Read Hmong Daw Yaxayas 48 Bible Online

Yaxayas 48 - Hmong Daw bible

Yaxayas 48

¹Cov Yixalayees uas yog Yudas cov xeebntxwv nej cia li mloog tej lus no: Nej tuav Vajtswv lub npe coglus hais tias peb yuav pehawm cov Yixalayees tus Vajtswv, tiamsis nej tsis ua raws li nej tej lus ntawd.

²Nej hais tias nej yog cov pejxeem uas nyob hauv lub nroog dawbhuv thiab tso siab plhuav rau cov Yixalayees tus Vajtswv uas lub npe hu ua tus TSWV uas muaj hwjchim loj kawg nkaus.

³Tus TSWV hais rau cov Yixalayees hais tias, “Thaum ub kuv twb qhia rau nej lawm hais tias yuav muaj dabtsi tshwmsim los; yog li ntawd, thaum nej tsis nco txog, kuv thiaj ua kom tej ntawd tshwm los.

⁴Kuv yeej paub hais tias, nej yog neeg tawv ncauj, nej lub cajdab tawv npaum li hlau, thiab nej lub hauvpliaj tawv npaum li tooj dag.

⁵Yog li ntawd, kuv twb xub qhia txog nej lub neej yav tom ntej rau nej paub puag thaum ub los lawm. Kuv qhia ua ntej uas tej ntawd tshwmsim los kom nej tsis txhob khav hais tias, yog nej tej mlom ntoo lossis mlom tooj ua kom tej ntawd tshwmsim los.

⁶“Nej twb hnov tej no thiab pom tej ntawd lawm. Nej txawm tsis lees paub li los? Txij no mus kuv yuav qhia tej yam tshiab rau nej paub, yog tej yam nraim nkoos uas nej tsis tau paub dua li.

⁷Tej xwmtxheej uas kuv nyuam qhuav ua no nej yeej tsis tau hnov dua li. Yog nej hnov lawm, nej yuav khav hais tias, ‘Pej twb paub lawm.’

⁸Nej yeej ibtxwm tsis hnov, nej yeej ibtxwm tsis paub li; txij puag thaum ub los, nej lub qhovntsej yeej tsis qhib. Vim kuv paub nej lub siab yeej tsis ncaj, thiab nej yeej yog neeg ntxeev siab thaum yug tau nej los li lawm.

⁹“Vim kuv xav kom neeg qhuas kuv lub npe, kuv cheem kuv txojkev chim tseg rau nruab siab. Kuv cheem tej ntawd thiaj tsis ua rau nej puastsuaj.

¹⁰Kuv tau coj kev nyuaj siab los sim nej ib yam li nchuav nyiaj hauv yeejvub, tiamsis kuv pom hais tias nej tsis muaj nqis dabtsi li.

¹¹Vim kuv xav ua kuv, vim kuv xav ua rau kuv xwb, kuv thiaj ua tej no, kuv yuav tsis pub leejtwg saib tsis taus kuv lub npe lossis tsis pub leejtwg muaj feem koom nrog kuv lub tshwjchim.”

¹²Tus TSWV hais tias, “Yakhauj, koj cia li mloog kuv tej lus, Yixalayees tus uas kuv tau hu! Kuv yog Vajtswv, kuv yog lub hauvpaus thiab yog lub ntsis.

¹³Yog kuv txhais tes tsim lub ntiajteb, thiab kuv sab tes xis nthuav lub ntuj; thaum kuv hu, lub ntiajteb thiab lub ntuj tib txhij tawm tuaj.

¹⁴“Nej sawvdaws cia li sib sau los ua ke thiab mloog kuv hais! Lawv cov ntawd, leejtwg thiaj qhia tau tej lus no rau sawvdaws? Tus TSWV hlub Xailas heev, tus TSWV thiaj xaiv Xailas ua nws tes haujlwm rau lub nroog Npanpiloos thiab tus TSWV txhais tes yuav tawmtsam lub nroog Npanpiloos.

¹⁵Kuv yog tus hais thiab yog tus hu Xailas ntag; kuv coj nws los thiab ua kom nws vammeej.

¹⁶“Cia li txav los kom ze thiaj hnov zaj uas kuv hais no. Kuv yeej qhia zaj no puag thaum chivkeeb los tsis zais li, thiab yeej tshwm muaj tseeb raws li kuv tej lus.” (Nimno tus TSWV uas yog Vajtswv muab nws lub hwjchim rau kuv thiab txib kuv mus.)

¹⁷Cov Yixalayees tus Vajtswv uas dawbhuv, tus TSWV uas cawm nej dim hais tias, “Kuv yog tus TSWV uas yog nej tus Vajtswv, tus uas qhia qhov zoo rau nej thiab coj nej taug txojkev uas tsimnyog taug.

¹⁸“Yog nej ua tib zoo mloog kuv tej lus samhwm! Ces tej koob hmoov yuav ntws laub lug los rau nej ib yam li tus dej ntws tsis paub nqhuab li. Nej tej kev vammeej yuav zoo ib yam li hiavtxwv ntas.

¹⁹Nej tej tubki yuav huamvam coob suav tsis txheeb ib yam li tej suabzeb, lawv tej npe yuav tsis raug rho tawm ntawm kuv lossis tsis raug puastsuaj li.”

²⁰Cia li khiav tawm hauv lub nroog Npanpiloos mus, cia li khiav kom dim. Cia li hu nkauj zoo siab rau txhua qhov paub hais tias, “Tus TSWV tau txhiv nws tus tubtxib Yixalayees dim lawm!”

²¹Thaum tus TSWV coj nws haivneeg taug kev los hla tiaj suabpuam qhov uas tshav ntuj kub heev ntawd, lawv yeej tsis raug txojkev txomnyem thiab nqhis dej li. Tus TSWV ua kom dej txhawv hauv pobzeb los rau lawv haus; nws rua lub pobzeb thiab dej thiaj tawm hauv los.

²²Tus TSWV hais tias, “Tsis muaj kev kaj siab rau cov neeg ua txhaum li.”