Cov neeg qhib lawv tej hnab rho lawv tej kub los thiab muab lawv tej nyiaj los luj saum teev. Lawv ntiav ib tug txawj nchuav kub tuaj nchuav ib tug mlom; ces lawv mus txhos caug pe tus mlom ntawd.

⁷Lawv tsaws tus mlom ntawd rau saum xubpwg kwv mus; lawv coj mus txawb rau ib qho chaw, tus mlom ntawd mus tsis tau qhov twg li. Leejtwg thov nws los nws tsis paub teb lossis nws cawm tsis tau leejtwg dim ntawm txojkev puastsuaj li.

⁸“Nco ntsoov tej no thiab ua tib zoo xav, nej cov neeg uas ntxeev siab, cia li khaws nkaus rau nruab siab.

⁹Nco ntsoov tej xwmtxheej uas tshwmsim puag thaum ub los lawm; kuv yog Vajtswv, tsis muaj dua lwm tus li lawm; kuv yog Vajtswv, tsis muaj lwm tus zoo li kuv.

¹⁰Thaum chivkeeb kuv twb yeej qhia zaj uas yuav tshwmsim los thaum ntiajteb yuav kawg lawm. Kuv hais tias, ‘Tej uas kuv twb npaj lawm yuav nyob khov kho; kuv yuav ua txhua yam kom tiav raws li kuv tau npaj tseg lawm.’

¹¹Kuv tabtom hu ib tug neeg khiav ceev cuag dav ya tim hnubtuaj tuaj; nws nyob lub tebchaws uas deb heev tuaj, nws yuav ua kuv tes haujlwm kom tiav. Kuv hais li cas, kuv yuav ua li ntawd, thiab kuv npaj siab li cas, kuv yuav ua li ntawd ntag.

¹²“Cov neeg siab tawv, yog leejtwg xav hais tias, nws tseem nyob deb ntawm txojkev dim, ces cia li mloog kuv tej lus!

¹³Kuv coj txojkev cawm dim los ze thiab nyob tsis deb nej lawm. Kuv txojkev cawm dim yuav tsis muab ncua tseg li; Kuv yuav cawm lub nroog Yeluxalees thiab yuav coj lub koob meej zoo los rau cov Yixalayees.”